Hebreos 9 - Q'eqchi Bible

Li Kriist kox'okaq sa' li choxahil Muheb'aal

¹ Jo'kan ajwi' li xb'een Sumwank kiwank xchaq'rab'il ut naxye chanru naq naloq'imank li Yos; kiwank ajwi' jun ruuchich'och'il muheb'aal.

² Jo'ka'in naq yiib'anb'il li na'ajej a'an: sa' li xb'een raqal, a' li Sant nayeemank re, wank xna'aj li kanteel, li meex ut eb' li mayejanb'il wa.

³ Junpak'al li xkab' t'ilkem wank li Muheb'aal, Rajawal Sant xk'ab'a',

⁴ li wan wi' li artal oor re li pom, jo'wi' li xloq'laj Kaaxil li Sumwank (a'in junes oor li rix), ut chisa' wank li sek' oor k'uulanb'ileb' wi' li maná, li xxuq' laj Aharón li kituxmek ut eb' li perpookil pek re li Sumwank.

⁵ Sa' xb'een li loq'laj Kaax wankeb' li kerubín: a'aneb' aj k'anjel chiru li xloq'al li Yos, ut neke'xmuheela li na'ajej re li kuyuk maak. Ab'an moko xhonalil ta anaqwan ch'olob'ank chirix a'in.

⁶ Naq chixjunil ak k'uub'anb'il chi jo'kan, eb' laj tij neke'ok junelik sa' li xb'een raqal li Muheb'aal re xb'aanunkil li xloq'laj k'anjeleb'.

⁷ Ab'anan, sa' li xkab' raqal, ka'ajwi' li xyuwa'il aj tij na'ok, jun sut ajwi' chiru li jun chihab'; ut naq na'ok, naxk'am li kik' re xmayejankil chirix li xmaak jo'wi' chirix xmaakeb' li tenamit.

⁸ Rik'in a'in li Santil Musiq'ej naxk'ut chiqu naq toj maji' teeto xb'ehil li Santil Na'ajej, wi toj xaqxo li xb'een Muheb'aal.

⁹ Chixjunil a'an yal reetalil li k'aru yo chi k'ulmank anaqwan, xb'aan naq aran eb' laj tij neke'yeechi'ink ut neke'mayejak chi maak'a' xwankileb' re xtz'aqob'resinkil ru li xna'leb'eb' li yookeb' chi loq'onink:

¹⁰ chixjunil a'an yal ruuchich'och'il chaq'rab' li na'aatinak chirix tzekemq, uk'a', jo'wi' chirix li k'iila paay chi ch'ajob'resink ib', ut kiwank xwankil toj kiwulak xq'ehil xjalb'al chixjunil.

¹¹ Ab'anan kik'ulunk li Kriist, li xyuwa'il aj tij re li sahilal chaalel. Kik'ulunk sa' jun muheb'aal q'axal loq' wi' chik ut tz'aqal re ru, ink'a' yiib'anb'il rik'in uq'ej; naraj naxye, maawa' re li ruuchich'och' a'in.

¹² Ut ki'ok sa' li Santil Na'ajej chi junwaakaj, moko rik'in ta xkik'el teelom chib'aat chi moko rik'in xkik'eleb' kok' wakax, rik'in b'an li xkik'el a'an; ut chi jo'kan kooxkol chi junajwa.

¹³ Wi li xkik'eleb' li teelom chib'aat, li xkik'eleb' li toor ut li xchahil li ixqiwakax li kirkisinb'il sa' xb'een li muxb'ileb' ru nasantob'resink ut nach'ajob'resink re li xjunxaqalileb',

¹⁴ ma toja' ta chik li xkik'el li Kriist li kixyeechi'i rib' chiru li Yos chi maak'a' xmuxul sa' xk'ab'a' li junelik Musiq'ej? Relik chi yaal naq li xkik'el li Kriist tixch'ajob'resi li qak'a'uxl chiru li qakamenaqil k'anjel, re naq took'anjelaq chiru li yo'yookil Yos!

Li xkik'el li Kriist ut li ak' Sumwank

¹⁵ A'in aj e naq li Kriist na'okenk chirix jun li ak' Sumwank. Rik'in li xkamik naxsacheb' li maak uxb'ileb' naq toj wan chaq li xb'een Sumwank, ut eb' li sik'b'ileb' ru xb'aan li Yos neke'xk'ul li ereens li ink'a' nalajk na'oso'k, a' li kiyeechi'iik chaq reheb'.

¹⁶ Re reechaninkil junaq ereens sa' ruuchich'och' na'ajmank ru xnawb'al li xkamik laj k'ehol testameent,

¹⁷ xb'aan naq li testameent ka'ajwi' rik'in li kamk naxaqliik xwankil, ut naq toj yo'yo laj k'ehol re, toj maak'a' xk'anjel li testameent.

¹⁸ Jo'kan ajwi' li xb'een Sumwank toj rik'in kik' kixaqab'aak xwankil.

¹⁹ Laj Moisés naq ak xyaab'asi sa' xxikeb' chixjunil li tenamit li xtaqlankileb' wank sa' li Chaq'rab', kixchap xkik'eleb' li kok' wakax ut eb' li teelom chib'aat yuub'il rik'in ha'; kixchap ajwi' li kaqi noq' ut hisoop, kixkirkisi sa' xb'een li tasb'il hu jo' ajwi' sa' xb'eeneb' chixjunil li tenamit, ut kixye:

²⁰ “Rik'in li kik' a'in xaqab'anb'il xwankil li Sumwank li xb'aanu li Qaawa' eerik'in”.

²¹ Jo'kan ajwi' kixkirkisi chi kik' li Muheb'aal ut chixjunileb' li sek' neke'k'anjelak re li paab'ank,

²² xb'aan naq, jo' naxye li Chaq'rab', kach'in chik maa chixjunil nach'ajob'resimank rik'in kik', ut wi ink'a' nahoye'k li kik', maak'a' kuyuk sachok maak.

²³ Jo'kan utan, tento naq kich'ajob'resiik chi jo'ka'in li reetalil li k'a' re ru wan chaq sa' choxa. Jo'kanaq ajwi' naq taach'ajob'resimanq li k'a' re ru tz'aqal, li wank sa' choxa, ab'an rik'in li mayej q'axal chik loq' chiruheb' a'an.

²⁴ Xb'aan naq li Kriist ink'a' ki'ok sa' jun li santil na'ajej yiib'anb'il rik'in uq'ej, reetalil li tz'aqal yaal; ki'ok b'an tz'aqal sa' choxa re xk'utb'al rib' anaqwan chiru li Yos sa' qak'ab'a' laa'o.

²⁵ Li xyuwa'il aj tij na'ok rajlal chihab' sa' li Santil Na'ajej rik'in ab'l aj kik'. Ab'an li Kriist ink'a' ki'ok re xyeechi'inkil rib' k'iila sutaq.

²⁶ Wi ta kixmayeja rib' naab'al sut, tento raj naq naab'al sut kixk'ul li rahilal chalen sa' xk'ojlajik chaq li ruuchich'och'. Ab'an a'an jun sut ajwi' kixk'ut rib', sa' xtz'aqlojik ru li kutan, re xsachb'al xwankil li maak rik'in xmayejankil rib'.

²⁷ Teneb'anb'il sa' xb'eeneb' chixjunil naq jun sut ajwi' te'kamq ut, chirix chik a'an, a' chik li raqb'a aatin.

²⁸ Jo'kan ajwi' li Kriist: jun sut ajwi' kixmayeja rib' re riiqaninkil xmaakeb' li tenamit. Moqon tixk'utb'esi wi' chik rib', maawa' chik re kuyuk sachok maak, re b'an xkolb'aleb' li neke'oyb'enink re.