Hechos 5 - Q'eqchi Bible

Laj Ananías ut lix Safira

¹ Jun li winq, aj Ananías xk'ab'a', rochb'een lix Safira li rixaqil, kixk'ayi jun xch'och',

² ab'anan, rochb'een ajwi' li rixaqil, kixjeb' li xtz'aq li ch'och' ut li xkomon kolxk'e chi roqeb' li apóstol.

³ Kiyehe'k re xb'aan laj Pedro: —At Ananías, chanru naq laj tza xreechani laach'ool? K'a'ut naq xatik'ti'i li Santil Musiq'ej rik'in xjeb'b'al xtz'aq laach'och'?

⁴ Ma maawa' tab'i' aawe naq toj maji' nakak'ayi; ut naq xak'ayi, ma ink'a' tab'i' xru xkanaak li xtz'aq cho'q aawe? K'a'ut naq x'alaak sa' aach'ool xb'aanunkil a'in? Moko winq ta xatik'ti'i, a' b'an li Yos.

⁵ Naq kirab'i li aatin a'in, laj Ananías kit'ane'k ut ki'elk xch'ool. Ut k'ajo' naq ke'chalk xxiweb' li ke'ab'ink re.

⁶ Toja' naq ke'xaqliik eb' li saaj al, ke'xlan sa' t'ikr ut koxe'xmuq chaq.

⁷ Oxib' honalaq tana chik, kol'elq li rixaqil chi ink'a' naxnaw li xk'ulmank.

⁸ Ut laj Pedro kixpatz' re: —Ye we, ma jo' a'in xtz'aq li ch'och' xek'ayi wi'? Kichaq'ok a'an: —Hehe', jo'kan, chan.

⁹ Ut laj Pedro kixye re: —K'a'ut naq xek'am chaq eerib' sa' aatin re xyalb'al rix li xMusiq' li Qaawa'? Il, we'keb' chaq chire kab'l li xe'muquk chaq re laab'eelom; ut anaqwan tate'xk'am ajwi' laa'at.

¹⁰ Tikto kit'ane'k lix Safira chi roq laj Pedro ut ki'elk xch'ool. Naq ke'ok eb' li saaj al, kamenaq chik naq koxe'xtaw; ke'risi ut koxe'xmuq chaq chi xk'atq li xb'eelom.

¹¹ Ut jun xnimal xxiweb' ki'ok sa' xch'ooleb' chixjunil li Iklees jo'wi' sa' xch'ooleb' chixjunileb' li ke'ab'ink re a'an.

Eb' li apóstol neke'xb'aanu sachb'ach'oolej

¹² Eb' li apóstol neke'xb'aanu naab'al xninqal ru eetalil ut sachb'ach'oolej sa' li tenamit. Chixjunileb' wankeb' sa' junajil sa' li xnumleb'aal laj Salomón,

¹³ ab'an maa'ani chik nachalk xch'ool chi ok sa' xyanqeb', us ta chaab'il neke'xye li tenamit chirixeb'.

¹⁴ Rajlal yo chi tamk li xk'ihaleb' li neke'paab'ank re li Qaawa', jo' winq jo' ixq:

¹⁵ neke'xk'ameb' li yaj sa'atqeb' li xaalib'e ut neke'xk'eheb' sa' ch'aat jo'wi' sa' kok' warib'aal re naq, jo'q'e taanume'q laj Pedro, ka'aj taxaq li xmu chimuheelanq re junjunqaq.

¹⁶ Neke'wulak ajwi' naab'aleb' wankeb' sa'atqeb' li tenamit nach' rik'in Jerusalén: neke'xk'amatq chaq eb' li xyaj ut li tawasinb'ileb' xb'aaneb' li tz'ajn aj musiq'ej, ut chixjunileb' nalaje'k'iraak.

Eb' li apóstol ra ke'xk'ul sa' xk'ab'a' li Jesus

¹⁷ Toja' naq kixaqliik li xyuwa'il aj tij rochb'een chixjunileb' li xkomon, a'aneb' laj Saduseey,

¹⁸ ke'xchap eb' li apóstol xb'aan xkaqaleb' xch'ool ut ke'xk'eheb' sa' xtz'alam li tenamit.

¹⁹ Ab'an li x'angel li Qaawa' kixte re li tz'alam chiru q'oqyink, kirisiheb' ut kixye:

²⁰ “Ayuqex, ut naq wanqex sa' rochoch li Yos, seeraq'inqex chi us rik'ineb' li tenamit chirix li Yu'am a'in”.

²¹ Eb' li apóstol ke'xpaab' a'an: toj hik'ho koxe'okaq sa' rochoch li Yos ut ke'xtikib' xtzolb'aleb' li tenamit. Naq kiwulak li xyuwa'il aj tij ut eb' li rochb'een, ke'xch'utub' li xninqaleb' ru aj raqol aatin ut chixjunil li xcheekel winqilaleb' laj Israel, ut ke'xtaqla xsik'b'aleb' sa' tz'alam re naq te'k'ame'q chaq.

²² Ab'anan, naq eb' li xtaql ke'wulak sa' tz'alam, ink'a' ke'xtaweb' aran; jo'kan naq ke'sutq'iik chi xyeeb'al resil:

²³ —Xqataw li tz'alam tz'aptz'o chi kaw ut eb' laj k'aak'alenel xaqxookeb' chire rokeb'aal; ab'an, naq xqate li tz'alam, maa'ani chik xqataw chisa', chankeb'.

²⁴ Naq ke'rab'i a'in, laj jolominel reheb' laj k'aak'alenel sa' rochoch li Yos ut eb' li xb'eenil aj tij ke'sachk xch'ool chi xk'oxlankil k'aru xyaalal chixjunil a'an.

²⁵ Toja' naq kichalk jun li winq chi xyeeb'al reheb': —Ab'ihomaq: eb' li winq xek'eheb' sa' tz'alam wankeb' anaqwan sa' rochoch li Yos, yookeb' chi xtzolb'aleb' li tenamit.

²⁶ Tikto koho laj jolominel reheb' laj k'aak'alenel rochb'eeneb' laj tenq' re, ut sa' usilal kixk'ameb' chaq li apóstol xb'aan xxiweb' chiruheb' li tenamit, re naq ink'a' te'teniiq chaq chi pek.

²⁷ Ke'oksiik ut ke'xaqab'aak chiruheb' li xninqaleb' ru aj raqol aatin. Ut li xyuwa'il aj tij kixpatz' reheb':

²⁸ —Ma ink'a' tab'i' xexqachaq'rab'i chi kaw naq tik ink'a' teetzoleb' li tenamit sa' li k'ab'a'ej a'an? Ut laa'ex xenujob'resi Jerusalén rik'in leek'utum ut teeraj xteneb'ankil sa' qab'een li xkik'el li winq a'an, chan reheb'.

²⁹ Kichaq'ok laj Pedro jo'wi' eb' li apóstol, ut ke'xye: —Xb'een xb'een tento xpaab'ankil li Yos, ut ink'a' eb' li winq.

³⁰ Li xYos eb' li qana' qayuwa' kixwaklesi chi yo'yo li Jesus li kekamsi laa'ex naq kechirib' chiru jun che'.

³¹ A'an li kitaqsiik xb'aan li Yos toj sa' xnim uq' cho'q aj jolominel ut aj kolonel, re xk'eeb'al reheb' laj Israel li yot'b'ach'oolej jalb'ak'a'uxl jo'wi' li xkuyb'al xsachb'aleb' li xmaak.

³² Laa'o qilom chixjunil a'in ut nokoo'aatinak chirix; jo'kan ajwi' li Santil Musiq'ej li xk'ehe'k xb'aan li Yos reheb' li neke'paab'ank re.

³³ Naq ke'rab'i a'in, k'ajo' naq ke'josq'o'k, te'raj raj xkamsinkileb'.

Laj Gamaliel

³⁴ Toja' naq jun aj pariseey, aj Gamaliel xk'ab'a', aj nahol Chaq'rab' ut oxloq'inb'il xb'aaneb' chixjunil li tenamit, kixaqliik sa' li raqleb'aal aatin ut kixtaqla naq che'isiiq jun k'amokaq eb' li apóstol chirix kab'l,

³⁵ kixye reheb': —Ex aj Israel, ilomaq chi us k'aru teeb'aanu reheb' li winq a'in.

³⁶ Xb'aan naq rub'elaj eb' li kutan a'in kixaqliik laj Tewdas li nim xwankil naq naxye rib', ut ke'okenk chirix jun o'q'ob' tana chi winq. Ab'an kikamsiik, ut chixjunileb' li ke'taaqenk re ke'xcha'cha'i rib'eb' ut ke'oso'k yal chi jo'kan.

³⁷ Moqon chik, naq ki'uxk rajlankileb' li tenamit, kixaqliik laj Judas aj Galilea ut naab'al li tenamit kixk'ameb' chirix. Ki'oso'k ajwi' a'an, ut chixjunileb' li ke'taaqenk re ke'xcha'cha'i rib'eb'.

³⁸ Tinye ut eere anaqwan: Meech'ik eerib' rik'ineb' li winq a'in ut kanab'omaqeb'. Xb'aan naq, wi li na'leb' malaj li k'anjel a'in reheb' li winq, taasachq;

³⁹ ab'an wi re li Yos, ink'a' texruuq chi xsachb'aleb'. Mare anchal yookex chi xch'a'ajkinkil li Yos. Ut ke'xk'ulub'an xch'ooleb' li raatin.

⁴⁰ Toja' naq ke'xb'oq wi' chik eb' li apóstol ut naq ak xe'xrapeb' chi tz'uum, ke'xchaq'rab'iheb' naq me'aatinak sa' xk'ab'a' li Jesus. Ut ke'rach'ab'eb'.

⁴¹ Eb' li apóstol ke'elk sa' li raqleb'aal aatin chi saheb' sa' xch'ool rik'in naq ke'k'ehe'k chi tz'eqtaanaak sa' xk'ab'a' li Jesus.

⁴² Ut maajun kutan neke'xkanab' xtzolb'aleb' li tenamit jo'wi' xyeeb'al li xChaab'il Esil li Kristo Jesus sa' rochoch li Yos ut sa'atqeb' li kab'l.