Isaías 30 - Q'eqchi Bible

Ra chaalel sa' xb'eeneb' li neke'xk'am rib' sa' aatin rik'in Ejiipt

¹ Ra chaalel sa' xb'eeneb' li q'etq'et aj aleb', chan li Qaawa', li neke'xk'uub' li k'aru neke'raj, chi ink'a' neke'xpatz' we, ut neke'xk'ojob' sumwank li ink'a' inyehom reheb'. Jo'kan naq yo chi tamk li xmaakeb'.

² Neke'xik Ejiipt chi ink'a' neke'xye we; neke'xpatz' xtenq'ankileb' re laj Parahón ut neke'xsik' xkolb'aleb' rub'el xwankil Ejiipt.

³ Ab'an li xkawilal leech'ool rik'in laj Parahón taak'ehoq eere sa' xutaan ut li xtenq'aaleb' laj Ejiipt taasachoq leech'ool.

⁴ Us ta ak xetaqla aran Sohán laj jolominel eere ut wulajenaqeb' chik leetaql aran Janés,

⁵ chixjunileb' te'b'alaq'iiq xb'aan li tenamit a'an li maak'a' na'ok wi'; ink'a' te'tenq'aaq xb'aaneb' chi moko us te'elq, ka'aj b'an wi' li xutaan ut li rahilal te'xk'ul.

⁶ Resilal li k'aru te'xk'ul eb' li xul re Nejeb: Eb' laj Israel neke'xk'am Ejiipt li xb'ihomaleb' ut li k'aru wank reheb', chirixeb' li b'uur ut eb' li kameey. Neke'nume'k sa' li xiwajelil chaqich'och' b'arwi' wankeb' li josq' aj kaqkoj, eb' li ikb'olay ut eb' li raxk'aj, ut neke'xik sa' jun tenamit li moko tixtenq'aheb' ta.

⁷ Relik chi yaal naq li xtenq'aal Ejiipt maak'a' aj e ut maak'a' na'ok wi'. Jo'kan naq xink'e cho'q xk'ab'a' Ejiipt: “Josq' aj nimla xul, ab'an maak'a' na'ok wi'”.

⁸ Ayu anaqwan ut tz'iib'a a'in chiru junaq tz'alamche' malaj junaq hu, ut aran tkanaaq toj chaalel eb' li kutan cho'q aj jitol reheb' chi junelik.

⁹ Xb'aan naq li tenamit a'in jwal kaweb' li xjolom ut aj ka'pak'al uheb', ink'a' neke'raj rab'inkil li xchaq'rab' li Qaawa'.

¹⁰ Neke'xye reheb' li neke'ilok moy u: “Mat-ilok chik moy u”; ut neke'xye reheb' li propeet: “Maaye li yaal qe, ye b'an li q'axal sa rab'inkil, us ta moko yaal.

¹¹ Elenqex chiqu ut meetaaqe chik li chaab'il b'e; ink'a' chik naqaj rab'inkil leeraatin chirix li xSant laj Israel”.

¹² Jo'kan naq li Qaawa', li xSant laj Israel, kixye chi jo'ka'in: “Laa'ex xetz'eqtaana li aatin a'in ut xek'ojob' leech'ool sa' li raaxiik' ut li maa'usilal; kaw leech'ool rik'in chixjunil a'an.

¹³ Jo'kan naq wank leemaak. Chanchanex li jorol tz'ak najt xteram li taat'ane'q chi maak'a'aq sa' eech'ool.

¹⁴ Texsache'q jo' naq najormank junaq ch'och' sek' li na'oso'k chi junajwa; ut maak'a' chik nakanaak cho'q re xokok ru xam chi moko re raj lekok ha' sa' junaq kuk”.

¹⁵ Jo'ka'in kixye li Qaawa', li xSant laj Israel: “Sutq'inqex chaq, xaqxooq leeroyb'enihom wik'in, ut texkole'q. Wi texwanq sa' xyaalal chi k'ojk'ooq leeraanm, teetaw xkawub' leech'ool”. A'ut laa'ex xetz'eqtaana li waatin

¹⁶ ut xeye chi jo'kan: “Ink'a', jwal us too'eleliq chirix kawaay”. Us b'i', elelinqex! Xeye ajwi': “Too'eleliq sa' b'eleb'aal ch'iich' li kaw neke'xik”. Us a'an, jo'kanaqeb' ajwi' li te'aanilasinq eere!

¹⁷ Jun mil chi poyanam sa' eeyanq te'eleliq xb'aan jun chi winq ut chejunilex laa'ex tex'eleliq chiruheb' oob' li xik' neke'ilok eere, toj reetal wiib' oxib' aj chik texkanaaq, jo' naq nakanaak chi kumku li che' chiru tzuul malaj jo' jun eetalil sa' xb'een junaq b'ool.

Li Qaawa' tixkuy xmaak li xtenamit

¹⁸ Ab'an li Qaawa' yo royb'eninkil li honal re rusilankil eeru. Taawakliiq chaq chi xtoq'ob'ankil eeru, xb'aan naq tiik xch'ool li Qaawa'. Us xaq reheb' li k'ojk'o xch'ooleb' rik'in!

¹⁹ Ex aj Jerusalén, mexyaab'ak chik. Li Qaawa' taaruxtaana eeru naq trab'i xyaab' leekux; ka'ajwi' texrab'i chi tz'aamank ut elajink, texsume.

²⁰ Us ta texrahob'tesi b'ayaq, ab'an ink'a' chik tixmuq rib' cheru laj Tzolol eere; rik'in leeru toxeeril li natzolok eere,

²¹ ut rik'in leexik teerab'i naq yooq chi aatinak chaq cherix: “A'an a'in li b'e; ayuqex aran, a' yaal ma sa' leenim malaj sa' leetz'e uq'”, cha'aq.

²² Toja' naq teetz'eqtaana leejalanil yos yiib'anb'il rik'in plaat ut leejalam u uutz'u'ujinb'il rik'in oor. Teekuteb' chi najt jo' li mul ut teeye reheb': “Elenqex arin”, cha'qex reheb'.

²³ Li Qaawa' tixtaqla chaq li hab' sa' xb'een li iyaj xeraw sa' li ch'och', ut a'in naab'al li wa tixk'e eere ut k'ajo'aq xsahil. Chiruheb' li kutan a'an eb' leewakax q'axal nimaq chik li xna'ajeb' te'ichajib'q wi';

²⁴ eb' li b'ooyx ut eb' li b'uur li neke'k'anjelak sa' leech'och', chaab'il ichaj te'xwa'.

²⁵ Sa' chixjunileb' li ninqi tzuul ut b'ool taawanq yu'amha' li ink'a' taachaqiq sa' xkutankil li nimla rahilal, naq te't'anje'q eb' li ochoch najteb' xteram.

²⁶ Toja' naq li xsaqenkil li po taalemtz'uno'q jo' li saq'e tuqtu wa'leb', ut li xsaqenkil li saq'e taalemtz'uno'q wuqub' sut chik jo' xsaqenkil li wuqub' kutan, naq li Qaawa' tixk'irtasi ut tixlan li xtiq'ilal li xtenamit.

Li xrahob'tesinkil Asiria

²⁷ K'ehomaq reetal, we' chaq li Qaawa', toj najt xchalk chaq. K'ajo' chaq li xjosq'il jo' li ru xam ut li sib' li nasachok. Li xtz'uumal re nak'utuk li xjosq'il ut li ru'uj raq' nak'atok kama' li xam.

²⁸ Li xmusiq' chanchan li ha' naq nab'ut'irk ut ka'aj chik maa nalamsink. Li Qaawa' tixtz'il rix li xb'aanuhomeb' li tenamit re xsachb'al li xwankileb'; jo' naq nak'ehe'k li ch'iich' sa' re li kawaay, jo'kan ajwi' tixb'aanu li Qaawa' reheb' li tenamit re xpo'b'al li xna'leb'eb'.

²⁹ Ab'an laa'ex texb'ichanq jo' na'uxk chiru q'oqyink sa' junaq loq'laj ninq'e. K'ajo' naq taasaho'q leech'ool, jo' naq nasaho'k xch'ool junaq poyanam xb'aan xyaab' li xolb' naq naxik sa' li xtzuul li Qaawa', sa' li xmuheb'aal laj Israel!

³⁰ Ut taa'ab'iiq li xkawil xyaab' xkux li Qaawa'; taak'utunq li xnimal xwankil, rik'in li xxamlel li xjosq'il li nasachok, rik'in kaqsut-iq', kaaq ut saqb'ach.

³¹ Xb'aan naq te'ok xxiweb' laj Asiria, yal rik'in rab'inkil xyaab' xkux li Qaawa' ut xk'ulb'al li xrahob'tesinkileb'.

³² Rajlal naq li Qaawa' tixrahob'tesi li tenamit a'an, taa'ab'imanq xyaab' li tun ut li aarp. A' li Qaawa' taa'elq chi yalok rik'ineb' laj Asiria.

³³ Xb'aan naq li na'ajej Tófet ak kawresinb'il chaq najter cho'q re Asiria jo'wi' cho'q re li x'awab'ej. Li na'ajej a'an q'axal nim ru ut jwal cham, k'ajo' li xsi'ul. Naq taamusiq'aq li Yos, tixloch xxamlel; chanchan roq nima' nujenaq chi asuupr naq taachalq li xjosq'il li Qaawa' sa' xb'een.