Isaías 38 - Q'eqchi Bible

Xyajel ut li xk'irajik laj Esekías

¹ Sa'eb' li kutan a'an kiyajerk laj Esekías. Naq kamk re, kiwulak laj Isaías, ralal laj Amós, chi xyeeb'al re: “Jo'ka'in xye li Qaawa': «Yiib' xhuhul laajunkab'lal, xb'aan naq kamk aawe ut ink'a' chik tatk'iraaq»”.

² Laj Esekías kixb'alq'usi rib' chi ilok chiru li tz'ak ut kitijok chi jo'ka'in:

³ “At Qaawa', jultikaq taxaq aawe naq tiik ru linyu'am; xinwank chawu sa' chaab'ilal ut xinb'aanu li nawulak chawu”. K'ajo' naq kiyot'e'k xch'ool laj Esekías chi yaab'ak.

⁴ Toja' naq ki'aatinaak laj Isaías xb'aan li Qaawa' chi jo'ka'in:

⁵ “Sutq'in ut ye re laj Esekías: «Jo'ka'in xye li Qaawa', li xYos laj David laayuwa': Xwab'i laatij ut xwil li xya'al laawu. Tatink'irtasi, ut sa' rox li kutan tatxik sa' rochoch li Qaawa'. O'laju chihab' chik tatyo'yooq sa' ruuchich'och'.

⁶ Tatinkol laa'at jo'wi' Jerusalén sa' ruq' li awab'ej re Asiria, ut tinmuheela li tenamit a'in»”.

²¹ Laj Isaías kixye: “K'amomaq chaq junaq k'uluj yiib'anb'il rik'in iig, lanomaq chiru li xsankil xox ut taak'iraaq li awab'ej”.

²² Ut laj Esekías kixpatz' re: “K'aru tinnaw wi' naq tinxik sa' rochoch li Qaawa'?”, chan.

⁷ Kichaq'ok laj Isaías ut kixye: “A'an a'in li reetalil tixk'e aawe li Qaawa' re naq taanaw naq relik chi yaal tixb'aanu li xyehom:

⁸ K'e reetal naq tinsutq'isi lajeeb'aq yokb' xmu li saq'e chirix, sa' li xb'isleb'aal honal laj Ajás”. Ut relik chi yaal li saq'e kisutq'iik lajeeb' yokb' chirix, sa' li b'isleb'aal honal.

Xb'ich laj Esekías

⁹ A'an a'in li xb'ich laj Esekías, awab'ej re Judá, naq kiyajerk ut kik'iraak chiru li xyajel:

¹⁰ Laa'in xinye sa' linch'ool: Sa' xyiitoq linyu'am tinq'ajq tinsutq'iiq; tento tinxik chi xchoyb'al linyu'am sa' xyanqeb' li kamenaq.

¹¹ Xinye ajwi': Ink'a' twil ru li Qaawa' sa' xyanqeb' li yo'yookeb'; maajun chik poyanam twil ru, xkomoneb' li wankeb' sa' ruuchich'och'.

¹² Juk'b'il linmuheb'aal ut maq'b'il chiwu jo' xmuheb'aaleb' laj ilol ketomq. Xinb'ot linyu'am jo' naxb'aanu laj kemonel, ut laa'at xaset xnoq'al linkemom. Chi q'eq ut chi kutan yookat chinsachb'al,

¹³ japjo we chi yaab'ak chalen toj nasaqewk. Kama'at jun li kaqkoj yookat chi xmuch'inkil chixjunil linb'aqel. Chi q'eq ut chi kutan yookat chinsachb'al.

¹⁴ Kama'in li wilix naq nintz'uyink, ninq'urnak kama' li mukuy. Xe'lub'je'k xsa' li wu chi ilok sa' choxa. At Qaawa', jwal ra wankin, kim chintenq'ankil!

¹⁵ Ab'anan k'aru tinye re? Xb'aan naq A'an yo chi b'aanunk re. Junes sa' rahil ch'oolej tinwanq chiru chixjunil linyu'am.

¹⁶ Chixjunileb' li k'aak'alenb'ileb' xb'aan li Qaawa' te'wanq xyu'am ut laa'in tinwanq rik'ineb'. Xinaak'irtasi, at Qaawa', ut xak'e wi' chik inyu'am.

¹⁷ Linrahilal xsutq'iik chaq chi sahil wank, xb'aan naq xakol li waanm chiru li kamk ut xawiiqa chixjunil linmaak.

¹⁸ Eb' li xe'q'ajk xe'sutq'iik ink'a' neke'xloq'on aawu, at Qaawa'; eb' li kamenaq ink'a' neke'xnima laak'ab'a', chi moko eb' li neke'xik sa' xb'alb'a neke'yo'onink rik'in li xtiikilal laach'ool.

¹⁹ Li yo'yo, li wank xyu'am, a'an nanimank aawu, jo' naq ninb'aanu laa'in anaqwan. Li yuwa'b'ej naxtzoleb' li ralal xk'ajol chirix li xtiikilal laach'ool.

²⁰ At Qaawa', kim chinkolb'al, ut toob'ichanq toowajb'aq chiru chixjunil li qayu'am sa' rochoch li qaYos.