Isaías 29 - Q'eqchi Bible

Li rahilal li tixk'ul Jerusalén

¹ Rahilal chaalel sa' xb'een Ariel, li tenamit kiwank wi' laj David! Ninq'ehinqex wan, wiib' oxib'aq chihab' chik,

² toja' naq tink'e li tenamit a'in sa' rahilal, ut taawanq yaab'ak ut tz'uyink; ut laa'ataq tz'aqal jun li artal nujenaq chi kik'.

³ Tatink'e chi sute'k xb'aaneb' li xik' neke'ilok aawe, tinwaklesi eb' li kawub'resinb'il ochoch chasutam ut tintuub' li ch'och' re aaweechaninkil.

⁴ Toja' naq taakub'siiq laawankil; ut naq tat-aatinaq chaq sa' li ch'och', laawaatin chanchanaq xyaab' xkux li anum, yal sa' hasb' aj chik tat-aatinaq chaq toj sa' li pojtz'.

^5-6 Sa' junpaat, chi maak'a'aq sa' laach'ool, li Nimajwal Yos tatxtenq'a rik'in kaaq, hiik ut tz'aapixikaq li choqink, kaqsut-iq', muqyax ut k'iila xam chi sachok. Li xk'ihaleb' li xik' neke'ilok aawe chanchanaqeb' li pojtz' q'un ru; ut eb' laj rahob'tesinel aawe te'sapuuq chi najt jo'kaqeb' li k'im.

⁷ Chixjunileb' li k'iila tenamit li neke'yalok rik'in Ariel, eb' li neke'rahob'tesink re Jerusalén ut neke'xjuk'eb' li ochoch najt xteram, chanchanaqeb' aj chik li matk' ut li moy u naq te'oso'q.

⁸ Taak'ulmanq jo' naxk'ul li yo xtz'okajik: naxmatk'e naq yo chi wa'ak, ut na'ajk ru chi maak'a' li wa sa' xsa'. Taak'ulmanq jo' naxk'ul li nachaqik re: naxmatk'e naq yo chi uk'ak, ut naq na'ajk ru, yo xchaqi'eel ut xtz'okajik. Jo'kan ajwi' te'xk'ul chixjunileb' li tenamit li neke'yalok rik'in li tzuul Sión.

⁹ Chememi eerib' ut kanaaqex sa' leememil, mutz'umaq leeru ut mutz' texkanaaq; kalaaqex, ab'an ink'a' rik'in b'iin, taktotqex, ab'an ink'a' xb'aan li ha' nakaltesink.

¹⁰ Xb'aan naq li Qaawa' xwartesi leena'leb', xtz'ap leeru ut leejolom, ex propeet ut aj ilol moy u.

¹¹ Chixjunil li moy u xk'utum cheru li Yos kama' aj chik li aatin tz'iib'anb'il chiru hu tz'apb'il chi us. Wi li hu a'an taak'eemanq chi xyaab'asi junaq li naxnaw ilok ru hu ut taayeemanq re: “Yaab'asi xsa' li hu a'in”, a'an tixsume: “Ink'a' tinruuq xb'aan naq tz'aptz'o chi us li hu”.

¹² Ut wi taak'eemanq chi xyaab'asi junaq li ink'a' na'ilok ru hu ut taayeemanq re: “Yaab'asi xsa' li hu a'in”, a'an taachaq'oq ut tixye: “Ink'a' ninnaw ilok ru hu”.

Nikine'roxloq'i yal rik'in xtz'uumal reheb'

¹³ Li Qaawa' kixye we chi jo'ka'in: “Li tenamit a'in yal chi aatin neke'nach'ok wik'in ut nikine'roxloq'i yal rik'in xtz'uumal reheb'; a'ut li xch'ooleb' najt wank wik'in. Maak'a' aj e naq neke'xloq'oni wu, xb'aan naq li k'aru neke'xk'ut chiruheb' li tenamit a'an yal xtaqlahomeb' li winq.

¹⁴ Jo'kan naq toj yooqin xb'aanunkil xninqal eetalil ut sachb'ach'oolej rik'in li tenamit a'in. Taapo'q li xna'leb'eb' li wankeb' xna'leb' ut taasachq xk'a'uxl li seeb'eb' xch'ool”.

Li tiikil ch'oolej taaq'axoq u

¹⁵ Ra chaalel sa' xb'eeneb' li neke'xmuq rib' chiru li Qaawa' yal re xmuqb'al li xk'a'uxeb'! Neke'b'aanunk maa'usilal sa' li aak'ab' ut neke'xye: “Maajun na'ilok qe, maajun nanawok qu”, chankeb'.

¹⁶ Ab'anan k'ajo' leememil! Chanchan tawi' naq li seb' juntaq'eet rik'in laj pak'onel. Ma naru tab'i' naq junaq sek' tixye re li xyiib'ank re: “Moko laa'at ta xatyiib'ank we”, malaj tixye raj re: “Ink'a' nakanaw xb'aanunkil laak'anjel”?

¹⁷ Chi seeb' Líbano taakanaaq cho'q xna'aj awimq ut li xna'aj awimq taak'iche'o'q wi' chik.

¹⁸ Sa' li kutan a'an li tz'apxikeb' te'rab'i naq taayaab'asimanq xsa' li hu, ut eb' li mutz' te'ruuq chik chi ilok: maak'a'aq chik aak'ab' chi moko choql sa' ruheb'.

¹⁹ Eb' li kub'enaqeb' xwankil te'saho'q wi' chik xch'ool rik'in li Qaawa', ut eb' li neb'a' q'axal te'k'ojlaaq xch'ool rik'in li Yos, li xSant laj Israel.

²⁰ Xb'aan naq maak'a'aq chik li kawil taqlank, ak sachb'ilaqeb' chik eb' laj eetz'unel, ut talaje'oso'q chixjunileb' li neke'raj b'aanunk maa'usilal,

²¹ eb' li neke'q'ab'ank re jalan chik chi xb'aanunkil li maa'usilal ut neke'xb'alaq'i eb' laj raqol aatin, li neke'tik'ti'ik re naq ink'a' taakolmanq rix li maak'a' xmaak.

²² Jo'kan naq li Qaawa', li xYos laj Israel, li kikolok re laj Abrahán, naxye chi jo'ka'in: “Chalen anaqwan ink'a' chik te'kaqo'q xb'aan xxutaaneb' eb' li ralal xk'ajol laj Jakob:

²³ naq te'ril li ninb'aanu sa' xyanqeb', te'xsantob'resi link'ab'a', te'xch'olob' li xsantilal li xYos laj Jakob ut te'xxiwa ru li xYos laj Israel.

²⁴ Eb' li sachalkeb' xna'leb', te'xtaw ru, ut eb' laj wech'onel te'xtzol li xtijb'aleb'”.