Hechos 6 - Q'eqchi Bible

Ke'xaqab'aak li Wuqub'

¹ Sa'eb' li kutan a'an eb' laj paab'anel ke'k'ihank rajlankil, ut eb' laj paab'anel griego raatinob'aaleb' ke'ok chi xwech'inkil rix eb' li neke'aatinak sa' hebreo xb'aan naq eb' li xmalka'an ink'a' sa neke'k'ule'k naq najek'imank li wa rajlal kutan.

² Toja' naq eb' li Kab'laju ke'xch'utub' li xk'ihaleb' laj paab'anel ut ke'xye: —Moko us ta naq tqakanab' xpuktesinkil li Raatin li Yos xb'aan li jek'ink tzekemq.

³ Ex was wiitz'in, sik'omaq sa' eeyanq wuqub'aq chi winq li chaab'il nayeemank chirixeb', nujenaqaqeb' chi Musiq'ej ut chi chaab'il na'leb', ut eb' a'an te'qaxaqab' chi xb'aanunkil li k'anjel a'in.

⁴ A'ut laa'o tqak'e qach'ool chi tijok ut chi k'anjelak chirix Raatin li Yos.

⁵ Chixjunil li jo'k'ihaleb' wankeb' aran, ke'xk'ulub'an xch'ool li na'leb' a'in, ut ke'xsik' ru laj Esteban, jun li winq nim xpaab'aal ut nujenaq chi Santil Musiq'ej, jo'wi' laj Felipe, laj Prókoro, laj Nikanor, laj Timón, laj Pármenas ut laj Nikolás aj Antiokía, a' li ki'ok sa' xyanqeb' laj Judiiy.

⁶ Chirix chik a'an ke'xaqab'aak chiruheb' li apóstol, ut eb' a'in ke'tijok ut ke'xk'e li ruq' sa' xb'eeneb'.

⁷ Li Raatin li Yos yo chi puktaak; li xk'ihaleb' laj paab'anel k'ajo' naq yo chi k'ihank aran Jerusalén. Jo'kan ajwi' naab'aleb' laj tij ke'xk'ul xch'ool li paab'ank.

Kichape'k laj Esteban

⁸ Li Qaawa' wank rik'in laj Esteban ut naxk'e xwankil chi xb'aanunkil xninqal ru eetalil ut sachb'ach'oolej sa' li tenamit.

⁹ Sa' jun kutan ke'xaqliik xkomoneb' laj ch'utleb'aal kab'l reheb' laj Liberto jo' nayeemank re; wankeb' ajwi' aj Sirene, aj Alejandría, aj Silisia ut aj Asia, ut ke'ok chi xwech'inkil laj Esteban.

¹⁰ Ab'anan ink'a' neke'xkuy xsumenkil li xnimal xk'a'uxl ut li Musiq'ej na'aatinak wi'.

¹¹ Toja' naq wankeb' winq ke'tuminaak ru chi xyeeb'al: “Xqab'i li winq a'in chi xmajewankil laj Moisés ut li Yos”.

¹² Chi jo'kan ke'xpoqoqi li tenamit, eb' li cheekel winq ut eb' laj tz'iib'; ke'xkut rib' sa' xb'een, ke'xchap ut ke'xk'am sa' li raqleb'aal aatin.

¹³ Toja' naq ke'xxaqab' aniheb' te'tik'ti'iq chirix: —Li winq a'in ink'a' naxkanab' xyeeb'al yib'ru chirix li santil na'ajej ut li Chaq'rab'.

¹⁴ Xb'aan naq xqab'i chi xyeeb'al naq li Jesus, a' laj Nazaret neke'xye, tixjuk' li na'ajej a'in ut tixjal ru li xe'toonil na'leb' kooxchaq'rab'i wi' laj Moisés, chankeb'.

¹⁵ Naq chixjunileb' li k'ojk'ookeb' sa' li raqleb'aal aatin ke'xka'ya laj Esteban, chanchan xnaq' ru junaq ánjel naq ke'ril.