Isaías 48 - Q'eqchi Bible

Li Qaawa' junxil ak xyehom resil chixjunil

¹ “Ab'ihomaq a'in, ex ralal xk'ajol laj Jakob, li nekek'ab'a'in ajwi' Israel, laa'ex li xexyo'laak sa' riyajil laj Judá. Nekeye eejurament sa' xk'ab'a' li Qaawa' ut nekepatz' xk'ab'a' li xYos laj Israel, ab'an ink'a' nekeb'aanu sa' xyaalal chi moko rik'in xtiikilal eech'ool.

² Nekeye naq laa'ex li santil tenamit Jerusalén ut nekek'ojob' eech'ool rik'in li Qaawa', li xYos laj Israel, li naxk'ab'a'in «Nimajwal Yos».

³ Li k'a'aq re ru ak xk'ulmank, junxil ak inyehom resil; rik'in xtz'uumal we kink'e chi nawe'k. Ut chi junpaat xinb'aanu, ut yaal naq xk'ulmank.

⁴ Laa'in ninnaw naq kaw laajolom, kama'at li ch'iich', ut ink'a' naq'unaak laach'ool jo' li pek.

⁵ Jo'kan naq junxil inyehom resil; naq toj maji' nak'ulmank, kink'e chanaw; mare anchal xaye raj sa' laach'ool: «Linyos xb'aanunk re; li jalam u li xink'e chi yiib'aak, a'an xyehok re».

⁶ Laa'at xawab'i ut xawil chixjunil, ut tento taak'ulub'a naq yaal a'an. Anaqwan nink'e chanaw ak' na'leb', jun muqmuukil na'leb' li toj maji' aanawom.

⁷ Maawa' xkomon li k'aru kinb'aanu najter, toja' anaqwan yookin chi xb'aanunkil. Maajun sut aawab'ihom resil toj anaqwan, re naq ink'a' taaye: «Ak ninnaw a'in».

⁸ Ink'a' aawab'ihom resil a'an chi moko aanawom, xb'aan naq tz'aptz'o laaxik chi junelik. Ak ninnaw laa'in naq moko tiik ta laach'ool, jo'kan naq: «Aj q'etol aatin» nakak'ab'a'in chalen chaq sa' laasiyajik.

⁹ “Sa' xk'ab'a' linloq'al xinkuy linjosq'il, re naq taaterq'usiiq link'ab'a', xinkuy wib' ut ink'a' xinsach aawu.

¹⁰ K'e reetal naq xatinch'ajob'resi; ab'anan moko jo' ta na'uxk re li plaat, xinyal b'an aawix rik'in li rahilal.

¹¹ Sa' xk'ab'a' linloq'al ut linrahom xinb'aanu: maajoq'e tinkanab' chi muxe'k link'ab'a', chi moko tinq'axtesi linloq'al re jalan chik.

Li Qaawa' tixkol li xtenamit rik'in xk'anjel laj Siro

¹² “Ab'i, a Israel, xtenamitat laj Jakob, li insik'om chaq aawu: Laa'inin; laa'in li xtiklajik ut li xraqik.

¹³ Rik'in li wuq' kink'ojob' li ruuchich'och' sa' xna'aj ut kinhel ru li choxa: ka'ajwi' kinb'oqeb', junchalikeb' naq ke'chalk wik'in.

¹⁴ Ch'utub'omaq eerib' chejunilex ut ab'ihomaqin: Ani sa' eeyanq xyehok eere: «Li wamiiw tixb'aanu li wajom reheb' laj Babilonia ut eb' laj Kaldeha»?

¹⁵ Laa'in xin'aatinak rik'in, xinb'oq ut xink'am chaq re naq us taa'elq sa' li xb'aanuhom.

¹⁶ Jilonqex chaq chink'atq ut ab'ihomaq a'in: Chalen chaq sa' xtiklajik maak'a' xinye chi muqmu; ut naq yo chi k'ulmank chixjunil a'in, wankin aran laa'in. Ut anaqwan laa'in, li Qaawa' Yos, xintaqlank chaq re rik'in xwankil linmusiq'”.

¹⁷ Jo'ka'in kixye li Qaawa', laj Kolol aawe, li xSant laj Israel: “Laa'in li Qaawa', laaYos; laa'in nink'ut chawu li k'aru us cho'q aawe ut nakatinb'eres sa' li b'e tento taak'am.

¹⁸ Jwal us raj naq xapaab' linchaq'rab'! Li xsahil aach'ool q'axal yo raj chi k'iik jo' junaq nima', ut laawosob'tesinkil jo' raj xnimal li xkawil roq li palaw.

¹⁹ K'ajo'eb' raj laawalal aak'ajol, li xk'ihaleb' jo' raj xk'ihal li samahib' chire li palaw; maajoq'e raj xeb'insach ru laa'in, chi moko xe'isiik raj chiwu!”.

²⁰ Elenqex chaq sa' li tenamit Babilonia, elelinqex chiruheb' laj Kaldeha. Yehomaq li esil a'in chi sa sa' eech'ool, puktesihomaq toj sa' xmaril li ruuchich'och'; yehomaq a'in: “A' li Qaawa' xkolok re laj Jakob, laj k'anjel chiru”.

²¹ Naq yookeb' chi nume'k sa' li chaqich'och', ink'a' ke'chaqik re; li Qaawa' kixk'eheb' ruk'a' naq kixjor li saqoonak ut ki'elk roq nima'.

²² Ab'an maak'a' tuqtuukilal cho'q reheb' li ink'a' useb' xna'leb' -chan li Qaawa'-.