Génesis 43 - Q'eqchi Bible

Laj Benjamín kik'ame'k Ejiipt

¹ Li we'ej yo chi numtaak sa' li ruuchich'och'.

² Ut naq ke'xchoy li triiw li ke'xk'am chaq Ejiipt, kiyehe'k reheb' xb'aan li xyuwa'eb': “Ayuqex wi' chik chi xloq'b'al b'ayaq qatzekemq”.

³ Ab'an laj Judá kixye re: “Ch'olch'o xye chaq qe li winq a'an: «Meek'ut eerib' chiwu wi ink'a' eerochb'eenaq leeriitz'in».

⁴ Wi taataqla li qiitz'in chiqix, tooxik ut toxqaloq' chaq aatriiw;

⁵ ab'an wi ink'a' taataqla, ink'a' tooxik, xb'aan naq xyehom li winq a'an: «Meek'ut eerib' chiwu wi ink'a' eerochb'eenaq leeriitz'in»”.

⁶ Toja' naq kixye laj Israel: “K'a' put naq xek'am chaq li rahilal a'in sa' inb'een? Xeye re li winq a'an naq wank jun chik eeriitz'in”.

⁷ Ke'chaq'ok eb' a'an ut ke'xye: “A'an kixpatz' qe aniho ut aniheb' li qakomon: «Ma toj wank leeyuwa'? Ma toj yo'yo leeyuwa'? Ma wank chik junaq leeriitz'in?», chan. Ut laa'o xqasumeheb' li aatin a'an. K'a' tab'i' tqanaw wi' naq tixye ajwi' qe: «K'amomaq chaq leeriitz'in?»”.

⁸ Ut laj Judá kixye re laj Israel, li xyuwa': “Kanab' li ch'ina'al chi xik chiwix. Kanab'o chi xik re naq yo'yooqo ut ink'a' tookamq laa'o, laa'at ut eb' li qakok'al.

⁹ Matk'oxlak: laa'in tinchaq'oq chirix li al; we laa'in taapatz'. Wi ink'a' tink'am chaq ut tolink'ut chawu, wanq inmaak chawu chi junelik.

¹⁰ K'oxla chi us: wi ink'a' ta xqab'ay qib', ak yooko raj chaq chi sutq'iik sa' li honal a'in”, chan.

¹¹ Toja' naq laj Israel, li xyuwa'eb', kixye reheb': “Wi maak'a' xja'lenkil, b'aanuhomaq. K'amomaq sa' leechakach li q'axal chaab'il na'elk sa' li qatenamit ut k'amomaq xsimaatan li winq a'an: b'ayaq xq'ol sununkil che', b'ayaq xya'al kab', miir ut sununkil b'an ut b'ayaq ki'il q'een.

¹² Teek'am ajwi' cherix ka' wa chik xk'ihal li tumin: chi jo'kan teeq'ajsi rik'in eeruq' li tumin li xchalk sa' leesaak. Mare anchal yal xe'sachk sa' xch'ool.

¹³ K'amomaq b'i' leeriitz'in cherix ut ayuqex chi junpaat wan wi' li winq a'an.

¹⁴ A' taxaq li Nimajwal Yos chitenq'anq eere re naq usilal teetaw chiru li winq a'an: chirach'ab' taxaq leeriitz'in jun chik jo' ajwi' laj Benjamín. Ut laa'in k'a' ta ru tinye? Wi te'sachq chiwu eb' li walal, maak'a' xja'lenkil”, chan laj Jakob.

¹⁵ Toja' naq ke'xk'am li simaatan, ka' wa chik xk'ihal li tumin ut ke'xk'am ajwi' laj Benjamín; ke'xchap xb'eheb', koheb' Ejiipt ut koxe'xk'ut rib' chiru laj José.

¹⁶ Naq laj José kiril laj Benjamín rochb'eeneb', kixye re laj tenq' re: “K'ameb' li winq a'in sa' kab'l, kamsi junaq xul ut taak'uub', xb'aan naq wa'leb' te'wa'aq wochb'eeneb'”, chan.

¹⁷ Li winq kixb'aanu jo' kiyehe'k re xb'aan laj José ut kixk'ameb' li winq sa' rochoch laj José.

¹⁸ Ab'anan naq ke'k'ame'k sa' rochoch laj José, ke'ok xxiweb' ut ke'xye: “Xb'aan li tumin xq'ajsimank qe junxil sa' li saak naq xoohe'xk'am chaq arin: re naq toot'ane'q sa' junaq ra'al, toohe'xchap ut tookanaaq chi munil qochb'eeneb' li qab'uur”, chankeb'.

¹⁹ Ke'jilok chi xk'atq laj tenq' re laj José ut ke'xye re chire li kab'l:

²⁰ “Wa', chakuy qamaak. Xook'ulunk xb'ensut arin chi loq'ok tzekemq.

²¹ Ab'an naq xoowulak sa' jun na'ajej re xnumsinkil li q'oqyink ut xqate li qasaak, li junjunq xtaw xtumin sa' li xsaak, chi tz'aqal re ru. Ut anaqwan xqak'am chaq qik'in.

²² Xqak'am ajwi' chaq qatumin re xloq'b'al qatzekemq. Ab'an ink'a' naqanaw ani ta xk'ehok li tumin sa' li qasaak”.

²³ Kixye a'an: “Li tuqtuukilal chiwanq eerik'in! Mexxiwak. LeeYos ut li xYos leeyuwa' xk'ehok li loq'laj tumin a'in sa' leesaak. Ak ink'ulum li tumin xetoj wi' leetriiw”. Ut kirach'ab' chaq laj Simehón reheb'.

²⁴ Chirix chik a'an kiroksiheb' sa' rochoch laj José, kixk'e xha'eb' re te'xch'aj li roqeb', ut kixk'e ajwi' xwaheb' li xb'uur.

²⁵ Toja' naq eb' a'an, naq yookeb' chi royb'eninkil xk'ulunik laj José sa' wa'leb', ke'xkawresi li xmaatan, xb'aan naq ke'rab'i resil naq aran te'wa'aq.

²⁶ Naq ki'ok laj José sa' kab'l, ke'xk'ut li xmaatan li ke'xk'am chaq ut ke'xk'utzub' rib' toj chiru ch'och'.

²⁷ A'an kixk'e xsahileb' xch'ool ut kixpatz' reheb': “Ma toj yo'yo leetiixil yuwa' li xeseeraq'i we?”.

²⁸ Ke'chaq'ok eb' a'an: “Kaw laj k'anjel chawu, li qayuwa', ut toj yo'yo”, chankeb'. Ut ke'xwiq'ib' rib' chiru.

²⁹ Toja' naq laj José kixtaqsi li rilob'aal ut kiril laj Benjamín li riitz'in, xyum li xna', ut kixye: “Ma a'an leeriitz'in li xeye we? Li Yos chi'osob'tesinq aawe, at walal!”, chan.

³⁰ Tikto ki'elk laj José xb'aan naq yaab'ak traj sa' xk'ab'a' xsahil xch'ool chi rilb'al li riitz'in; ut naq ki'ok sa' li xwarib'aal, kiyaab'ak aran.

³¹ Chirix chik a'an kixch'aj li ru, ki'elk chaq ut yal tixkuy li xyaab' naq kixye: “K'amomaq chaq li tzekemq”.

³² Ke'xk'am chaq li tzekemq, jalan jalanq li na'ajej te'xk'e raj wi' chi wa'ak laj José, eb' li ras ut eb' laj Ejiipt li ke'wa'ak rochb'een (xb'aan naq eb' laj Ejiipt ink'a' naru te'wa'aq rochb'eeneb' laj Hebreo: xnimal maak a'an cho'q reheb').

³³ Ke'k'ojlaak chiru laj José jo' chanru xchihab'eb', chalen li asb'ej toj rik'in li iitz'inb'ej, ut chixjunileb' neke'xka'ya rib' chirib'il rib' chi sachsookeb' xch'ool.

³⁴ Laj José kixtaqla xjek'inkil cho'q reheb' li tzekemq wank sa' meex, ab'an li kitz'aqk laj Benjamín a'an oob' wa chik xk'ihal chiru xtzekemqeb' li ras. Ke'uk'ak chi us ut k'ajo' naq ke'saho'k sa' xch'ool chixjunileb' rochb'een a'an.