Hechos 19 - Q'eqchi Bible

Laj Pablo aran Éfeso

¹ Naq laj Apolo toj wan chaq Korinto, laj Pablo kinume'k sa'eb' li na'ajej wankeb' chi tzuul, ut kiwulak Éfeso. Wankeb' aj paab'anel kixtaweb' aran, ut kixpatz' reheb':

² —Ma eek'ulum li Santil Musiq'ej naq xex'ok chi paab'ank? chan reheb'. Ut eb' a'an ke'xye: —Chi moko qab'ihom resil naq wank ta li Santil Musiq'ej.

³ Toja' naq kixpatz' reheb': —K'a' pe' chi kub'iha'il xek'ul? Ke'xsume: —A' li kub'iha' jo' kixk'ut laj Jwan, chankeb'.

⁴ Toja' naq laj Pablo kixye: —Laj Jwan kixkub'si xha' li ke'xyot' xch'ool ke'xjal xk'a'uxl, ut kixye reheb' li tenamit naq che'xpaab'aq li taachalq chirix, a' li Jesus.

⁵ Naq ke'rab'i a'an, ke'kub'siik xha' sa' xk'ab'a' li Qaawa' Jesus.

⁶ Ut naq laj Pablo kixk'e li ruq' sa' xb'eeneb', kichalk li Santil Musiq'ej sa' xb'eeneb' ut ke'ok chi aatinak sa' jalan jalanq aatinob'aal, jo'eb' li propeet.

⁷ Wankeb' tana kab'laju chi winq sa' chixjunil.

Xk'ojlajik li Iklees aran Éfeso

⁸ Kox'okaq laj Pablo sa' li ch'utleb'aal kab'l ut kaw xch'ool naq ki'aatinak chiru oxib' po; naseeraq'ik rik'ineb' chirix li xnimajwal awab'ejihom li Yos ut naxyal xq'unb'esinkileb'.

⁹ Ab'anan wankeb' li ke'kawuuk xch'ool; ink'a' ke'raj paab'ank ut ke'ok chi xyeeb'al chiruheb' li poyanam yib' aj na'leb' chirix li xB'e li Qaawa'; jo'kan naq laj Pablo kixkanab'eb'. Kixjek'eb' laj paab'anel rik'ineb' laj ch'utleb'aal kab'l ut rajlal kutan naseeraq'ik rik'ineb' sa' li xtzoleb'aal kab'l laj Tirano.

¹⁰ A'an ki'uxmank chiru wiib' chihab'; jo'kan naq chixjunileb' li wankatqeb' Asia, jo' aj Judiiy jo' ajwi' aj Griego, ke'rab'i li Raatin li Qaawa'.

Eb' li ralal xk'ajol laj Esceva

¹¹ Li Yos nalajxb'aanu xninqal sachb'ach'oolej rik'in ruq' laj Pablo:

¹² ka'ajwi' neke'xnumsi sa' xb'eeneb' li yaj li t'ikr malaj li sut naroksi laj Pablo, neke'k'iraak eb' li yaj, ut eb' li maa'us aj musiq'ej nalaje'elk rik'ineb'.

¹³ Wankeb' aj Judiiy neke'xb'eeni rib' chi risinkilatq eb' laj tza, ut ke'xyal ajwi' xpatz'b'al xk'ab'a' li Qaawa' Jesus sa' xb'eeneb' li wankeb' maa'usej musiq'ej rik'ineb': “Sa' xk'ab'a' li Jesus li napuktesiik resil xb'aan laj Pablo ninye eere: Elenqex”, chankeb'.

¹⁴ Eb' li neke'b'aanunk re a'in a'aneb' li wuqub' chi ralal jun li winq aj judiiy, aj Esceva xk'ab'a', xyuwa'ileb' laj tij.

¹⁵ Ab'anan li maa'us aj musiq'ej kichaq'ok chi jo'ka'in: “Li Jesus ninnaw ru, ut ninnaw ajwi' ani laj Pablo; a'ut laa'ex, anihex?”, chan reheb'.

¹⁶ Li winq eechaninb'il xb'aan li maa'us aj musiq'ej kixkut rib' sa' xb'eeneb', kixq'ax ruheb' chixjunil ut k'ajo' xmetz'ew naq kinumtaak sa' xb'eeneb': jo'kan naq ke'elelik sa' li kab'l a'an chi t'ust'u ut xiikil xtiq'ilaleb'.

¹⁷ Naq kinawmank a'an xb'aaneb' chixjunileb' laj Judiiy ut eb' laj Griego li wankeb' Éfeso, chixjunileb' a'an ke'chalk xxiw: “Nim xwankil li Qaawa' Jesus”, chankeb'.

¹⁸ Naab'aleb' sa' xyanqeb' li okenaqeb' chi paab'ank ke'chalk chi xxootoninkil li xmaakeb' ut chi xch'olob'ankil li ink'a' us ke'xb'aanu;

¹⁹ ut naab'aleb' li ke'tuulak ke'xch'utub' li xhuheb' ut ke'xk'at chiruheb' chixjunil. Ke'xb'ir rix li xtz'aq ut ke'xk'e reetal naq a'an lajeeb' roxk'aal mil chi tumin.

²⁰ Jo'ka'in naq li Raatin li Qaawa' yo chi pukank ut chi xchapb'al xxe' chi us.

Li mululij ib' aran Éfeso

²¹ Naq kiraqe'k chixjunil a'an, laj Pablo kixk'uub' xxikik Jerusalén, toxnumje'q Macedonia ut Akaya: “Xb'enwa tinxik Jerusalén, moqon tento ajwi' toxwil chaq Roma”, chan sa' xch'ool.

²² Ut kixtaqlaheb' aran Macedonia wiib' aj tenq' re, a' laj Timoteo ut laj Erasto. Ut laj Pablo toj kikanaak kach'inaq chik Asia.

²³ Sa'eb' li kutan a'an makach'in li mululij ib' kitiklaak sa' xk'ab'a' li xB'e li Qaawa'.

²⁴ Kiwank aran Éfeso jun aj tenol plaat, aj Demetrio xk'ab'a', li nayiib'ank re xkok' ochoch lix Artemisa rik'in plaat; ut chi jo'kan naab'al li tumin na'ok cho'q reheb' li rech aj k'anjelil.

²⁵ Laj Demetrio kixch'utub'eb' a'an jo' ajwi' chixjunileb' li neke'xk'anjela li plaat, ut kixye reheb': “Ex inkomon, laa'ex nekenaw naq rik'in li k'anjel a'in naqataw qatumin;

²⁶ ab'anan yookex chi rilb'al ut chi rab'inkil resil naq moko ka'aj ta wi' arin Éfeso, sa' aj b'an wi' naab'aleb' chi tenamit, kach'in chik maa chixjunil Asia, laj Pablo a'in naxq'unb'esi ut naxpo' xch'ooleb' naab'al chi winq ut ixq, rik'in xyeeb'al naq maawa' yoseb' li neke'yiib'aak rik'in uq'ej.

²⁷ Ut a'an ch'a'aj cho'q qe: moko ka'aj ta wi' oso'k re li qak'anjel, taakanaaq aj b'an wi' chi maak'a' aj e li rochoch lix Artemisa, li xnimal ru qayos, ut taasachmanq xloq'al li neke'xloq'oni chixjunileb' laj Asia jo'wi' chixjunil li ruuchich'och'”.

²⁸ Naq ke'rab'i a'an, k'ajo' naq ke'josq'o'k ut ke'xjap re chi xyeeb'al: “Nim xwankil lix Artemisa, xyoseb' laj Éfeso!”.

²⁹ Li tenamit q'axal ke'xtzukle rib' li xk'a'uxeb' ut jun xikikeb' sa' li teatro, yookeb' chi xkelelinkil laj Gayo ut laj Aristarko, eb' a'in aj Macedonia, rochb'eeneb' laj Pablo.

³⁰ Laj Pablo kiraj raj ok ut xk'utb'al rib' chiruheb' li tenamit, ab'an kirame'k chiru xb'aaneb' laj paab'anel.

³¹ Wankeb' ajwi' ramiiw sa' xyanqeb' li wankeb' xwankil aran Asia, ut eb' a'an ke'xtaqla xtz'aamankil chiru naq ink'a' taaxik sa' li teatro.

³² Makach'in li poqoqij ib' kiwank sa' xyanqeb' li ke'ch'utlaak, jalan jalanq japjookeb' re chi xyeeb'al, ut q'axal naab'aleb' li ink'a' neke'xnaw k'a' ta wi' ru xyaalal li ke'xch'utub' wi' rib'eb'.

³³ Wankeb' ajwi' sa' xyanqeb' li poyanam li ke'takchi'ink re laj Alejandro, a' li ke'xtiikisi chi uub'ej eb' laj Judiiy. Toja' naq laj Alejandro kixtaqsi li ruq' re naq me'choqink chik xb'aan naq taaraj aatinak rik'in li tenamit.

³⁴ Ab'an naq ke'xnaw naq a'an aj judiiy, chixjunileb' ke'xjap re chi junajeb' xyaab' xkux chiru tana wiib' honal: “Nim xwankil lix Artemisa, xyoseb' laj Éfeso!”, chankeb'.

³⁵ Moqon laj tz'iib' kixtuulanob'resiheb' li poyanam ut kixye: “Ex aj Éfeso, ani ink'a' naxnaw naq li tenamit Éfeso a'an aj k'aak'alehom re li rochoch lix Artemisa, li nim xwankil, jo' ajwi' aj ilol re li xjalam u chalenaq chaq sa' choxa?

³⁶ Ch'olch'o ru a'in. Jo'kan naq us raj naq taakub'eeq eejosq'il ut mik'a' eeb'aanu chi ink'a' k'oxlanb'il rix.

³⁷ Xek'ameb' chaq li winq a'in, ut eb' a'in ink'a' xe'xmux li santil na'ajej chi moko xe'xmajewa li qayos.

³⁸ Jo'kan utan, wi laj Demetrio ut eb' laj tenq' re wank k'aru te'xjit wi' anihaq, teeto li poopol; wankeb' aran aj raqol aatin. Xikaqeb' rik'ineb' chi jitok.

³⁹ Ut wi laa'ex teeraj xk'uub'ankil junaq chik k'a'aq re ru, a'an taasik'manq xyaalal sa' li na'ajej b'arwi' neke'ch'utlaak li wankeb' xwankil.

⁴⁰ Xb'aan naq xiw xiw wanko: mare toohe'xjit xb'aan chixjunil li xk'ulmank anaqwan; te'xye naq laa'o xqayoob' jun mululij ib', ut maak'a' k'aru taaqakol wi' qib' chirix li poqoqij ib' a'in”. Ut naq ak xye a'in, kixraq li ch'utub'aj ib'.