Isaías 14 - Q'eqchi Bible

Xsutq'ijikeb' chaq laj Israel

¹ Naq li Qaawa' tixtoq'ob'a ru laj Jakob ut tixsik' wi' chik ru laj Israel, tixk'ojob'eb' wi' chik laj Israel sa' li xtenamiteb' ut eb' laj jalanil tenamit te'xjunaji rib' rik'ineb' li ralal xk'ajol laj Jakob.

² Naab'aleb' li tenamit te'ochb'eeninq reheb' re sutq'iik sa' li xna'ajeb', ut eb' laj Israel te'xchap eb' a'an cho'q aj k'anjel chiruheb' sa' li na'ajej k'eeb'il reheb' xb'aan li Qaawa'. Eb' li ke'numtaak sa' xb'eeneb' laj Israel junxil, a'aneb' chik li te'chape'q ut te'wanq rub'el xwankileb'.

Xse'enkil li awab'ej re Babilonia

³ Ex aj Israel, naq li Qaawa' texrisi chi munil, sa' li rahilal ut sa' li kawil k'anjel xextawasiik wi',

⁴ teeye li xsahil ru aatin a'in re xse'enkil li awab'ej re Babilonia: “Ilomaq chanru x'oso'k li josq' aj winq li xrahob'tesink qe. Ilomaq k'aru xkanaak wi' li xq'etq'etil.

⁵ Li Qaawa' xsach xwankileb' li ink'a' useb' xna'leb', xtoqi li xche'eb' laj rahob'tesinel,

⁶ li xe'tawasink reheb' li tenamit sa' josq'il ut ink'a' xe'ril xtoq'ob'aal ru eb' li poyanam, a'eb' li xe'numtaak sa' xb'eeneb' li tenamit chi maak'a'eb' xkuyum.

⁷ Anaqwan chixjunil li ruuchich'och' sa chik wankeb' ut sa' tuqtuukilal, ut neke'xjap reheb' chi b'ichank.

⁸ Eb' li saqichaj ut eb' li yaw re Líbano neke'saho'k xch'ool chawix ut neke'xye: «Chalen naq wankat sa' li muqleb'aal ink'a' chik yookeb' chi qasachb'al eb' laj sajol k'iche'».

⁹ Xe'sachk xch'ooleb' li kamenaq aab'aan ut xe'elk chaq chak'ulb'al sa' xb'alb'a. Sa' aak'ab'a' xe'ajk ru eb' li kamenaq, ut eb' li awab'ej rochb'eeneb' li wankeb' xwankil sa' ruuchich'och' xe'waklije'k.

¹⁰ Chi junaj xyaab' xkuxeb' chixjunileb' neke'xye aawe: «X'oso'k ajwi' laawankil laa'at, anaqwan juntaq'eeto chik qochb'eenat.

¹¹ Arin xole'kanaaq laaq'etq'etil ut li xyaab'eb' laa'aarp. Eb' li motzo' wankeb' cho'q ruuchil laach'aat ut laawisb' a'an junes xlukum ch'och'».

¹² “Chanru naq xatt'ane'k chaq sa' choxa, at xkaq chahimal li hik'e'k? Laa'at li xatnumtaak sa' xb'eeneb' li tenamit xatjilib'aak chik chiru ch'och'.

¹³ Laa'at li xaye sa' laach'ool: «Taanimanq inwankil toj sa' choxa; toj aran tink'ojob' chaq link'ojarib'aal, toj sa' xb'eeneb' li xchahim li Yos. Tink'ojlaaq sa' li na'ajej neke'xch'utub' wi' rib'eb' li yos, sa' xjayal chaq li releb'l iq'.

¹⁴ Tintaqe'q toj sa' xb'eeneb' li choql ut kama'aqin li Nimajwal Yos», chankat sa' laach'ool.

¹⁵ Ab'anan, relik chi yaal naq xatkute'k toj sa' xb'alb'a, toj sa' xchamal xna'ajeb' li kamenaq!

¹⁶ Eb' li neke'ilok aawe nakate'xka'ya, neke'sachk xch'ool chawilb'al ut neke'xye: «A'in li winq x'eek'asink re li ruuchich'och' sa' xna'aj ut chixjunileb' li tenamit neke'xiwak chiru.

¹⁷ A'in li xkanab'ank li ruuchich'och' chi junesal na'ajej, xsachok chixjunileb' li tenamit ut maajun sut xrisiheb' li tz'aptz'ookeb' sa' tz'alam».

¹⁸ Jo'k'ihaleb' li neke'awab'ejink sa' xb'eeneb' li tenamit yookeb' chi hilank chi wankeb' xloq'al ut li junjunq wank sa' li xmuqleb'aal.

¹⁹ Ab'anan laa'at ink'a' xatmuqe'k sa' laamuqleb'aal, jo' naq natz'eqe'k li mul jwal chu, kama' jun kamenaq q'aajenaq aj chik, sa' xyanqeb' li kamsinb'ileb' chi ch'iich', sa' li jul nujenaq chi pek.

²⁰ Laa'at ink'a' tatmuqe'q jo'eb' li awab'ej a'an, xb'aan naq xasach laana'aj ut xakamsiheb' laawech tenamitul. Eb' li ralal xk'ajoleb' laj b'aanuhom maa'usilal maajun chik taapatz'oq reheb'.

²¹ Kawresihomaq eerib' chi xkamsinkileb' li ralal xk'ajol xb'aan li xmaakeb' li xna' xyuwa'eb', re naq ink'a' chik te'wakliiq chi numtaak sa' xb'een li ruuchich'och' chi moko te'k'ojob'anq chik tenamit junsut junrub'el choxa”.

²² “Laa'in tinwakliiq chi xxik'b'al rilb'aleb' -chan li Nimajwal Yos- ut tinsach li xk'ab'a' Babilonia chi junajwa: tinsach ruheb' li ralal xk'ajol ut eb' li ri xmam.

²³ Tinsutq'isi li tenamit a'an cho'q xna'ajeb' li warom ut saab' ha'. Ut chanchan mesunb'il tinkanab' li na'ajej naq tinsach ru”, chan li Nimajwal Yos.

Roso'jikeb' laj Asiria

²⁴ Li Nimajwal Yos kixye sa' jurament: “Relik chi yaal naq taa'uxmanq li xink'oxla, ut li k'aru xinye taak'ulmanq.

²⁵ Tinsach ruheb' laj Asiria sa' lintenamit ut tinyeq'iheb' sa' woq sa'atqeb' lintzuul re naq te'xkanab' eerahob'tesinkil chi moko texxtawasiheb' chik”.

²⁶ A'an a'in li xink'uub' xb'aanunkil sa' li ruuchich'och', ut a'an li xinteneb' sa' xb'een chixjunileb' li tenamit.

²⁷ Wi li Nimajwal Yos xk'uub'ank re chi jo'kan, ani taaramoq chiru xb'aanunkil? Wi naxteleb' li ruq' A'an, ani taayehoq re naq tixjal li xk'a'uxl?

Xq'usb'aleb' laj Filistea

²⁸ Li chihab' kikamk wi' li awab'ej Ajás, li Qaawa' kixye li esil a'in:

²⁹ “Ex aj Filistea, misaho'k leech'ool naq xtoqe'k li xche' li xrahob'tesink eere; xb'aan naq sa' xyanq xmol junaq k'anti' taayo'laaq jun q'anb'olay, ut chirix a'an jun li xiwajel k'anti' taarupupiq.

³⁰ Toja' naq eb' linneb'a' te'wanq xtzekemq ut eb' li toq'ob'aal ruheb' sa chik te'wanq; a'ut leeralal eek'ajol te'kamq xb'aan li we'ej, ut wi wanq junaq li taakole'q, laa'in tinkamsi”.

³¹ Japomaq eere chi yaab'ak, ex tenamit aj Filistea, chexxiwaq chejunilex li wankex aran, xb'aan naq sa' xjayal chaq releb'l iq' yookeb' chi chalk k'iila o'q'ob' chi aj puub' kama' li sib', ut maajun nach'inank xch'ool sa' xyanqeb'.

³² K'aru taayeemanq reheb' li xtaql eb' laj Filistea li te'chalq qik'in? Taayeemanq reheb' naq li Qaawa' kik'ojob'ank re Sión ut aran te'xkol rib' li neb'a' wankeb' sa' li xtenamit li Yos.