Habacuc 2 - Q'eqchi Bible

Li xkab' xsumehom li Qaawa'

¹ Tinwanq sa' linna'aj chi k'aak'alenk, ut sa' xb'een li suttz'ak tinxaqab' wib' chi ilok. Jo' junaq aj k'ehol eetal, yo'oon wanqin re rilb'al k'aru tixye we li Qaawa' ut k'aru tixsume wi' linjitom.

² Ut li Qaawa' kinxsume chaq chi jo'ka'in: “Tz'iib'a chiru junaq tz'alamche' li ok we chi xk'utb'al chawu; tz'iib'a chi tz'aqal re ru re naq maak'a'aq ch'a'ajkilal chi rilb'al ut li ani taa'iloq re, tixchap raanil chi yehok esil.

³ Toj maji' nawulak xq'ehil naq li moy u a'in taatz'aqloq ru, ab'an ak xaqxo xkutankil naq taak'ulmanq. Us ta taab'ayq kach'inaq, oyb'eni laa'at xb'aan naq relik chi yaal naq taatz'aqloq ru chixjunil.

⁴ Taa'oso'q li ink'a' tiik ru xyu'am, ab'an li tiik xch'ool taawanq xyu'am xb'aan li xpaab'aal”.

Li k'aru toxe'oso'q wi' eb' laj rahob'tesinel

⁵ Relik chi yaal naq li b'ihomal nab'alaq'ik; li maak'a'eb' xna'leb' neke'xyal xq'e chi xsik'b'al xtumineb', ut junelik neke'raj xkomon: chanchaneb' li kamk, chanchaneb' li xjulel kamenaq li junelik yo chi royb'eninkil eb' li te'ok chisa'. Neke'xik yalaq b'ar chi sachok tenamit, chi ink'a' nak'ojlaak xch'ooleb'.

⁶ Ab'anan chixjunileb' li eechaninb'il tenamit te'xse'e li ke'eechanink reheb', yooqeb' chi xyeeb'al: “Ra chaalel sa' aab'een laa'at li xatb'ihomo'k rik'in li moko aawe ta! Toj jo'q'e taakanab' xch'utub'ankil li b'ihomal li wank chi to' aawik'in?”.

⁷ Chi maak'a'aq sa' laach'oolte'wulaq li xe'k'ehok aato'; te'wakliiq chaq, ut siksootqat xb'aan aaxiw naq te'xmaq' chixjunil li k'aru aawe.

⁸ Jo' naq xamaq' li xb'ihomaleb' li k'iila tenamit, jo'kan ajwi' naq te'xmaq' chawu li k'a'aq re ru xawelq'a. Jalanil tenamit taak'ehoq aawe chi xtojb'al rix laamaa'usilal jo' ajwi' chixjunil li xab'aanu re li qana'aj, reheb' li qatenamit ut reheb' li jo'k'ihal wankeb' chisa'.

⁹ Ra chaalel sa' aab'een li xanujob'resi laawochoch rik'in li xawelq'a re raj xkolb'al aawib' chiru chixjunileb' li raaxiik'!

¹⁰ Chi jo'kan xak'e sa' xutaan laawochoch, ut yal xasik' laarahilal naq xajuk'i eb' li k'iila tenamit.

¹¹ Xb'aan naq eb' li pek te'xjap re chajitb'al ut te'sumeeq chaq xb'aaneb' li tz'amb'a!

¹² Ra chaalel sa' aab'een laa'at li nakatkab'lak sa' xb'een li rahilal ut nakatk'ojob'ank tenamit rik'in kamsink ut maa'usilal.

¹³ Ab'an li Nimajwal Yos ink'a' tixk'e xwankil laak'anjel, ut maak'a' na'ok wi' li k'aru xatawasi wi' aawib', xb'aan naq chixjunil li xab'aanu taa'oso'q chi junwaakaj xb'aan li xam.

¹⁴ Ut taanawmanq ru li xnimal xloq'al li Qaawa' junsut junrub'el choxa, jo' naq nanujak li palaw rik'ineb' li k'iila ha'.

¹⁵ Ra chaalel sa' aab'een laa'at li nakakaltesiheb' laawechkab'al ut nakayu li b'iin rik'in li b'an nakaanob'resink u, re xsachb'al xwankileb' ut xk'utb'al xxutaaneb'.

¹⁶ Taanujob'resi aawib' rik'in xutaan ut ink'a' rik'in loq'al, xb'aan naq li Qaawa' tixk'e chawuk' laaha' ut tatxkanab' chi t'ust'u.

¹⁷ Li maa'usilal xab'aanu aran Líbano taaq'apluuq sa' aab'een, ut k'ajo' naq tatxiwaq xb'aan li xkik'eleb' li k'iila xul xakamsiheb'. Chixjunil a'in taachalq sa' aab'een xb'aan laamaa'usilal jo' ajwi' xb'aan chixjunil li xab'aanu re li qana'aj, reheb' li qatenamit ut reheb' li jo'k'ihal wankeb' chisa'.

¹⁸ K'aru aj e li xjalam u junaq k'oxlanb'il yos? A'an yal jalanil yos, aj b'alaq'; a'an yal xb'aanuhom junaq aj peech'. Ma naru tixk'ojob' xch'ool li xyiib'ank re? Xb'aan naq eb' li yiib'anb'il yos ink'a' neke'aatinak.

¹⁹ Ra chaalel sa' aab'een laa'at li nakatyehok: “Ajsi aawu”, chankat re jun tolol chi che'. “Waklin”, chankat re jun li pek ink'a' na'aatinak. Ma naru tab'i' taa'aatinaq? Us ta nujob'resinb'il chi oor ut plaat, maak'a' jun tz'uqukaq yu'am rik'in.

²⁰ A'ut li Qaawa' wank sa' li xsantil ochoch: maajun na'aatinak chiru A'an junsut junrub'el choxa!