Isaías 16 - Q'eqchi Bible

Li xtz'aamahomeb' laj Mohab

¹ Ex aj Mohab li wankex sa' li chaqich'och' re Selá, taqlahomaq eekarneer re li awab'ej li wan chaq Sión.

² Chanchaneb' li xik'anel xul li xe'isiik sa' li xsukeb', jo'kaneb' laj Mohab chi q'axonk junpak'al li nima' Arnón.

³ Neke'xye re li tenamit Judá: “K'uub'an chiqix ut sik' chanru toohaakol; choohaamuheela naq yooq xtiqwal li saq'e, jo' tawi' x'aak'ab'o'k ru li kutan. Kuupu rub'el laawankil eb' li yo raanilasinkileb' ut maaq'axtesiheb' li yookeb' chi elelik.

⁴ K'e rochochnaaleb' laj Mohab li xe'isiik chaq sa' li xtenamiteb'; k'uleb' aawik'in ut muqeb' chiruheb' laj sachonel”. Naq maajunaq chik aj rahob'tesinel ut akaq xraqe'k li raaxiik', naq ak x'elk laj tawasinel sa' li tenamit,

⁵ toja' naq jun sa' xyanqeb' li ralal xk'ajol laj David taa'ok cho'q awab'ej, taa'awab'ejinq rik'in chaab'ilal ut tiikilal, tixk'e xch'ool chi xsik'b'al li yaal ut seeb'aq xk'a'uxl chi raqok aatin jo' xk'ulub' li junjunq.

⁶ Ak qab'ihom resil li xq'etq'etil eb' laj Mohab: q'etq'eteb', josq' aj winqeb' ut neke'xnimob'resi li xwankileb' chi maak'a' rajb'al.

⁷ Jo'kan naq chixjunileb' laj Mohab te'yaab'aq chirix li xtenamiteb'; chi ra sa' xch'ooleb' te'jultiko'q reheb' li k'uluj yiib'anb'il rik'in uub' ke'xtzeka chaq aran Kir-Jaréset.

⁸ Xb'aan naq xchaqik li awimq re Jesbón, jo'kan ajwi' eb' li xna'aj li uub' re Sibmá: xe'yeq'iik xb'aaneb' li xyuwa'ileb' li tenamit, li xe'sachok re li chaab'il awimq li nawulak toj sa' li tenamit Jaser, nokox'elq toj sa' li chaqich'och' ut nokoxnume'q toj junpak'al li palaw.

⁹ Jo'kan naq ok we chi yaab'ak chirix li awimq re Sibmá ut Jaser; k'ajo'aq ajwi' li xya'al wu chirix Jesbón ut Elalé, xb'aan naq maak'a'aq chik li q'olok aran xb'aan li yalok.

¹⁰ Ink'a' chik taawanq li sahil ch'oolejil ut li b'ichank sa' xna'ajeb' li awimq; maak'a'aq chik li japok e xb'aan li ninq'ehik. Ink'a' chik taayatz'e'q li uub' re naq wanq b'iin ut maajun chik b'ich taa'ab'imanq aran.

¹¹ Jo'kan naq nachiq'lok xsa' linsa' xb'aan Mohab ut nayot'e'k li waanm chirix Kir-Jaréset.

¹² Us ta te'xtawasi rib'eb' laj Mohab chi taqsink toj sa' xb'eeneb' li tzuul ut te'tijoq aran jo' ajwi' sa' li xtijob'aaleb', maak'a' rajb'al naq te'tz'aamanq te'elajinq.

¹³ A'aneb' a'in li aatin kixye chaq li Qaawa' chirixeb' laj Mohab junxil.

¹⁴ Ut anaqwan li Qaawa' naxye chi jo'ka'in: “Sa' oxib' chihab', jo' xchihab' li nakutanib'k, eb' laj Mohab taasache'q li xwankileb'. Us ta jwal naab'aleb', ab'anan jun ch'ina ch'uuteb' aj chik te'kole'q ut maak'a' chik te'ok wi'”.