Isaías 2 - Q'eqchi Bible

Li tz'aqal tuqtuukilal

¹ Laj Isaías, ralal laj Amós kiril li moy u a'in chirix li tixk'ul Judá ut Jerusalén:

² Chiruheb' li kutan chaalel li tzuul wan wi' li rochoch li Qaawa' taawakliiq chi nimaq xwankil sa' xb'eeneb' chixjunileb' li b'ool, ut q'axal nimaq xteram chiruheb' chixjunil li tzuul. Chixjunileb' li tenamit te'chalq aran;

³ k'ajo'aqeb' xk'ihal li poyanam te'chalq ut te'xye: “Kimqex ut taqe'qo sa' xtzuulul li Qaawa', sa' rochoch li xYos laj Jakob. A'an tixk'ut chiqu k'aru li rajom ut laa'o tqataaqe li b'e sik'b'il ru xb'aan”. Xb'aan naq aran Sión taa'elq chaq li chaq'rab', ut Jerusalén taachalq li raatin li Yos.

⁴ Li Qaawa' taaraqoq aatin sa' xb'eeneb' li tenamit ut a'anaq laj raqol aatin sa' xyanqeb' naab'al chi poyanam. Te'xsutq'isi eb' li q'esnal ch'iich' cho'q pikleb' ch'och', ut li xjutz' ch'iich'eb' te'kanaaq cho'q setleb' k'im. Eb' li tenamit ink'a' chik te'yaloq chirib'ileb' rib' chi moko te'xkawresi rib' re yalok.

⁵ Ex ralal xk'ajol laj Jakob, waklinqex ut b'eeqo sa' xkutan saqenk li Qaawa' Yos.

Xsachikeb' li neke'xnima rib'

⁶ At Qaawa', xatz'eqtaana laatenamit, a'aneb' li ralal xk'ajol laj Jakob, xb'aan naq k'ajo'eb' laj q'e ut eb' laj nawal sa' xyanqeb'; neke'xb'aanu jo'eb' laj Filistea ut neke'xk'am rib' sa' usilal rik'ineb' laj ab'l tenamit.

⁷ Xnujak chi oor ut plaat li xtenamiteb' ut maak'a' xraqb'al li rajlankil li xb'ihomaleb'; xe'tamk li xkawaayeb' ut eb' li b'eleb'aal ch'iich' re yalok.

⁸ Xnujak ajwi' li xna'ajeb' chi jalanil yos, ut eb' li poyanam neke'xloq'oni ru li jalam u xe'xpak' rik'in ruq'eb'.

⁹ Xe'xkub'si li xwankileb' ut xe'wiq'laak chiruheb' li jalanil yos. Jo'kan naq maakuyeb' xmaak, at Qaawa'.

¹⁰ Ch'ikomaq eerib' sa'eb' li ochoch pek, muqomaq eerib' sa'eb' li siwan re xkolb'al eerib' chiru xjosq'il li Qaawa' jo'wi' chiru li xlemtz'unkil li xloq'al, naq tolreek'asi li ch'och' sa' xna'aj.

¹¹ Taawulaq xkutankil naq eb' li neke'xnima rib' te'xkub'si li rilob'aal ut eb' li q'etq'et te'kub'siiq xwankil. Toja' naq ka'aj chik li Qaawa' taanimaaq ru.

¹² Sa' li kutan a'an li Nimajwal Yos taachalq re xkub'sinkileb' xwankil li neke'xnima rib', eb' li q'etq'et ut li ninqeb' xwankil;

¹³ taachalq sa' xb'eeneb' li yaw re Líbano li najt xterameb' ut sa' xb'eeneb' li ji re Basán,

¹⁴ sa' xb'een chixjunileb' li xninqal b'ool jo'wi' eb' li tzuul najteb' xteram,

¹⁵ sa' xb'eeneb' li kawub'resinb'il ochoch jo'wi' eb' li tz'ak li ink'a' naru taqe'k chiru,

¹⁶ sa' xb'eeneb' li jukub' re Tarsis ut sa' xb'een chixjunileb' li jukub' neke'k'amok chaab'il eechej.

^17-18 Eb' li neke'xnima rib' te'xkub'si li rilob'aal ut eb' li q'etq'et te'kub'siiq xwankil; chixjunileb' li jalanil yos te'juk'manq, ut ka'aj chik li Qaawa' taanimaaq ru sa' li kutan a'an.

¹⁹ Naq tol'elq li Qaawa' ut tolxrahob'tesi li ruuchich'och', eb' li poyanam te'xch'ik rib' sa'eb' li ochoch pek ut sa'eb' li siwan, re xkolb'al rib' chiru li xjosq'il li Qaawa' jo'wi' chiru li xlemtz'unkil li xloq'al, naq tolreek'asi li ch'och' sa' xna'aj.

²⁰ Sa' li kutan a'an te'xrumi eb' li jalanil yos chiruheb' li ch'o ut chiruheb' laj tz'uum xik', a'eb' li yos xe'xyiib' rik'in oor ut plaat re xloq'oninkileb' ru.

²¹ Eb' li poyanam te'xch'ik rib' sa'eb' li ochoch pek ut sa' xyanqeb' li saqoonak, re naq te'kole'q chiru li xjosq'il li Qaawa' jo'wi' chiru li xlemtz'unkil li xloq'al, naq tolreek'asi li ch'och' sa' xna'aj.

²² Jo'kan naq meek'ojob' chik eech'ool chirix li winq li yal jun k'amok ajwi' li xmusiq': k'aru na'ok wi' a'an?