Isaías 42 - Q'eqchi Bible

Laj K'anjel chiru li Qaawa'

¹ A'an a'in laj k'anjel chiwu, laa'in ninkuutunk re; a'an li sik'b'il ru inb'aan li nasaho'k wi' inch'ool. Xink'e re linmusiq' re naq taaroksi li tiikilal rik'ineb' li k'iila tenamit.

² Ink'a' tixjap re chi aatinak chi moko taawech'inq; ink'a' taa'ab'iiq li xyaab' xkux sa' b'e.

³ Ink'a' tixtoq li kaxlan'aj ak jorol, chi moko tixchup xsaqenkil li noq' toj nab'utz'utz'nak. Tz'aqal tixxaqab' xwankil li tiikilal.

⁴ Ink'a' taahilanq chi moko taach'inanq xch'ool toj reetal tixk'ojob' li k'ulub'ej junsut junrub'el choxa. Ut rik'in a'an xaqxooq li royb'enihomeb' li tenamit sutsuukeb' chi ha'.

⁵ Jo'ka'in kixye li Qaawa' li kiyoob'tesink ut kihelok re li choxa, li kik'uub'ank re li ruuchich'och' jo'wi' li wank chiru, li kik'ehok xyu'am eb' li poyanam ut kixyoob'tesi chixjunileb' li wankeb' arin:

⁶ “Laa'in, li Qaawa', xatinb'oq ut xatinch'ilo chaq chawuq' re roksinkil li tiikilal; xatink'uub' ut xatinxaqab' cho'q sumwank rik'in lintenamit ut cho'q xsaqenkeb' li poyanam;

⁷ re xteeb'al xsa' ruheb' li mutz', re rach'ab'ankileb' li wankeb' sa' tz'alam ut re risinkileb' chi tz'apam li wankeb' sa' li aak'ab'.

⁸ Laa'in li Qaawa'. A'in tz'aqal link'ab'a'. Ink'a' nink'e linloq'al re jalan chik, chi moko ninq'axtesi linwankil reheb' li jalanil yos.

⁹ Ilomaq, li k'aru xinye chaq xb'enwa, ak xk'ulmank; anaqwan ak' esil chik tinye eere; tink'e chenaw naq toj maji' nak'ulmank”.

B'ich re li sahil wank

¹⁰ B'ichahomaq junaq ak' b'ich cho'q re li Qaawa'; k'ehomaq xloq'al laa'ex li wankatqex chaq sa' xmaril li ruuchich'och', laa'ex li nekexxik chiru li palaw jo'wi' chixjunil li wank chisa', eb' li na'ajej sutsuukeb' chi ha' ut eb' li xpoyanamil.

¹¹ Chisaho'q sa' xch'ool li chaqich'och' ut eb' li xtenamitul, chixjunileb' li muheb'aal wankeb' wi' laj Kedar. Sahoqeb' chaq li wankeb' Petra ut xjapaqeb' re chi b'ichank toj sa' xb'eeneb' li tzuul.

¹² Che'xnimaaq xloq'al li Qaawa', che'xpuktesiiq resil li xwankil toj sa'atqeb' li tenamit li wankatqeb' chire li palaw.

¹³ Li Qaawa' taa'elq chaq jo' li q'axal kaw rib', tixjap chaq re jo' junaq aj puub'; chi k'ajo' xjosq'il taa'ok chi yalok ut tixq'ax ruheb' li xik' neke'ilok re.

¹⁴ “Chalen chaq sa' xtiklajik maak'a' ninye, ch'anch'ookin xinkanaak ut yal xinkuy wib'; ab'an anaqwan ninjap we jo' li ixq ok re chi alank, ninxeeyank ut ninpoosank aj chik.

¹⁵ Ok we chi xsachb'aleb' li tzuul ut eb' li b'ool, chaqi tinkanab' chixjunil li xrax pimul; tinchaqihob'resi eb' li nima', ut joxk' ch'och' aj chik tinkanab'eb' li kaqnaab'.

¹⁶ Tink'ameb' li mutz' sa' junaq b'e ink'a' numenaqeb' chisa', ut tinb'eresiheb' sa' junaq na'ajej b'arwi' toj maji' wanjenaqeb'. Chiruheb' a'an tinsutq'isi li aak'ab' cho'q saqenk, ut eb' li julux b'e te'kanaaq chi nat'anb'ak ru. Chixjunil li k'a'aq re ru a'in tinb'aanu; relik chi yaal naq tinb'aanu chi junpaat”, chan li Qaawa'.

¹⁷ Chi k'ajo'aq xxutaaneb' te'eleliq li neke'xkawub'resi xch'ooleb' chirixeb' li jalanil yos, eb' li neke'yehok re junaq jalam u: “Laa'at li qayos”.

Li xmutz'ileb' laj Israel

¹⁸ “Ab'ihomaq, ex tz'apxik! Ex mutz', tehomaq xsa' leeru ut chex'iloq!

¹⁹ Ani tawi' li mutz'? Ma ink'a' tawi' a' laj k'anjel chiwu? Maajun li q'axal tz'apxik jo' li xintaqla chi yehok esil, maajun li q'axal mutz' ut jwal tz'apxik jo' lintaql, jo' laj k'anjel chiwu laa'in li Qaawa'.

²⁰ Naab'al li k'a'aq re ru aawilom, ab'an maajun xataw xyaalal; q'es raj laaxik chi ab'ink, ab'an maak'a' nakawab'i.

²¹ Li Qaawa' xraj xk'eeb'al xloq'al ut xwankil li xchaq'rab' sa' xk'ab'a' li xtiikilal xch'ool.

²² A'ut li tenamit a'in xe'elq'aak ut xe'maq'je'k li k'aru wankeb' re, ut anaqwan tz'aptz'ookeb' chixjunileb' sa' tz'alam malaj sa'eb' li ochoch pek. Neke'maq'mank li k'a'aq re ru reheb' ut maajun nakolok reheb'; neke'elq'aje'k ut maajun nayehok: «Q'ajsihomaq chaq»”.

²³ Ani eere taa'ab'inq re a'in? Ani tixk'e xch'ool chi rab'inkil li taak'ulmanq moqon?

²⁴ Ani xkanab'ank chi elq'aak laj Jakob ut xq'axtesink chi rahob'tesiik laj Israel? Ma maawa' tab'i' li Qaawa' li xoomaakob'k chiru? Ink'a' xe'raj xyu'aminkil li raatin chi moko xpaab'ankil li xchaq'rab'.

²⁵ Jo'kan naq li Qaawa' k'ajo' naq xjosq'o'k rik'ineb' ut xrahob'tesiheb' rik'in li raaxiik'. Yalaq b'ar xlochmank xxamlel, ab'an ink'a' xe'xk'e reetal; xe'k'atmank, ab'an ink'a' xe'xtaw xyaalal.