Isaías 28 - Q'eqchi Bible

Li rahilal li tixk'ul Samaria

¹ Rahilal chaalel sa' xb'een Samaria li nak'ehok xwankilal ut xnimob'resinkil rib' laj Efraín, ab'anan yal jun ch'uuteb' chi aj kalajenaq. Chanchaneb' jun sahob' u yiib'anb'il rik'in tz'umjenaqil uutz'u'uj, xaqxo sa' xb'een li ru taq'a k'ajo' xq'emal; a'aneb' oso'jenaqeb' chi junwaakaj xb'aan li ha' nakaltesink.

² K'ehomaq reetal naq li Qaawa' tixtaqla chaq jun li winq jwal kaw rib' jo' li xsaqb'achil li kawil hab', jo' li kaqsut-iq' chi sachok, jo' tz'aqal li b'ut'iha'. Rik'in ruq' tixkut chi ch'och'

³ ut tixyeq'i sa' roq li tenamit neke'xnima wi' rib' eb' laj Efraín li jwal kalajenaqeb'.

⁴ Ut li sahob' u yiib'anb'il rik'in tz'umjenaqil uutz'u'uj ut xaqxo sa' xb'een li ru taq'a k'ajo' xq'emal, taasache'q kama' li xb'een ru awimq li sa' junpaat nalowe'k xb'aan li naxokok re xb'enwa.

⁵ Sa' li kutan a'an li Nimajwal Yos a'anaq li xchaq'alil ru koroon, li xsahob' ru jo'k'ihaleb' li te'kole'q sa' li xtenamit.

⁶ Li Qaawa' tixk'e li tiikil ch'oolej reheb' laj raqol aatin ut xkawil xch'ooleb' laj puub' chi xkolb'al li tenamit re naq maajun taa'ok chisa'.

Laj Isaías ut eb' li propeet aj kalajenaq aran Judá

⁷ Wankeb' ajwi' li neke'taktotk xb'aan li b'iin ut sachenaq xna'leb'eb' xb'aan li ha' nakaltesink: a'aneb' laj tij ut eb' li propeet li ink'a' chik nach'olaak li neke'xb'aanu xb'aan li b'iin, sachso xna'leb'eb' xb'aan li ha' nakaltesink. Ink'a' chik neke'ch'olaak chi aatinak ut yookeb' xkalajik naq neke'raqok aatin.

⁸ Chixjunileb' li meex xa'wanb'ileb' ru, ut maajun chik li na'ajej saq b'ayaq ru.

⁹ Neke'aatinak chiwix ut neke'xye: “Ani li winq a'an li nachalk chi xk'eeb'al qana'leb' jo' ajwi' chi xch'olob'ankil chiqu li xyehom li Yos? Ma laa'o tab'i' k'uula'al? Ma toje' tab'i' xqakanab' li tu'uk?

¹⁰ Xb'aan naq ka'ajwi' neke'xye qe: ba, be, bi, bo, bu”.

¹¹ Us b'i', wi ink'a' nikine'xpaab', te'aatinaaq xb'aan li Yos sa' jalanil aatin, sa' jun aatinob'aal li ink'a' te'xtaw ru.

¹² Li Qaawa' ak xyehom reheb': “Arin wank li na'ajej re hilank, arin naru wank sa' xyaalal. K'ehomaqeb' b'i' chi hilank li tawajenaqeb'”. Ab'anan ink'a' xe'raj xpaab'ankil a'an.

¹³ Jo'kan naq li Qaawa' taaraatinaheb' jo' neke'aatinaak eb' li kok'al, jo' tawi' naq yookeb' chi tzolok ilok ru hu. Te'pak'luje'q chirixeb' sa' li xb'eenikeb'; te't'ane'q sa' li ra'al ut q'axal ra te'xk'ul naq te'chape'q.

Li pek sik'b'il ru k'ojk'ooq sa' xxuk Sión

¹⁴ Ab'ihomaq li raatin li Qaawa', laa'ex li jwal sa nekexse'ek anaqwan ut li nekexjolomink re li tenamit Jerusalén.

¹⁵ Laa'ex nekeye: “Xqak'e qib' sa' aatin rik'in li kamk, xqab'aanu jun sumwank rik'in li xna'ajeb' li kamenaq. Jo'kan naq sa' li kutan taachalq wi' li nimla rahilal, ink'a' tooxsach, xb'aan naq xootik'ti'ik re xkolb'al qib' ut xqamuq qib' sa' li b'alaq'il na'leb'”.

¹⁶ Jo'kan naq li Qaawa' kixye chi jo'ka'in: “K'ehomaq reetal naq aran Sión tink'ojob' jun li pek sik'b'il ru ut jwal loq'; a'anaq li xnimal ru pek ut rub'elankilaq li ochoch. Li k'ojk'o sa' xb'een a'an, ink'a' taawiib'anq xch'ool.

¹⁷ Li k'ulub'ej tink'e cho'q b'isleb' sa' li xxaqab'ankil Sión, ut li tiikil ch'oolej tink'e cho'q aj tuqub'anel ru”. Li saqb'ach taasachoq re chixjunil li tik'ti' li nekekol wi' eerib', ut li b'ut'iha' taapo'oq re li nekekawub'resi wi' eech'ool.

¹⁸ Taasachmanq xwankil li xk'eeb'al eerib' sa' aatin rik'in li kamk, ut li sumwank rik'in li xna'ajeb' li kamenaq taakanaaq chi maak'a' rajb'al. Naq taachalq li nimla rahilal, texputz'i.

¹⁹ Rajlal naq taak'ulunq, tolexsach. Wulaj wulaj taachalq cherahob'tesinkil chi q'eq ut chi kutan. Yal rik'in rab'inkil resil li rahilal a'an laa'ex parpotqex xb'aan leexiw.

²⁰ Kama'aq li wark chiru junaq ch'aat kach'in roq ut jun ch'ina isb' li ink'a' textz'ap chi us.

²¹ Li Qaawa' taayaloq jo' kixb'aanu sa' li tzuul Perasín, ut tixk'ut xjosq'il jo' naq kijosq'o'k sa' xtaq'ahil Gabahón, re naq tixb'aanu li xninqal xb'aanuhom: tixb'aanu chi tz'aqal re ru li xk'uub'ahom, us ta a'an q'axal ch'a'aj xtawb'al ru.

²² Jo'kan naq anaqwan mexse'ek chik, re naq ink'a' teetam li rahilal sa' eeb'een; xb'aan naq xwab'i naq li Qaawa', li Nimajwal Yos, tixk'e chi sache'k chixjunil li tenamit.

Li jaljookil aatin chirix laj k'alom

²³ Ab'ihomaq ut k'ehomaq reetal li waatin; ab'ihomaq chi us li ok we chi xyeeb'al:

²⁴ Laj k'alom, ma rajlal kutan tab'i' naxpikle malaj naxmuri li ch'och'?

²⁵ Naq ak xtuqub' ru li ch'och', naxhir riyajil li anis malaj li komiin; chirix chik a'an naraw li triiw chi tzol sa' li xna'aj ut naraw li seb'aad jo'wi' li ab'een chi junqre li ch'och'.

²⁶ Li xk'utuk li awk chiru ut li xtzolok re chi xb'aanunkil chi jo'kan a'an li Qaawa', li xYos.

²⁷ Xb'aan naq ink'a' nachiileek li anis chi moko nake'eek li komiin; chi che' b'an nateniik li anis ut chi jich'che' nach'oxleek li komiin.

²⁸ Na'isiik rix li triiw, ab'an moko toj re ta xke'b'al; na'isiik rix li triiw chi ink'a' najormank li ru.

²⁹ Jo'kan ajwi' naxb'aanu li Qaawa', li Nimajwal Yos: k'ajo' xchamal li xk'uub'ahom ut naxb'aanu chixjunil rik'in xseeb'al xk'a'uxl!