Isaías 20 - Q'eqchi Bible

Asdod taa'eechaniiq

¹ Sa' jun kutan laj Sargón, awab'ej re Asiria, kixtaqla li xjolomileb' laj puub' aran Asdod, ut a'an kiyalok rik'in li tenamit ut kireechani.

² Toja' naq li Qaawa' ki'aatinak chi xtz'uumal re laj Isaías, ralal laj Amós, ut kixye re chi jo'ka'in: “Isi li q'es ruhil t'ikr li wank chawix ut isi ajwi' laaxaab'”, chan. Laj Isaías kixb'aanu chi jo'kan, ut kiwank chi maak'a' raq' ut chi maak'a' xxaab'.

³ Chirix chik a'an li Qaawa' kixye: “Laj Isaías, laj k'anjel chiwu, xwank chi maak'a' raq' chi moko xxaab' chiru oxib' chihab', a'an reetalil ut resilal cho'q reheb' laj Ejiipt ut eb' laj Etiopía.

⁴ Jo'kan ajwi' li awab'ej re Asiria tixchapeb' laj Ejiipt ut eb' laj Etiopía, a' yaal ma cheek malaj saajil poyanam, ut tixk'ameb' sa' jalanil tenamit chi maak'a'aq raq'eb' chi moko xxaab'eb', tik t'ust'uuqeb' chi junajwa, re xk'utb'al xxutaaneb'.

⁵ Eb' li poyanam te'sachq xch'ool ut te'xutaanaq xb'aaneb' laj Etiopía, li royb'enihomeb', ut xb'aaneb' laj Ejiipt, li xkawub' raj xch'ooleb'.

⁶ Chiruheb' li kutan a'an, eb' li poyanam li wankeb' chire li palaw sa' xteepal Filistea, te'xye: «Ilomaq chanru xkanaak li tenamit li kaw wi' li qach'ool, li xqapatz' wi' qatenq'ankil re raj tooxkol chiru li awab'ej re Asiria. Ut anaqwan chanru tookole'q laa'o?», cha'qeb'”.