Isaías 21 - Q'eqchi Bible

Xsachik Babilonia

¹ Resilal li rahilal tixk'ul li chaqich'och' wank chire li palaw: Jo' li kaqsut-iq' nanume'k Nejeb, jo'kan ajwi' yo chaq chi chalk li nimla rahilal sa' li chaqich'och', sa' li tenamit xiwajel ru.

² Q'axal xiwajel rilb'al li moy u xk'utb'esiik chiwu: laj b'alaq' naxyal xq'e chi b'alaq'ik ut laj sachonel yo chi sachok. Ayuqex chi yalok, ex aj Elam! Sutomaq li tenamit, ex aj Media! Maak'a' chik ilok toq'ob'aal u anaqwan.

³ Jo'kan naq naxiwak xsa' linsa', nachalje'k inrahilal jo' li ixq ok re chi alank, nasachk inna'leb' xb'aan xrahil linch'ool ut k'ajo' naq ninxiwak xb'aan li nawil.

⁴ Tik xsachk inna'leb' ut nachalk ke chiwix xb'aan linxiw; xiwajel aj chik cho'q we naq na'ewuuk ut ink'a' chik sa wankin naq na'ok li q'oqyink.

⁵ Ak xkawresiik li tzekemq, ak xhelmank li t'ikr chiru li meex, ak yo li wa'ak ut li uk'ak. Xaqlinqex chi yalok, ex aj jolominel, ut ji'omaq ru li ch'iich' nekekol wi' eerib'!

⁶ Xb'aan naq jo'ka'in kixye we li Qaawa': “Ayu ut xaqab' junaq aj k'aak'alehom re li tenamit li taayehoq resil chixjunil li k'aru taaril.

⁷ Wi taarileb' li b'eleb'aal ch'iich' kelonb'ileb' chaq xb'aan junq sumal chi kawaay, malaj taarileb' li winq yooqeb' chi chalk chirix b'uur malaj kameey, chixk'eeq reetal chi us”.

⁸ Ut laj k'aak'alenel kixjap re chi xyeeb'al: “Sa' linna'aj wankin rajlal kutan, at Qaawa', ut ninjor li q'oqyink chi k'aak'alenk arin.

⁹ We' chaq jun li b'eleb'aal ch'iich' kelonb'il chaq xb'aan jun sumal chi kawaay”, chan. Toja' naq jun chik li winq kixye: “X'oso'k, x'oso'k li tenamit Babilonia. Ut chixjunileb' li xjalam u li xyoseb' xlaje'puk'iik chiru ch'och'”, chan.

¹⁰ Ex intenamit, q'axal ra xek'ul jo' na'uxk re li triiw nayeq'iik re risinkil li rix. Li k'aru xwab'i rik'in li Nimajwal Yos, li xYos laj Israel, a'an ajwi' li xinnumsi chawu.

Li rahilal li tixk'ul Edom

¹¹ Resilal li rahilal tixk'ul li tenamit Edom: Jun li winq kixpatz' chaq we toj Seír: “At aj k'aak'alenel, jo'q'e honal wanko re li q'oqyink? At aj k'aak'alenel, jo'q'e honal wanko re li q'oqyink?”, chan.

¹² Ut laj k'aak'alenel kixye: “Ak saqewk re, ab'anan chalk wi' chik re li q'oqyink. Wi teeraj patz'ok, patz'onqex, ab'an sutq'inqex chaq wi' chik”.

Li rahilal li tixk'ul Arabia

¹³ Resilal li rahilal tixk'ul Arabia: Laa'ex aj Dedán li nekenumsi li q'oqyink sa'atqeb' li junesal na'ajej re Arabia,

¹⁴ elqex chaq chi xk'eeb'al ruk'a' li taachaqiq re. Laa'ex li wankex sa' xteepal Temá, elqex chaq chi xk'eeb'al xtzekemq li yo chi elelik.

¹⁵ Xb'aan naq yookeb' chi elelik chiru li kamk ut li nimla yalok, chiru li q'esnal ch'iich' ut li simaj li ak yo'oon wank.

¹⁶ Jo'ka'in xyehom we li Qaawa': “Sa' jun chihab', jo' xchihab' li nakutanib'k, taa'oso'q chixjunil li xloq'al Kedar.

¹⁷ Ut ink'a' chik k'iheb' laj Kedar te'kanaaq, li jwal kaweb' rib' chi kutuk rik'in simaj”, chan. A' li Qaawa', li xYos laj Israel, xyehok chi jo'kan.