Isaías 3 - Q'eqchi Bible

Raqb'a aatin sa' xb'een Jerusalén

¹ K'ehomaq reetal naq li Qaawa', li Nimajwal Yos, tixkanab' Judá ut Jerusalén chi maak'a' chik wanq re, ut taarisi chixjunil li xwaheb' ut ruk'a'eb'.

² Maak'a'aqeb' chik li kaweb' rib', eb' laj yalonel, laj raqol aatin ut li propeet, laj q'e ut li cheekel winq,

³ li xjolomileb' laj puub' ut li ninqeb' xwankil, laj k'ehol na'leb', li chaab'il chi q'ehink ut laj nawal.

⁴ Texink'e chi jolomiik xb'aaneb' li saaj al, ut eb' a'an te'taqlanq sa' eeb'een.

⁵ Li junjunq taaraj numtaak sa' xb'een li ras riitz'in: li saaj winq tixq'etq'eti rib' chiru li cheekel winq ut laj k'anjel tixpleeti li xnimal ru winq.

⁶ Taawulaq xkutankil naq junaq asb'ej tixsik' ru junaq riitz'in sa' rochoch li xyuwa' ut tixye re: “Laa'at wank aab'aatal: kanaaqat cho'q aj k'amol qab'e; laa'at tat-isinq qe sa' li rahilal wanko wi'”, cha'aq re.

⁷ Ab'anan li jun chik tixye sa' li kutan a'an: “Ink'a' tinruuq eetenq'ankil. Maak'a' tzekemq chi moko b'aatal sa' li wochoch, jo'kan naq mineek'e chi xjolominkil li tenamit”, cha'aq.

⁸ Relik chi yaal naq yo chi sache'k Jerusalén ut juk'b'il chik Judá, xb'aan naq ink'a' us li xyehom xb'aanuhomeb'; xik' neke'ril li Qaawa' ut xe'xchiq' xjosq'il li Yos.

⁹ Chi xnaq' ruheb' nak'utunk li xmaa'usilaleb'; moko muqmu ta li xmaakeb', chanchaneb' wi' laj Sodoom. Toq'ob'eb' xaq ru, xb'aan naq yookeb' chi xsik'b'al li xrahilaleb'!

¹⁰ Us xaq re li tiik xch'ool xb'aan naq tixyal xsahil li xchaab'il k'anjel.

¹¹ Ab'an toq'ob' ru li ink'a' us xna'leb', xb'aan naq taaq'ajkamuuq jo' chanru li xyehom xb'aanuhom.

¹² Jun saaj al yo chi rahob'tesink re lintenamit, ut ixqeb' li neke'numtaak sa' xb'een. Ex intenamit, eb' laj k'amol eeb'e yookeb' cheb'alaq'inkil ut chi xk'amb'al eeb'e chi xb'aanunkil li ink'a' us.

¹³ Xwakli chaq li Qaawa', ak xaqxo chi raqok aatin sa' xb'een li xtenamit.

¹⁴ Li Qaawa' xchalk chi xb'oqb'aleb' sa' raqb'a aatin, ut tixye reheb' li cheekel winq ut eb' laj k'amol xb'e li xtenamit: “Laa'ex xexsachok re li wawimq uub', ut xnujak leerochoch rik'in li k'aru xerelq'a reheb' li neb'a'.

¹⁵ Ab'anan k'aru leewankil naq yookex xrahob'tesinkil lintenamit ut xtawasinkileb' li neb'a'?”, chan li Qaawa', li Nimajwal Yos.

Eb' li ixq aj Jerusalén

¹⁶ Li Qaawa' kixye ajwi' chi jo'ka'in: “Eb' li ixq aj Sión q'axal neke'xk'e xwankil, neke'xja'ab' rib' naq neke'b'eek; jwal josq' josq' neke'ilok ut neke'xk'osatq li xyokb' yal re xk'eeb'al chi eek'ank li xsahob' ru li roqeb'.

¹⁷ Ab'an laa'in tinjo li rismal li xjolomeb' li rixqilaleb' Sión ut xutaanal te'kanaaq”, chan li Qaawa'.

¹⁸ Sa' li kutan a'an li Qaawa' trisi chixjunileb' li xsahob' ru eb' li ixq: li xsahob' ru li oqej, li kemb'il t'ikr,

¹⁹ eb' li q'ol, li xsahob' ru eb' li xkux uq'ej ut eb' li neke'xlan wi' li xjolomeb',

²⁰ li ka'xik, li kareen neke'ruutz'u'uji wi' li roqeb', li xk'aamal xsa'eb', eb' li sununkil b'an ut li neke'xlukub' chi xkuxeb' re xkolb'aleb' rib' chiru li ink'a' us,

²¹ eb' li matq'ab', eb' li xsahob' ru li ru'ujeb',

²² li chaab'il aq'ej, li b'aatal, li nalanmank wi' li jolomej ut eb' li jelool,

²³ eb' li lem, li aq'ej terto xtz'aq, li xb'ak'b'al li rismal xjolomeb' ut eb' li xt'ikr.

²⁴ Sa' li kutan a'an cho'q reeqaj li sununkil b'an taawanq li chu; cho'q reeqaj li k'aamal sa', a' chik li k'aam taak'eemanq; cho'q reeqaj li te'ok ismal, job'il jolomej chik taawanq; cho'q reeqaj li chaab'il b'aatal, a' chik li q'es ruhil t'ikr taawanq; ut li ch'ina'usal taasutq'iiq cho'q xutaan.

²⁵ Eb' laapoyanamil te'oso'q chi q'esnal ch'iich' ut eb' li kaweb' rib' te'kamq sa' li yalok.

²⁶ Junes yaab'ak ut tz'uyink taawanq chireheb' li okeb'aal, ut aajunes aj chik laa'at tatk'ojlaaq sa' li pojtz'.