Isaías 18 - Q'eqchi Bible

Li rahilal li te'xk'ul eb' laj Etiopía

¹ Ra chaalel sa' xb'een li tenamit li wank toj junpak'al eb' li nima' re Etiopía, b'arwi' na'ab'imank xyaab'eb' li k'iila suq;

² a'an li tenamit li nataqlank reheb' li xtaql chiru ha' sa' kok' jukub' yiib'anb'ileb' rik'in b'ayl. Ex taql, ayuqex chi junpaat wankeb' wi' li poyanam najteb' xteram ut ch'ina'us neke'ilok, li jwal xiwajel ruheb' chalen chaq junxil. Ayuqex rik'in li tenamit jwal kaweb' rib' chi yalok ut sutsuukeb' xb'aaneb' li nima'.

³ Chejunilex li wankex junsut junrub'el choxa, chex'iloq naq taataqsiiq li eetalil sa' xb'eeneb' li tzuul, chex'ab'inq naq taayaab'asimanq li pur.

⁴ Xb'aan naq jo'ka'in kixye we li Qaawa': “Maak'a' tinye ut yal tin'iloq chaq toj sa' linna'aj, jo'kaqin xtiqwal li saq'e sa' wa'leb', kama'aqin li xchu'ke sa' xq'ehil li q'olok.

⁵ Naq naraqe'k chi atz'umak li xtoonal li uub' ut naxtikib' uuchink chi toj maji' ajwi' naq'ano'k li ru, tinsaab'esi ru rik'in ch'iich', tinyok'i ut tinkuteb' chi najt eb' li ruq'.

⁶ Chixjunil taakanaaq cho'q reheb' li josq' aj xul sa'atqeb' li tzuultaq'a, cho'q xtib'eb' li so'sol ut eb' li josq' aj xul chiru li saq'ehil ut li hab'alq'e”.

⁷ Chiruheb' li kutan a'an taayeechi'imanq jun li mayej cho'q re li Nimajwal Yos xb'aaneb' li poyanam najteb' xteram ut ch'ina'us neke'ilok, li jwal xiwajel ruheb' chalen chaq junxil, a' li tenamit jwal kaweb' rib' chi yalok ut sutsuukeb' xb'aaneb' li nima'. Te'xk'am chaq xmayejeb' sa' li tzuul Sión b'arwi' naloq'oniik ru li Qaawa', li Nimajwal Yos.