Hebreos 1 - Q'eqchi Bible

Li Yos xooraatina sa' xk'ab'a' li Ralal

¹ Najter q'e kutan, k'iila wa ut yalaq chanru li Yos kiraatinaheb' li qana' qayuwa' chi xtz'uumal reheb' li propeet.

² Ab'an anaqwan, sa' roso'jikeb' li kutan, xooraatina sa' xk'ab'a' li Ralal, li kixxaqab' cho'q aj eechaninel re chixjunil; sa' xk'ab'a' ajwi' a'an kixb'aanu li choxach'och'.

³ A'an a'in xrepom li xnimal xloq'al ut xjalam u li xYosilal. A'an nakuutunk re chixjunil rik'in xnimal xwankil li raatin, ut naq ak xch'ajob'resiheb' li tenamit chiru li maak, kik'ojlaak sa' xnim uq' li Nimajwal Yos toj taqe'q.

⁴ Ut q'axal nim xwankil sa' xb'eeneb' li ánjel, xb'aan naq k'ajo' chik xloq'al li xk'ab'a' li wank cho'q reechanihom.

Li K'ajolb'ej q'axal nim xwankil chiruheb' li ánjel

⁵ Ani tawi' reheb' li ánjel kiyehe'k wi' jun sutaq xb'aan li Yos: “Laa'at li walal; anaqwan xatinyoob'tesi”? Malaj kixye: “Laa'inaq li xYuwa' ut a'anaq li walal”?

⁶ Jo'kan ajwi' naq kiroksi chaq li ralal jun chirib'il sa' ruuchich'och', kixye: “Ut chiloq'oniiq xb'aaneb' chixjunil li x'ánjel li Yos”.

⁷ Chirixeb' li ánjel naxye: “A'an naxtaqlaheb' li ánjel jo'keb' li iq', ut eb' laj k'anjel chiru jo'keb' li raq'xam”.

⁸ A'ut chirix li K'ajolb'ej naxye: “At inYos, k'ojk'o laa'awab'ejihom chi junelik. Junelik sa' tiikilal nakatawab'ejink.

⁹ Xara li us ut xik' xawil li maa'usilal; jo'kan naq, at inYos, laaYos xsik' chaq aawu ut xatxnujob'resi rik'in sahil ch'oolej, q'axal wi' chik xaqxo laaloq'al chiruheb' chixjunil laawech awab'ejil”.

¹⁰ Ut naxye ajwi': “At Qaawa', sa' xtiklajik kak'ojob' chaq rub'elankil li ruuchich'och', ut eb' li choxa a'aneb' xb'aanuhomeb' laawuq'.

¹¹ Eb' a'an te'oso'q, a'ut laa'at wankat chi junelik. Chixjunileb' a'an te'q'eeloq kama' junaq aq'ej;

¹² kama' junaq t'ikr naq taaq'ochiheb', kama' junaq aq'ej, ut te'jalmanq. A'ut laa'at a'anat ajwi' chi junelik: relik chi yaal naq malaajel ma'oso'jel laayu'am”.

¹³ Ani tawi' reheb' li ánjel kiyehe'k wi' jun sutaq xb'aan li Yos: “K'ojlan sa' linnim uq', toj reetal tink'eheb' li xik' neke'ilok aawe rub'el laawoq”?

¹⁴ Ma ink'a' tab'i' musiq'ejeb' chixjunileb' a'in, aj k'anjeleb', taqlanb'ileb' chaq chi xtenq'ankileb' li te'eechaninq re li kolb'a ib'?