Isaías 24 - Q'eqchi BibleLi xraqb'a aatin li Qaawa' Yos 1 Ilomaq, li Qaawa' ok re chi xsachb'al li ruuchich'och': tixyamtesi, tixchiq'le ru ut tixcha'cha'i chixjunileb' li poyanam. 2 Juntaq'eet li rahilal te'xk'ul laj tij ut li tenamit, laj mun jo' ajwi' laj eechal re; li moos ixq jo' ajwi' laj eechal re; li nak'ayink ut li naloq'ok; li nato'onink ut li nak'ehok to'; li nak'asok ut li nak'ehok k'as. 3 Taasache'q chi junajwa li ruuchich'och', tik maak'a' chik tkanaaq chiru, xb'aan naq jo'kan xyehom li Qaawa'. 4 Ra rilb'al li ch'och' naq yo chi chaqik ru, li ruuchich'och' yo chi oso'k ut chi sachk; k'ajo' naq ra sa' xch'ool chixjunil li choxach'och'. 5 Xmuxe'k ru li ch'och' xb'aaneb' li poyanam, xb'aan naq ink'a' xe'xpaab' li chaq'rab', xe'xq'et b'an raatin li Qaawa' ut xe'xsach xwankil li loq'laj Sumwank. 6 Jo'kan naq li xmajewahom li Yos xchalk sa' xb'een li ruuchich'och', xsache'k ru chixjunil ut eb' li poyanam yookeb' chi k'uluk rahilal. Xb'aan li xmaa'usilaleb' yookeb' chi oso'k li tenamit ut yal wiib' oxib' aj chik xe'kanaak. 7 Xlajk li b'iin ut xe'chaqik li xtoonal li uub'; k'ajo' xrahil xch'ooleb' li sa xe'wank junxil. 8 Ink'a' chik neke'eek'ank eb' li wajb', ink'a' chik na'ab'iik xyaab' li aarp ut xraqe'k li xsahil xch'ooleb' li neke'ninq'ehik. 9 Maajun chik na'uk'ak b'iin naq yo li b'ichank, ut jwal k'a aj chik li uk'a' cho'q reheb' li neke'uk'ak. 10 Xjuk'mank li tenamit ut xkanaak chi po'lemil, saq tz'apink aj chik eb' li ochoch ut maajun chik naru chi ok chisa'. 11 Neke'yaab'ak li poyanam sa'atqeb' li b'e xb'aan xmajelal li b'iin; x'oso'k chixjunil li sahil ch'oolej ut xraqe'k li sahil wank sa' ruuchich'och'. 12 Junaatal xkanaak li tenamit, ut kok' taq much' xkanaak li okeb'aal. 13 Sa' chixjunileb' li tenamit li wankeb' sa' ruuchich'och' taak'ulmanq jo' naq nach'oxe'k ru li oliiw, malaj jo' naq nasakoniik ru li uub' sa' xraqik. 14 Eb' li te'kole'q te'xjap re xb'aan xsahil xch'ooleb' sa' xk'ab'a' li xnimal xloq'al li Qaawa', chalen chaq toj chire li palaw. 15 Jo'kan ajwi' sa' xjayal releb'l saq'e ut sa'eb' li tenamit wankeb' sa' sutha', taaterq'usiiq xk'ab'a' li Qaawa', li xYos laj Israel. 16 Sa' xkaaxukuutil li ruuchich'och' naqab'i li b'ichank: “Chinimaaq xloq'al li jwal tiik xch'ool”. A'ut laa'in xinye: “Toq'ob' xaq wu, toq'ob' xaq wu, xin'oso'k!”. Eb' laj b'alaq' yookeb' chi b'alaq'ik, ut k'ajo' li maa'usilal neke'xb'aanu! 17 Li xiwak, li jul ut li ra'al na'oyb'enink eere laa'ex li wankex sa' ruuchich'och'. 18 Li ani ink'a' taakamq xb'aan li xxiw toxt'ane'q sa' li jul; ut li taa'elq chaq sa' li jul toxt'ane'q sa' li ra'al. Taateeq'uuq li choxa ut taachalq chaq li b'ut'iha', ut te'chiq'chiq'iiq eb' li roqechal li ruuchich'och'. 19 Li ruuchich'och' taa'eek'asiiq sa' xna'aj, taapuk'e'q, taa'itz'e'q toj reetal kok'putz' taakanaaq. 20 Taktotq aj chik li ruuchich'och' jo' junaq kalajenaq, ut taat'uyleeq jo' na'uxk re li ab'. K'ajo' raalal li maak sa' xb'een: taat'ane'q ut ink'a' chik taawakliiq. 21 Sa' li kutan a'an li Qaawa' taaraqoq aatin sa' xb'eeneb' li wankeb' xwankil taqe'q sa' li choxa, ut arin taq'a, sa' xb'eeneb' li wankeb' xwankil sa' ruuchich'och'. 22 Tixch'utub', tixtuub' chixjunileb' ut tixtz'apeb' sa' tz'alam chiru k'iila chihab', ut moqon chik te'k'ehe'q sa' tojb'amaak. 23 Naq li Qaawa', li Nimajwal Yos, taa'awab'ejinq sa' li tzuul Sión ut Jerusalén, li po ut li saq'e te'q'oqyino'q ru ut eb' laj k'amol b'e te'ril li xloq'al li Qaawa'. |
Q'eqchi DC Bible © Bible Society in Guatemala, 2005.
Bible Society in Guatemala