Isaías 15 - Q'eqchi Bible

Li rahilal li te'xk'ul eb' laj Mohab

¹ A'an a'in jun li esil chirix Mohab. Chiru jun q'oqyink ajwi' xsache'k li tenamit Ar ut Kir, ut ch'anch'o xkanaak li na'ajej Mohab.

² Eb' li wankeb' Dibón xkoheb' chi yaab'ak sa' li tijob'aal wank chi tzuul; ut eb' laj Mohab xyot'e'k xch'ooleb' xb'aan li nimla rahilal li xe'xk'ul li tenamit Nebo ut Mádaba. Chixjunileb' xe'xjo li rismal xjolomeb' ut li xmacheb'.

³ Xe'xk'e q'es ruhil t'ikr chirixeb'; sa'eb' li k'ayiil ut sa' xb'eeneb' li ochoch chixjunileb' jiiq' wi' xch'ooleb' chi yaab'ak.

⁴ Japjookeb' re laj Jesbón ut eb' laj Elalé: li xyaab' xkuxeb' na'ab'imank toj Yahás. Eb' laj puub' re Mohab neke'siksotk ajwi' xb'aaneb' xxiw ut natentotk li raanmeb'.

⁵ Naraho'k linch'ool chirix Mohab; eb' li wankeb' aran xkoheb' eelel toj Sohar, Eklat-Selisiyá. Naq yookeb' chi taqsink Luhit, k'ajo'eb' li xyaab', neke'ruk' wi' li xya'al ruheb' naq yookeb' chi xik Joronáhin.

⁶ Xchaqik li ha' li wank Nimrín, joxk' aj chik li ch'och' ut xchaqik li pim: maab'ar chik natawmank li raxpim.

⁷ Xe'xxok li k'a'aq re ru wank reheb', li xkanaak chiruheb', ut xe'xk'am chirixeb' toj junpak'al li xNima'il li Salche'.

⁸ Li yaab'ak xsutunk sa' chixjunil xteepal Mohab; li xq'oqeb' na'ab'imank toj Ekláhin ut toj Beher-Elín xwulak li xyaab'eb'.

⁹ Us ta ak nujenaq chi kik' li ha' wank Dimón, ab'an toj wank rahilal tintaqla chaq sa' xb'eeneb' laj Dimón: jun kaqkoj taachoyoq reheb' laj Mohab li xe'kole'k, ut tixnuq'eb' li toj wanqeb' sa' li na'ajej a'an.