Isaías 47 - Q'eqchi Bible

Xsachik Babilonia

¹ “Kub'si aawib', chunlan sa' pojtz', at tuq'ixq re Babel li maak'a' chik aawankil! Chunlan sa' ch'och', at xrab'in eb' laj Kaldeha; ink'a' chik te'xye aawe: «Q'un aach'ool ut tuulanat».

² Chap li ka' ut ke'en k'aj. Isi li t'ikr tz'aptz'o wi' laawu, moch laawaq', t'usub' laawa' ut numen junpak'al li ha'.

³ Tatkanaaq chi t'ust'u re xk'utb'al aaxutaan. Tink'e reeqaj li xab'aanu we ut maajun taaramoq chiwu”.

⁴ Li Nimajwal Yos, li xSant laj Israel, laj Kolol qe kixye chi jo'ka'in:

⁵ “K'ojlan chi maak'a' eek'ank, okan sa' li aak'ab', at xrab'in eb' laj Kaldeha, xb'aan naq ink'a' chik taayeemanq aawe: «Xna'eb' li tenamit».

⁶ K'ajo' naq xinjosq'o'k rik'in lintenamit, xink'e chi muxe'k li weechanihom ut xinq'axtesiheb' sa' laawuq', a Babilonia. A'ut laa'at ink'a' xawil xtoq'ob'aal ruheb' ut xateneb' li kawil k'anjel sa' xb'eeneb' li cheekel winq.

⁷ Xaye ajwi' sa' laach'ool: «Taawanq inwankil chi junwaakaj». Ab'anan ink'a' xak'oxla rix a'an chi moko xnume'k sa' laawaanm k'aru toxraqe'q wi'.

⁸ Ab'i ut anaqwan li aatin a'in, laa'at aj raholat re li sahil wank. Nakak'ojob' aawib' chi maak'a' nakak'oxla, ut nakaye sa' laach'ool: «Ka'ajin wi' ut maak'a' chik junaq. Maajoq'e tinxtaw xrahil li kanaak sa' junaatalil chi moko tinkanaaq chi maak'a'eb' chik li walal ink'ajol».

⁹ Ab'anan, maak'a'aq sa' laach'ool naq te'chalq li wiib' chi rahilal a'in sa' aab'een: li kanaak sa' junaatalil ut li xsachikeb' laawalal aak'ajol, us ta jwal nakattuulak ut nakatnawalink.

¹⁰ Jwal xak'ojob' aach'ool sa' laamaa'usilal ut xaye: «Maajun na'ilok we», chankat. Laana'leb' ut laanawom xe'b'alaq'ink aawe. Xaye ajwi' sa' laach'ool: «Ka'ajin wi' ut maak'a' chik junaq jo' laa'in».

¹¹ Jo'kan naq taachalq sa' aab'een jun rahilal chi ink'a' tatruuq chi xkolb'al aawib' chiru; q'axal ra taak'ul ut maak'a' xja'lenkil. Chi junpaat taachaalunq jun raaxiik' sa' aab'een li ink'a' nakawoyb'eni.

¹² Kanaaqat rik'in laak'iila nawalink, yal wan aaq'e chi tuulak, li nakatawasi wi' aawib' chalen chaq sa' laasaajilal! Mare toj taak'anjelaq chawu, mare toj tatnumtaaq sa' xb'eeneb' li poyanam!

¹³ Xattawaak xb'aan xk'ihaleb' laj k'ehol aana'leb'. Chalqeb' b'i' chakolb'al anaqwan eb' li neke'q'ehink chiru li choxa, eb' li neke'tz'ilok rix eb' li chahim, jo'wi' eb' li neke'xye aawe rajlal po li k'aru taak'ulmanq moqon.

¹⁴ K'e reetal, kama'eb' li k'im naq te'oso'q chixjunileb'; li xam taasachoq reheb', ut ink'a' te'ruhanq chi xkolb'aleb' rib' chiru xtiqwal li xam. Xb'aan naq a'an maawa' xam re k'uub'ank tzekemq chi moko ru xam naruuk wi' q'ixink.

¹⁵ A'an toxe'oso'q wi' eb' laj tuul, eb' li q'axal xe'tawasink aawe chiru chixjunil laayu'am. Ak xb'e xb'e te'xk'am li junjunq ut maajun taaruuq chi kolok aawe.