Hebreos 8 - Q'eqchi Bible

Li ak' xyuwa'il aj tij

¹ A'an a'in li xyi chixjunil li yooko chi xyeeb'al: wank jun qatz'aqal xyuwa'il aj tij kama' li xqach'olob'. A'an koxk'ojlaaq sa' choxa sa' xnim uq' li xk'ojarib'aal li Nimajwal Yos,

² yo chi k'anjelak sa' li santil Na'ajej ut sa' li tz'aqal Muheb'aal, a' li kixk'ojob' li Qaawa' ut ink'a' yal junaq winq.

³ Xb'aan naq chixjunileb' li xyuwa'il aj tij xaqab'anb'ileb' re yeechi'ink ut mayejak: chi jo'kan tento ajwi' naq li Jesus wank k'aru tixmayeja.

⁴ Wi ta a'in wank sa' ruuchich'och', chi moko cho'q aj tij taak'anjelaq raj, xb'aan naq ak wankeb' li neke'yeechi'ink mayej jo' naxye li xChaq'rab' laj Moisés.

⁵ Eb' a'in yookeb' chi k'anjelak chiru li yal xmu ut xjalam u li k'aru wank sa' choxa, jo' kik'utb'esiik chaq chiru laj Moisés naq kixtikib' xyiib'ankil li loq'laj Muheb'aal: “K'e reetal -chan li Yos-, chab'aanu chixjunil jo' tz'aqal xk'utb'esiik chaq chawu sa' li tzuul”.

Li Kriist na'okenk chirix li ak' Sumwank

⁶ A'ut anaqwan li Kriist kireechani jun k'anjel q'axal chaab'il, xb'aan naq na'okenk chirix jun Sumwank li q'axal chik chaab'il, k'ojob'anb'il sa' xb'een xyeechi'om li Qaawa' li q'axal loq'.

⁷ Wi ta li xb'een Sumwank ak tz'aqal re ru, maak'a' raj chik aj e xsik'b'al junaq xkab'.

⁸ Ab'an li Yos kixye reheb' li tenamit a'an re xq'usb'aleb': “K'ehomaq reetal, chalkeb' re li kutan tink'ojob' wi' jun ak' Sumwank rik'ineb' laj Israel ut laj Judá:

⁹ ink'a' jo' li Sumwank kink'ojob' rik'ineb' li xna' xyuwa'eb', naq keb'inch'ilo chaq chi ruq'eb' ut kiwisiheb' chaq sa' li tenamit Ejiipt. Eb' a'an ink'a' ke'xpaab' linSumwank rik'ineb'; jo'kan naq laa'in ajwi' ink'a' chik kink'oxlaheb', chan li Qaawa'.

¹⁰ A'an a'in li Sumwank li tink'ojob' rik'ineb' li ralal xk'ajol laj Israel moqon, chirixeb' li kutan a'an, chan li Qaawa': Tink'eheb' linchaq'rab' sa' li xk'a'uxeb', ut tintz'iib'a sa' xch'ooleb'. Laa'inaq li xYoseb' ut a'anaqeb' lintenamit.

¹¹ Ink'a' chik aajel ru naq junaq tixtij li rech tenamitul malaj li rech'alal rik'in xyeeb'al: «Chanawaq ru li Qaawa'!». Xb'aan naq chixjunileb' te'nawoq wu, jo' kok' jo' ninq.

¹² Laa'in tinkuy li xmaakeb' ut ink'a' chik tjultiko'q we li xmaa'usilaleb'”.

¹³ Naq li Yos kixye “ak'”, kixch'olob' naq li xb'een Sumwank maak'a' chik na'ok wi'; ut li k'aru q'eel ut tiklajenaq najter, yal sachk aj chik re.