Hebreos 4 - Q'eqchi Bible

¹ Chiqak'e b'i' reetal: mare anchal, naq li Yos toj yo chi xyeechi'inkil li ok sa' li xhilob'aal, ut wankeb' sa' eeyanq li te'xb'ay rib' ut ink'a' te'ok.

² Laa'o qak'ulum jun li chaab'il esilal, kama' ajwi' naq ke'xk'ul eb' a'an. Ab'an li aatin ke'rab'i maak'a' ki'ok wi' reheb', xb'aan naq ink'a' ke'paab'ank ut ink'a' ke'xjunaji rib' rik'ineb' li ke'ab'ink re.

³ Relik chi yaal naq laa'o li xqapaab' li Yos, naru too'ok sa' li hilob'aal a'an, jo' chanru yeeb'il chaq: “Jo'kan naq kinye rik'in jurament sa' linjosq'il: «Maajoq'e te'ok sa' linhilob'aal»”. Ut a'an kik'ulmank us ta li xb'aanuhom li Yos ak yaalo'jenaq chalen chaq sa' xk'ojlajik li ruuchich'och',

⁴ xb'aan naq wank jun raqal sa' li Santil Hu naxye chirix li xwuq li kutan: “Li Yos kihilank sa' li xwuq li kutan chirix chixjunil li k'anjel kixb'aanu”.

⁵ Jo'kan ajwi' naxye sa' li raqal ak yeeb'il: “Maajoq'e te'ok sa' linhilob'aal”.

⁶ Naqanaw naq wankeb' li toj maji' neke'ok; naqanaw ajwi' naq eb' li ke'xk'ul xb'enwa li chaab'il esilal ink'a' ke'ok xb'aan naq ke'q'etok aatin.

⁷ Jo'kan naq, ak k'iila chihab' xnumik a'an, li Yos kixxaqab' wi' chik jun li kutan: a'an “anaqwan”, naq kixye chi xtz'uumal re laj David (ut a'in ak xqaye chaq): “Wi anaqwan nekerab'i xyaab' xkux, meekawub'resi leech'ool”.

⁸ Xb'aan naq wi ta laj Josué kik'ehok li hilob'aal reheb' laj Israel, ink'a' raj ki'aatinak moqon li Yos chirix jun chik kutan.

⁹ Jo'kan utan, ch'olch'o naq toj wank jun li santil hilob'aal cho'q re li xtenamit li Yos.

¹⁰ Xb'aan naq ani ak x'ok sa' li xhilob'aal li Yos, a'an nahilank chirix li xk'anjel, kama' ajwi' naq kihilank li Yos chirix li xk'anjel.

¹¹ Qayalaq b'i' qaq'e re naq too'ok sa' li hilob'aal a'in re naq maa'ani chit'ane'q sa' li q'etb'a aatin a'an.

¹² Relik chi yaal naq yo'yo li Raatin li Yos ut kaw rib', jwal q'es chiru chixjunil li ch'iich' ka'pak'al xq'esnal. Nawulak toj sa' xyanq li aanmej rik'in li musiq'ej, toj sa'atq xtiqb'al li qab'aqel ut li sulutz; narajla jo'ch'inal jo'nimal li nareek'a ut naxk'oxla li ch'oolej.

¹³ Maa'ani muqmu chiru a'an, chixjunil b'an k'utk'u ut saqenk chiru li Yos li toxqaye wi' qayehom qab'aanuhom.

Li Jesus a'an xyuwa'il aj tij q'axal aj uxtaan

¹⁴ Kawaq b'i' qach'ool chi junelik sa' li qapaab'aal, xb'aan naq wank jun xnimal ru xyuwa'il aj tij li kox'okaq sa' choxa, a' li Jesus, li Ralal li Yos.

¹⁵ Xb'aan naq moko wank ta junaq xyuwa'il aj tij li ink'a' ta naxnaw ruxtaanankil ut xtoq'ob'ankil qu; wank b'an jun li kiyale'k rix rik'in chixjunil kama' ajwi' laa'o, ab'an ink'a' kimaakob'k jun sutaq.

¹⁶ Jo'kan utan, jiloqo chi tuqtuuq qach'ool rub'el roq wan wi' li usilal; ut chi jo'kan toxqak'ul li ruxtaan ut toxqataw li rusilal re naq tenq'anb'ilaqo tz'aqal sa' xq'ehil.