Habacuc 3 - Q'eqchi Bible

Li xtij laj Habakuk

¹ Xtij laj Habakuk, li propeet, li kib'ichamank cho'q rahil b'ich.

² At Qaawa', xwab'i laawesil nayeemank, ut xwil xnimal laak'anjel xlajaab'aanu: k'ajo' naq ninloq'oni aawu! At Qaawa', b'aanu wi' chik sa' qayanq, k'e chi nawe'k laab'aanuhom anaqwan. Us ta yo aajosq'il sa' qab'een, jultikaq aawe laanimal aawuxtaan.

³ Yo chi chalk li Qaawa' toj aran Temán; toj sa' li tzuul Parán yo chi chalk li jwal nim xsantilal. Li xnimal xwankil naxkupu li choxa ut nujenaq li ruuchich'och' rik'in li xloq'al.

⁴ Li xlemtz'unkil A'an chanchan li saqenk; jo' xrepom li saq'e na'elk chaq sa' li ruq', b'arwi' nak'utunk naq aran wank li xnimal xwankilal.

⁵ K'amol b'e li raxkamk chiru li Qaawa' ut chirix A'an yo chi xik li kaqitiq.

⁶ Naxhich'hich'i rib' li ch'och' naq naxaqliik li Qaawa', ut eb' li tenamit neke'xiwak naq na'ilok. Nalaje'uq'e'k eb' li najter tzuul ut neke'ha'o'k eb' li mayer b'ool, a'ut li xb'e li Qaawa' wank chi junelik.

⁷ Xwil li xrahil xch'ooleb' laj Kusán, neke'hiich'ank sa' xna'aj eb' li xmuheb'aaleb' laj Madián.

⁸ At Qaawa', ma xchalk laajosq'il sa' xb'eeneb' li nima'? Ma naxamlotk laajosq'il sa' xb'een li palaw? Laa'at nakattaqe'k chirixeb' laakawaay ut nakatxik sa' xb'eeneb' laab'eleb'aal ch'iich' jo' jun li xq'axok u sa' li yalok.

⁹ Xawisi ut xakawresi chixjunileb' li ral laasimaj ut xayu' rix laasimaj. Xate li ch'och' rik'in xkawil oq li nima'.

¹⁰ Neke'siksotk eb' li k'iche' naq nakate'ril; chanchan li b'ut'iha' naq xchalk sa' choxa. Kaw x'eek'ank xyaab' li palaw, ut najt nataqe'k li xkaw oq.

¹¹ Li saq'e ut li po xe'kanaak sa' li xna'ajeb' naq xe'ril li xlemtz'unkil li ral laasimaj ut naq xxamlotk laajutz'che'.

¹² Nakab'eeni li ruuchich'och' rik'in laajosq'il, ut li xxamlel laajosq'il nakasacheb' wi' li tenamit.

¹³ Xat-elk chaq chi xkolb'al laatenamit re xtenq'ankil li sik'b'il ru aab'aan. Xajuk' li rochocheb' li ink'a' useb' xna'leb' ut xak'e chi kutankil li rub'elankil.

¹⁴ Rik'ineb' li ral laasimaj xakamsi li xjolomileb', naq sa' q'etq'etil xe'xkut rib' sa' qab'een re xsachb'aleb' li neb'a' sa' muqmu.

¹⁵ Xate laab'e sa' li palaw rik'ineb' laakawaay, ut nab'ulb'utk li ha' sa' laanumik.

¹⁶ Naq xwab'i a'in, k'ajo' naq xxiwak xsa' linsa'; xb'aan li xyaab' aakux ink'a' chik ninruuk chi aatinak, ut x'ok jun raxkehob' sa' chixjunil linb'aqel: neke'parpotk eb' li woq sa' linb'eenik. Ab'an k'ojk'o linch'ool royb'eninkil li xkutankil li rahilal taachalq sa' xb'eeneb' li neke'rahob'tesink qe.

¹⁷ Us ta ink'a' chik taatuxmeq li xche'el li iig ut maak'a'aq chik ru li uub'; us ta ink'a' chik taa'uuchinq li oliiw ut li ch'och' ink'a' chik tixk'e qatzekemq; us ta maak'a'aqeb' chik li karneer sa' li xna'ajeb' chi moko wanqeb' chik qawakax sa' li xwa'leb'aaleb',

¹⁸ ab'an laa'in taasaho'q linch'ool rik'in li Qaawa', k'ojk'ooq li waanm rik'in li Yos laj kolol we.

¹⁹ Li Qaawa' linYos a'an li xkawub' linch'ool. A'an naseeb'ob'resink eb' li woq jo'keb' roq li kej, ut nikinxk'am toj chi tzuul re naq tinkole'q. A'in xb'ich li xjolomileb' laj b'ichanel, re xb'ichankil rik'ineb' li wajb' li wankeb' li ru.