Isaías 1 - Q'eqchi Bible

ISAÍAS I Li Yos naxjit li xtenamit

¹ Chiru chaq li xyu'ameb' laj Osías, laj Jotán, laj Ajás ut laj Esekiel, awab'ejeb' re Judá, laj Isaías, ralal laj Amós, kiril li moy u a'in chirix li tixk'ul Judá ut Jerusalén.

² Ab'ihomaq, ex choxach'och', a' li Qaawa' yo chi aatinak: “Xink'iiresiheb' li walal ink'ajol, toj reetal xe'winqo'k; ab'an eb' a'an xe'xq'etq'eti rib' chiwu.

³ Li b'ooyx naxnaw ru laj eechal re, ut li b'uur naxnaw b'ar nachalk li xtzekemq. A'ut laj Israel maak'a' naxnaw, maak'a' xna'leb' lintenamit”.

⁴ Toq'ob' eeru, ex aj maak, ex tenamit nujenaqex chi maa'usilal, ex aj yoob'anel ink'a' us; k'ajo' xyib'al ru leena'leb'! Xexnajto'k rik'in li Qaawa', xetz'eqtaana li xSantil Yos laj Israel ut xekanab' chi junajwa.

⁵ K'a'ut naq toj yookex chi xq'etq'etinkil eerib'? Ma toj teeraj naq texinrahob'tesi? Tiq'b'il chik leejolom ut tawajenaqex chi junwaakaj.

⁶ Chalen cheroq toj chejolom maak'a' chik eerusil: sak'b'ilkex, raxteninkex ut tiq'b'ilex, ut maajun nab'anok eere chi moko naxb'at leetiq'ilal; tik maajun nayalok xkotzb'al b'ayaq leerahilal.

⁷ Leena'aj xkanaak chi po'lemil ut eb' leetenamit yookeb' chi k'atk. Eb' li xik' neke'ilok eere a'aneb' chik neke'tzekank ru leerawimq. Nakirnak aj chik chixjunil jo' naq kisache'k ru li tenamit Sodoom.

⁸ Sión xkanaak xjunes jo' li kuukil ochoch sa' li awimq, jo' junaq tenamit sutsu xb'aaneb' li xik' neke'ilok re.

⁹ Wi ta li Nimajwal Yos ink'a' xooxkol wiib' oxib'aq, xookanaak raj kama' Sodoom, chanchano raj li tenamit Gomoor.

¹⁰ Ex jolomil re Sodoom, ab'ihomaq li raatin li Qaawa', ex aj Gomoor, k'ehomaq eech'ool chi rab'inkil li naxye li qaYos:

¹¹ “K'aru aj e we leek'iila mayej? Jwal xintitz'k xb'aan leekarneer nekek'at chiwu, ut ninyib' li xk'iila xeeb'ul leewakax. Li xkik'eleb' li wakax ut eb' li chib'aat ink'a' nawulak chiwu.

¹² Naq nokoleemayeja arin ut nekeyeq'i linneb'aal, ani xpatz'ok eere? Kanab'omaq xmuxb'al ru linneb'aal!

¹³ Mexk'amok chaq chik mayej li maak'a' na'ok wi'; ink'a' naxk'ul wu li xsib'el li k'ajpom. Ink'a' nawulak chiwu leenininq'e sa' xyo'lajik li po, sa' li hilob'aal kutan ut leech'utam, xb'aan naq muxb'il ru xb'aan leemaak.

¹⁴ Xik' chik nawil li xninq'ehinkil xyo'lajik li po nekeb'aanu laa'ex, ut ch'i'ch'i' naxb'aanu we leeninq'e; ink'a' chik ninkuy rilb'al chixjunil a'an.

¹⁵ Naq neketaqsi leeruq' chi tijok, nintz'ap li xnaq' wu re naq ink'a' texwil. Us ta neketiq roq leetij, laa'in ink'a' nawab'i, xb'aan naq oso'jenaq sa' kik' leeruq': k'ajo'eb' li poyanam kekamsi!

¹⁶ Tuqub'omaq leeyu'am, ch'ajob'resiiq eerib', isihomaq chiwu leemaa'usilal ut kanab'omaq xb'aanunkil li ink'a' us!

¹⁷ Tzolomaq xb'aanunkil li us, yalomaq eeq'e chi xsik'b'al li tiikilal, tenq'ahomaqeb' li rahob'tesinb'ileb', k'ehomaq li xk'ulub'eb' li neb'a'yox ut chekolaqeb' li xmalka'an!”.

¹⁸ “Kimqex ut aatinanqo -chan li Qaawa'-. Us ta kaqeb' leemaak kama' li kik' ut li kaqi b'on, ab'an saq chik te'kanaaq jo' li tuuxil isb' ut li ratz'amke.

¹⁹ Wi nikineepaab', teetzeka li chaab'il eechej na'elk sa' li ch'och';

²⁰ ab'an wi toj q'etq'etex, ch'olch'o naq texkamq chi ch'iich'. Laa'in li Qaawa' xinyehok eere a'in”.

Li xmaak Jerusalén

²¹ Li tenamit li kiwank sa' tiikilal junxil k'ajo' naq xmux rib', kama' junaq aj yumb'eet! Q'axal tiik xch'ooleb' laj Jerusalén naq ke'wank, ab'an anaqwan junes aj kamsineleb' ras riitz'in aj chik.

²² Junxil chanchanex li plaat ut anaqwan jo'kex aj chik li mul; chanchanex li chaab'il b'iin xb'enwa, ab'an anaqwan kama'ex aj chik li yal ha'.

²³ Q'axal q'etq'eteb' laj k'amol eeb'e ut wankeb' sa' amiiwil rik'ineb' laj elq'. Sa neke'ril li tuminaak li junjunq ut jwal neke'wulak chiru li k'uluk maatan. Ink'a' neke'xb'aanu usilal reheb' li neb'a'yox ut maak'a' neke'raj wi' li xch'a'ajkilal li xmalka'an.

²⁴ Jo'kan naq li Nimajwal Yos, li jwal kaw chi xkolb'al laj Israel, naxye chi jo'ka'in: “Tz'aqalaq! Laa'in twisi linjosq'il sa' xb'eeneb' li xik' neke'ilok we ut tin'eeqajunq sa' xb'eeneb'.

²⁵ Ok wi' chik we cherahob'tesinkil, texinch'ajob'resi jo' na'uxk re li plaat re risinkil eerik'in leemaa'usilal.

²⁶ Tink'eheb' aj k'amol eeb'e jo' ke'wank xb'enwa ut eb' laj raqol aatin jo'eb' li ke'wank najter q'e kutan. Toja' naq te'xye aawe: «Xtenamitul li tiikilal» ut «Tiik xch'oolil tenamit».

²⁷ Xb'aan lintiikilal tinkol Jerusalén jo'wi' eb' li te'raj sutq'iik wik'in.

²⁸ Ab'an eb' laj q'etoleb' aatin ut eb' laj maak te'xk'ul li raaxiik'; te'kamq chixjunileb' li neke'tz'eqtaanank re li Qaawa'.

²⁹ Relik chi yaal naq texxutaanaq xb'aan naq xeloq'oni li ji, ut texkaqo'q chi rilb'al li xna'ajeb' li uutz'u'uj li jwal xerahi ru.

³⁰ Chanchanaqex li jun toon chi ji natz'umaak li xxaq malaj jo' li uutz'u'uj naq maak'a' chik li ha'.

³¹ Li winq jwal kaw rib' kama'aq aj chik li k'im, ut li k'anjel naxb'aanu chanchanaq aj chik li chik'che': chi xkab'ichaleb' te'oso'q sa' xam ut maajun taaruhanq chi chupuk re li xam a'an”.