Génesis 47 - Q'eqchi Bible

Laj Jakob chiru laj Parahón

¹ Kiwulak laj José rik'in laj Parahón ut kixye re: “Linyuwa', eb' li was, eb' li xkarneer, li xwakax ut chixjunil li k'aru reheb' xe'chalk chaq toj Kanahán ut anaqwan wankeb' sa' li na'ajej Gosen”.

² Chirix chik a'an kixsik' oob' sa' xyanqeb' li ras, kixk'ameb' chirix ut koxk'uteb' chiru laj Parahón.

³ Ut laj Parahón kixpatz' reheb' li ras laj José: “K'aru li k'anjel nekeb'aanu?”, chan. Ke'chaq'ok eb' a'an ut ke'xye: “Laa'o aj k'aak'alenel ketomq; jo'kaneb' ajwi' li qaxe'toonil yuwa'”.

⁴ Ke'xye ajwi' re laj Parahón: “Xoochalk chi wank sa' li ch'och' a'in, xb'aan naq k'ajo' li we'ej aran Kanahán ut maak'a' li raxpim cho'q reheb' li qaketomq. Chakuy qamaak, naqatz'aama chawu naq toohaakanab' chi wank sa' li na'ajej Gosen”, chankeb'.

⁵ Toja' naq laj Parahón kixye re laj José: “Laayuwa' ut eb' laawas xe'k'ulunk aawik'in.

⁶ Wank chawu chixjunil li tenamit Ejiipt: kanab'eb' b'i' laayuwa' ut eb' laawas chi hilank wan wi' li xq'emal ch'och'. Che'hilanq sa' li na'ajej Gosen ut, wi laa'at nakanaw naq sa' xyanqeb' wankeb' li neke'xnaw xk'anjel, chaxaqab'eb' cho'q xb'eenileb' laj ilol ketomq, sa' xb'een li k'aru wank we”, chan.

Sa' li na'ajej Gosen

⁷ Chirix a'an laj José kiroksi laj Jakob li xyuwa' ut koxk'ut chiru laj Parahón, ut laj Jakob kirosob'tesi laj Parahón:

⁸ “Jarub' chihab' wank aawe?”, chan laj Parahón re laj Jakob.

⁹ Kichaq'ok laj Jakob ut kixye: “Lajeeb' xwuqk'aal (130) chihab' li wokik chi b'eek laa'in yalaq b'ar. Naab'al rahilal xink'ul sa' linyu'am ut ink'a' k'iheb' linchihab' jo' li xchihab'eb' linxe'toonil yuwa' naq ke'wank sa' ruuchich'och'”.

¹⁰ Laj Jakob kirosob'tesi wi' chik laj Parahón ut ki'elk rik'in.

¹¹ Laj José kixpaab' li kiyehe'k re xb'aan laj Parahón: kixk'e xna'ajeb' li ras ut li xyuwa' sa' li ch'och' q'axal chaab'il re Ejiipt, sa' xteepal Ramsés.

¹² Kixk'e ajwi' xtzekemq li xyuwa', eb' li ras ut chixjunil li xjunkab'lal li xyuwa'.

K'aru kixk'uub' laj José chirix li ch'och'

¹³ Maak'a' li wa sa' chixjunil li tenamit xb'aan naq yo chi numtaak li we'ej, ut eb' laj Ejiipt jo'wi' eb' laj Kanahán kamkatqeb' re xb'aan li we'ej.

¹⁴ Toja' naq laj José kixch'utub' chixjunil li tumin li xe'xtoj wi' li triiw eb' laj Ejiipt ut eb' laj Kanahán, ut koxk'uula sa' rochoch laj Parahón.

¹⁵ Naq kilajk li tumin sa' xsutam Ejiipt ut Kanahán, jun chalikeb' chixjunileb' laj Ejiipt rik'in laj José chi xyeeb'al re: “K'e qawa. K'a'ut naq tookamq chawu arin anaqwan naq xlajk li qatumin?”, chankeb'.

¹⁶ Ut laj José kixye reheb': “Wi maak'a' leetumin, k'amomaq chaq leeketomq ut tink'e eewa cho'q reeqaj leeketomq”.

¹⁷ Toja' naq ke'xk'am chaq li xketomqeb', eb' li xkawaay, eb' li xkarneer, eb' li xwakax ut eb' li xb'uur rik'in laj José, ut laj José kixk'eheb' xwa cho'q reeqaj, chiru chixjunil li chihab' a'an.

¹⁸ Naq kiraqe'k li chihab' a'an, ke'wulak wi' chik rik'in laj José ut ke'xye re: “Ink'a' tqamuq chawu naq xlajk li qatumin; jo'kan ajwi' li qaketomq ak aaweheb' chik. Maak'a' chik k'aru tqayeechi'i aawe; ka'aj chik eb' li qoq quq' ut li qach'och'.

¹⁹ Ink'a' naru tookamq chawu. Choohaaloq' laa'o ut li qach'och' cho'q xtz'aq li qawa. Laa'o tookanaaq cho'q aj mun chiru laj Parahón ut tqak'anjela li qach'och' cho'q re a'an. Ab'an chak'e qiyaj re naq yo'yooqo ut ink'a' tookamq; ink'a' naqaj naq li qach'och' taakanaaq chi maak'a'aq awimq chiru”, chankeb'.

²⁰ Toja' naq laj José kireechani chixjunil li ch'och' sa' xsutam Ejiipt cho'q re laj Parahón, xb'aan naq chixjunileb' laj Ejiipt ke'xk'ayi li xch'och'eb' xb'aan li we'ej li yo chi numtaak aran. Chi jo'kan li ch'och' kikanaak cho'q re laj Parahón

²¹ ut chixjunileb' li tenamit ke'kanaak cho'q aj mun, chalen sa' xmaril Ejiipt toj sa' li junpak'al chik.

²² Ka'ajwi' li xch'och'eb' laj tij ink'a' kireechani, xb'aan naq usilanb'ileb' laj tij xb'aan jun xchaq'rab' laj Parahón ut neke'tzekank jo' naxye li chaq'rab' a'an. Jo'kan naq ink'a' ke'xk'ayi li xch'och'eb'.

²³ Toja' naq laj José kixye reheb' li tenamit: “K'ehomaq reetal naq xexweechani anaqwan cho'q re laj Parahón, jo' laa'ex jo' ajwi' leech'och'. Waye' eeriyaj: awqex sa' li ch'och'

²⁴ ut moqon, sa' xq'ehil li q'olok, teek'e li ro' jachal re laj Parahón ut li kaahib' raqal chik te'kanaaq cho'q eere, re teeraw sa' li ch'och' ut textzekanq laa'ex, leekok'al jo'wi' chixjunileb' li wankeb' sa' leejunkab'al”, chan Laj José.

²⁵ Ke'chaq'ok eb' a'an ut ke'xye: “Xakol li qayu'am. Chiqataw taxaq usilal chawu ut laa'ohaq chik aj mun chiru laj Parahón”, chankeb'.

²⁶ Toja' naq laj José kixk'e jun chaq'rab' sa' li tenamit Ejiipt li wank chalen toj anaqwan: li xk'eeb'al re laj Parahón li ro' jachal ru li awimq; ka'aj chik li xch'och'eb' laj tij ink'a' ki'eechaniik xb'aan laj Parahón.

Laj Jakob kixchaq'rab'i laj José

²⁷ Eb' laj Israel ke'kanaak sa' li na'ajej Gosen, sa' xteepal Ejiipt; ke'na'ajunk aran, ke'wank ralal xk'ajol ut k'ajo' naq ke'k'ihank.

²⁸ Wuqlaju chihab' kiyo'yook laj Jakob aran Ejiipt ut chixjunil li xyu'am laj Jakob a'an wuqub' xwaqxaqk'aal (147) chihab'.

²⁹ Naq yo chi wulak xq'ehil li xkamik, laj Israel kixb'oq laj José li ralal ut kixye re: “Wi usilal xintaw chawu, k'e laawuq' rub'el li wa' ut ye sa' jurament naq taab'aanu li ok we chi xtz'aamankil. B'aanu usilal, minaamuq arin Ejiipt!

³⁰ Naq tinq'ajq tinsutq'iiq rik'ineb' linna' linyuwa', chinaawisi arin Ejiipt ut toxinaamuq chaq sa' li xmuqleb'aaleb' a'an”. Kichaq'ok laj José: “Tinb'aanu jo' xaye we”, chan.

³¹ Kixye laj Israel: “Ye rik'in jurament”. Laj José kixye li xjurament. Toja' naq laj Israel kixxulub' li xjolom sa' xb'een xjolomil li xch'aat.