Génesis 9 - Q'eqchi Bible

Li xSumwank li Yos rik'in laj Noé

¹ Li Yos kirosob'tesi laj Noé ut eb' li ralal xk'ajol, ut kixye reheb': “Chiwanq eeralal eek'ajol, chexk'ihanq ut chenujob'resi li ruuchich'och'.

² Chiwanq eexiwankil xb'aan chixjunileb' li xul li wankeb' sa' ruuchich'och': eb' li xul li neke'rupupik chiru choxa, eb' li neke'xjukuki rib' chiru ch'och' ut chixjunileb' li kar li wankeb' sa' palaw te'kanaaq sa' eeruq'.

³ Chixjunil li na'eek'ank ut wank xyu'am te'k'anjelaq cho'q eetzekemq: chixjunil a'in tinq'axtesi eere jo' naq ak k'eeb'il eere li awimq.

⁴ Ka'ajwi' li tib' li toj wank xkik'el ink'a' naru teetzeka, xb'aan naq li kik' a'an xyu'am.

⁵ Relik chi yaal naq tinpatz' reeqaj leekik'el. Tinpatz' ajwi' re chixjunileb' li xul. Wi wanq ani tixkamsi li ras riitz'in, tento taakamsiiq.

⁶ “Li tixkamsi junaq winq, taakamsiiq ajwi' a'an xb'aan jalan chik, xb'aan naq jo' xjalam u li Yos naq kiyoob'tesiik li winq.

⁷ Chiwanq naab'al leeralal eek'ajol, chexk'ihanq, chexpukanq sa' ruuchich'och' ut chiwanq eewankil sa' xb'een”.

⁸ Li Yos kiraatina wi' chik laj Noé ut eb' li ralal, ut kixye reheb':

⁹ “Anaqwan tink'ojob' linSumwank eerik'in, ut rik'ineb' leeralal eek'ajol li te'wanq moqon,

¹⁰ jo' ajwi' rik'in chixjunileb' li xul li xe'ochb'eenink eere ut xe'elk sa' li jukub' kab'l: eb' li xik'anel xul, li ketomq ut eb' li wankeb' sa' pim, rik'in chixjunileb' li xul sa' ruuchich'och'.

¹¹ Tink'ojob' linSumwank eerik'in laa'ex: maajaruj chik te'sachmanq li wankeb' xyu'am xb'aan li b'ut'iha', chi moko taawanq chik b'ut'iha' li taasachoq li ruuchich'och'”.

¹² Kixye ajwi' li Qaawa' Yos: “A'an a'in li reetalil linSumwank li tink'ojob' chi junajwa eerik'in ut rik'ineb' li xul li neke'ochb'eenink eere.

¹³ Tink'e linkaqlaaq' sa'eb' li choql, ut a'anaq reetalil linSumwank rik'in li ruuchich'och'.

¹⁴ Naq tintaqlaheb' li choql sa' xb'een li ruuchich'och', taak'utunq li kaqlaaq' sa'eb' li choql

¹⁵ ut taajultiko'q we li Sumwank xink'ojob' eerik'in ut rik'in chixjunileb' li xul, rik'in chixjunil li wank xyu'am sa' ruuchich'och': ink'a' chik taawanq b'ut'iha' re xsachb'al chixjunileb' li wankeb' xyu'am.

¹⁶ Naq taak'utunq li kaqlaaq' sa'eb' li choql, laa'in tink'e reetal li Sumwank li xink'ojob' chi junajwa rik'in chixjunileb' li wank xyu'am sa' ruuchich'och'.

¹⁷ A'an a'in reetalil li Sumwank li xink'ojob' rik'in chixjunileb' li wankeb' xyu'am sa' ruuchich'och'”, chan li Yos re laj Noé.

Laj Noé ut eb' li ralal xk'ajol

¹⁸ Eb' li ralal laj Noé li ke'elk sa' li jukub' kab'l a'aneb' a'in: laj Sem, laj Kam ut laj Jafet. Laj Kam a'an xyuwa'ileb' laj Kanahán.

¹⁹ A'aneb' a'in li oxib' chi ralal laj Noé, ut rik'ineb' a'in kitenamito'k wi' chik li ruuchich'och'.

²⁰ Laj Noé a'an aj k'alom winq, ut kiraw jun siir x'uub'.

²¹ Kiruk' xb'iin, kikalaak ut kikanaak chi t'ust'u sa' xyi li xmuheb'aal.

²² Naq laj Kam, xyuwa'ileb' laj Kanahán, kiril naq t'ust'u li xyuwa', koxye chaq re laj Sem ut laj Jafet chirix kab'l.

²³ Toja' naq laj Sem ut laj Jafet ke'xchap jun li t'ikr, ke'xk'e sa' xb'eeneb' xtel chi xkab'ichaleb' ut chirixeb' ke'q'ajk, chi b'alb'ook li rilob'aaleb'. Ut koxe'xhel sa' xb'een li xyuwa'eb' chi ink'a' ke'ril chi t'ust'u.

²⁴ Naq ki'ajk ru laj Noé ut kinume'k li xkalajik, kixk'e reetal li ki'uxk re xb'aan li ralal toj kach'in ut kixye chi jo'ka'in:

²⁵ “Tz'eqtaananb'ilaq laj Kanahán! Chikanaaq cho'q aj k'anjel chiruheb' li ras!”, chan.

²⁶ Kixye ajwi': “Loq'oninb'il taxaq li Qaawa', li xYos laj Sem! Chikanaaq laj Kanahán cho'q aj k'anjel chiru a'an!

²⁷ Li Yos chixnimob'resi taxaq xwankil laj Jafet, chihilanq taxaq sa'eb' li xmuheb'aal laj Sem ut chikanaaq laj Kanahán cho'q aj k'anjel chiru a'an!”.

²⁸ Naq ak xnume'k li b'ut'iha', toj lajeeb' xwaqxaqlajuk'aal (350) chihab' chik kiyo'yook laj Noé sa' ruuchich'och'.

²⁹ Lajeeb' waqxaqk'aal rox o'q'ob' (950) chihab' wank re laj Noé naq kikamk.