Hechos 21 - Q'eqchi Bible

Laj Pablo kitaqe'k Jerusalén

¹ Naq kiqachaq'rab'i qib' rik'ineb', koo'ok sa' li jukub' ut kooho chi tiik toj koowulak Kos; sa' li kutan jun chik koowulak Rodas ut chirix chik a'an Pátara.

² Aran kiqataw jun li jukub' ak xik re Fenicia; koo'ok chisa' ut kooho.

³ Naq koowulak sa' xka'yab'aal Chipre, kiqakanab' li na'ajej a'an sa' qatz'e, yooko chi xik sa' xjayal Siria toj koxooxaqliiq Tiro, xb'aan naq aran li jukub' tento toxkanab' li riiq.

⁴ Sa' li tenamit a'an kiqataweb' laj paab'anel; jo'kan naq kookanaak wuqub' kutan rik'ineb'. Ut eb' a'an eek'asinb'ileb' xb'aan li Musiq'ej ke'xye re laj Pablo naq mitaqe'k Jerusalén.

⁵ Ab'anan laa'o, naq ke'nume'k eb' li kutan a'an, koo'elk ut kiqachap qab'e. Chixjunileb' ke'ochb'eenink chaq qe toj chirix li tenamit rochb'eeneb' li rixaqil ut eb' li xkok'al. Chire li palaw koowiq'laak ut kootijok.

⁶ Chirix chik a'an kiqachaq'rab'i qib': laa'o kootaqe'k sa' li jukub' ut eb' a'an ke'sutq'iik sa' rochocheb'.

⁷ Koo'elk Tiro ut koxooxaqliiq Tolemaida, ut chi jo'kan kiraqe'k li qab'eenik chiru ha'. Kiqak'e xsahilaleb' xch'ool laj paab'anel ut kookanaak jun kutan rik'ineb'.

⁸ Sa' li kutan jun chik koo'elk aran ut koowulak Cesarea; koxoo'okaq sa' rochoch laj Felipe, laj yehol Chaab'il Esilal, a'an jun reheb' li Wuqub', ut koohilank rik'in.

⁹ Laj Felipe wank kaahib'eb' xrab'in toj tuq'ixqeb', neke'aatinak jo' propeet.

¹⁰ Ak k'iila kutankaq qokik aran kikub'e chaq Judea jun li propeet, aj Agabo xk'ab'a'.

¹¹ A'an kijilok chi qak'atq, kixchap li xk'aamal xsa' laj Pablo ut kixb'ak' rib' jo' li roq ut li ruq'; toja' naq kixye: —A'in naxye li Santil Musiq'ej: Jo'ka'in naq taab'ak'iiq li winq aj eechal re li k'aamalsa' a'in xb'aaneb' laj Judiiy aran Jerusalén, ut taaq'axtesiiq sa' ruq'eb' li junch'ol chik.

¹² Naq kiqab'i a'in, laa'o ut eb' laj aran kiqatz'aama chiru laj Pablo naq mitaqe'k Jerusalén.

¹³ Toja' naq kichaq'ok laj Pablo: —K'a'ut naq yookex chi yaab'ak ut chi xk'eeb'al xrahil inch'ool? Relik chi yaal naq yo'oon wankin moko ka'aj ta wi' chi b'ak'e'k, chi kamk aj b'an wi' aran Jerusalén sa' xk'ab'a' li Qaawa' Jesus, chan.

¹⁴ Ab'anan laa'o ink'a' kooruhank chi xjalb'al xk'a'uxl; jo'kan naq kiqakanab' relajinkil ru ut kiqaye: —Chi'uxq ta li naraj li Qaawa'.

Laj Pablo kiwulak aran Jerusalén

¹⁵ Chirixeb' li kutan a'in kiqakawresi qib' ut kootaqe'k Jerusalén.

¹⁶ Wankeb' ajwi' aj paab'anel aj Cesarea koheb' chiqix ut koohe'xk'am sa' rochoch jun aj Chipre, aj Nasón xk'ab'a', najter aj paab'anel. Rik'in a'an tento toohilanq.

¹⁷ Naq koowulak Jerusalén, eb' laj paab'anel koohe'xk'ul chi saheb' sa' xch'ool.

¹⁸ Sa' li kutan jun chik chiqajunilo qochb'een laj Pablo koxqula'ani chaq laj Santiago; ke'ch'utlaak ajwi' aran chixjunileb' li cheekel winq.

¹⁹ Laj Pablo kixk'eheb' xsahil xch'ool ut ki'ok chi xseeraq'inkil chi xjunjunqal chixjunil li kixb'aanu li Yos sa' xyanqeb' li maawa'eb' aj Judiiy sa' xk'ab'a' li xk'anjel.

²⁰ Ut eb' a'an, naq ke'rab'i, ke'ok chi xnimankil ru li Yos ut ke'xye re laj Pablo: —Xawil, at qiitz'in, jarub' mil chi aj Judiiy xe'ok chi paab'ank, ut chixjunileb' a'an toj kaweb' xch'ool chirix xchaq'rab' laj Moisés.

²¹ Anaqwan xe'rab'i aawesil naq nakatzoleb' len chixjunileb' laj Judiiy li wankeb' sa' xyanqeb' li junch'ol chik naq che'risi rib' sa' xchaq'rab' laj Moisés. Nakaye len naq ink'a' te'xb'aanu li sirkunsisyon reheb' li ralal xk'ajoleb' chi moko te'xyu'ami li tzolb'ileb' wi' junxil.

²² Jo'kan utan, k'aru tqab'aanu? Xb'aan naq ch'olch'o naq taa'ab'imanq resil laak'ulunik.

²³ Naqatz'aama usilal, b'aanu li tqaye aawe: Wankeb' sa' qayanq kaahib' chi winq li tento sa' xb'eeneb' xb'aanunkil li k'aru xe'xyeechi'i re li Qaawa' sa' jurament.

²⁴ K'ameb' chawix, ch'ajob'resi aawib' aawochb'eeneb' ut tojon chirixeb', re naq te'ruhanq chi xt'ojob'ankil li xjolomeb'. Chi jo'kan chixjunileb' te'xtaw ru naq moko yaal ta li xe'rab'i chawix, ut te'xk'e reetal naq laa'at ajwi' aj paab'anelat re li Chaq'rab'.

²⁵ A'ut chirixeb' li maawa'eb' aj Judiiy li xe'ok chi paab'ank, laa'o xqak'uub' ut xqatz'iib'a naq che'xkolaq rib' chiru li tzekemq mayejanb'il chiruheb' li jalanil yos, chiru li kik' ut chiruheb' li yatz'b'il xul. Ut ink'a' te'ko'b'eetaq te'yumb'eetaq.

²⁶ Toja' naq laj Pablo kixk'ameb' li winq a'an chirix ut, sa' li kutan jun chik, koxxch'ajob'resi rib' rochb'eeneb' ut ki'ok sa' rochoch li Yos re xyeeb'al xtz'aqlojik xkutankileb' li ch'ajob'resij ib', naq tento xb'aanunkil li mayejak chirix li junjunq.

Kichape'k laj Pablo

²⁷ Raqe'kaq re li wuqub' kutan, eb' laj Judiiy chalenaqeb' chaq Asia ke'ril laj Pablo sa' rochoch li Yos; jo'kan naq ke'xpoqoqi chixjunil li tenamit, ke'xchap li apóstol

²⁸ ut ke'xjap re chi xyeeb'al: “Ex aj Israel, chooheetenq'a! A'an a'in li winq li naxtzoleb' chixjunil yalaq b'ar naq tento xtz'eqtaanankil li qatenamit, jo' ajwi' li xChaq'rab' laj Moisés ut li na'ajej a'in. Ut anaqwan kiroksiheb' ajwi' laj Griego sa' rochoch li Yos ut kixmux xloq'al li santil na'ajej a'in”.

²⁹ Xb'aan naq rub'elaj a'an ke'ril laj Trófimo aj Éfeso rochb'eeninkil laj Pablo sa' li tenamit, ut ke'xk'oxla naq a' laj Pablo ki'oksink re sa' rochoch li Yos.

³⁰ Toja' naq sa' chixjunil Jerusalén kiwank poqoqij ib' ut yalaq b'ar kilaje'chalk li poyanam. Ke'xchap laj Pablo, ke'xkeleli chirix rochoch li Yos ut tikto ke'xtz'ap li okeb'aal.

³¹ Okeb' raj re chi xkamsinkil naq kiyehe'k chaq resil re li xjolomileb' laj puub': “Wank mululij ib' sa' chixjunil Jerusalén”, chankeb'.

³² Tikto laj jolominel kixk'ameb' laj puub' ut eb' laj k'amol b'e chirix, ut kikub'eek sa' aanil wankeb' wi' li tenamit; ut eb' a'an, naq ke'ril laj jolominel ut eb' laj puub', ke'xkanab' xsak'b'al laj Pablo.

³³ Toja' naq li xjolomileb' laj puub' kinach'ok, kixchap li apóstol ut kixye naq chib'ak'e'q rik'in wiib' chi kareen; ut kixtikib' xpatz'b'al ani a'an ut k'aru xb'aanu.

³⁴ A'ut li tenamit jalan jalanq japjookeb' re chi xyeeb'al, ut laj jolominel tik ink'a' kiruuk xtawb'al xyaalal li xk'ulmank, xb'aan li mululij ib'. Jo'kan naq kixtaqla naq chik'ame'q laj Pablo sa' li wartel.

³⁵ Naq kiwulak laj Pablo sa' li taqleb'aal, paqpo xb'aaneb' laj puub' naq kik'ame'k, xb'aan naq k'ajo' naq yookeb' chi tikisink li wankeb' aran,

³⁶ ut chixjunileb' li poyanam yookeb' chi xik chirix japjookeb' re chi xyeeb'al: “Kamsi a'an!”.

³⁷ Okeb' raj re chi roksinkil sa' li wartel naq kixye laj Pablo re li xjolomileb' laj puub': —Ma truuq tinye jun t'orolaq li waatin aawe? Kichaq'ok a'an ut kixye: —Chanru nakanaw aatinak sa' aatinob'aal griego?

³⁸ Ma maawa'at laa'at laj Ejiipt li maji' k'iila kutan anaqwan kixpo' xch'ooleb' li kaahib' mil chi winq aj elq'eb' ut kixk'ameb' sa' li chaqich'och'?

³⁹ Kixye laj Pablo: —Laa'in aj Judiiy, yo'lajenaqin Tarso, sa' jun tenamit xteepal Silisia nawb'il chi us. Nintz'aama chawu naq chinaakanab' chi raatinankileb' li tenamit.

⁴⁰ Kikanab'aak chi aatinak, ut laj Pablo, xaqxo sa' li taqleb'aal, kixtaqsi li ruq' re naq me'choqink chik li tenamit. Naq ch'anaamil ke'kanaak, laj Pablo ki'ok chi aatinak sa' aatinob'aal hebreo ut kixye reheb':