Génesis 38 - Q'eqchi Bible

Laj Judá ut lix Tamar

¹ Sa'eb' li kutan a'an laj Judá kixjek' rib' rik'ineb' li ras ut eb' li riitz'in ut koho sa' rochoch jun li winq, aj Jirá xk'ab'a', Adulán xtenamit.

² Aran laj Judá kiril li xrab'in laj Súa aj Kanahán, kixk'am ut kiwank rik'in.

³ Li ixq kisiyank ut kiwank jun xk'uula'al: aj Er ke'xk'e cho'q xk'ab'a'.

⁴ Kisiyank wi' chik ut kiwank jun xk'uula'al: aj Onán ke'xk'e cho'q xk'ab'a'.

⁵ Moqon kiwank jun chik xk'uula'al ut aj Selá ke'xk'e cho'q xk'ab'a'. Laj Judá wan chaq sa' li tenamit Kesib naq kiyo'laak li k'uula'al.

⁶ Laj Judá kixsumub' laj Er, li xb'een ralal, rik'in jun li ixq, xTamar xk'ab'a'.

⁷ Ab'anan laj Er, li xb'een ralal laj Judá, ink'a' us xch'ool chiru li Qaawa' ut li Qaawa' kixk'e chi kamk.

⁸ Toja' naq laj Judá kixye re laj Onán: “Sumlan rik'in li rixaqil laawas ut paab' laataqlankil jo' ech'alalb'ej: wanqat rik'in re naq twanq ralal xk'ajol laawas”.

⁹ Laj Onán naxnaw naq eb' li ralal taawanq moko rehaqeb' ta; jo'kan naq, jo'q'e nawark rik'in li rech'alal, naxhoy sa' ch'och' li riyajil re naq ink'a' te'wanq ralal xk'ajol li ras.

¹⁰ Ink'a' kiwulak chiru li Qaawa' li kixb'aanu laj Onán ut kixk'e ajwi' chi kamk a'an.

¹¹ Toja' naq laj Judá kixye re lix Tamar, li ralib': “Kanaaqat jo' xmalka'an sa' rochoch laayuwa' toj taawinqilo'q laj Selá li walal”. Xb'aan naq kixye sa' xch'ool: “Mare anchal taakamq ajwi' a'an jo' naq xe'kamk li ras”. Jo'kan naq lix Tamar koxkanaaq sa' rochoch li xyuwa'.

¹² K'iila kutankaq chik a'an, kikamk li xrab'in laj Súa, li rixaqil laj Judá. Ut naq ak xnume'k xrahil xch'ool, laj Judá koho Timná, rochb'een laj Jirá aj Adulán, chi xb'esb'al rixeb' li xkarneer.

¹³ Kiyehe'k resil re lix Tamar: “Ab'i, laj alib' aawe xkoho Timná re xb'esb'aleb' rix li xkarneer”.

¹⁴ Toja' naq a'an kirisi li raq' li xmalka'anil ut kixk'e jun t'ikr chirix, kixb'at rib' chisa' ut koxk'ojlaaq Petaj-Enáhin, li wank sa' xb'ehil Timná. Xb'aan naq ak xk'ehom reetal naq laj Selá ak xwinqilo'k, ab'an ink'a' xk'ehe'k cho'q xb'eelom.

¹⁵ Naq laj Judá kiril li ixq, kixk'oxla naq a'an jun aj yumb'eet, xb'aan naq tz'aptz'o li xnaq' ru.

¹⁶ Ink'a' naxnaw naq a'an li ralib'; jo'kan naq kixjal li xb'e re xik rik'in ut kixye re: “Kanab'in chi wark aawik'in”. Li ixq kixpatz' re: “K'aru taak'e we naq tat-ok wik'in?”.

¹⁷ Kichaq'ok laj Judá: “Tintaqla chaq junaq aachib'aat”, chan. Kixye li ixq: “K'aru taakanab' jo'q ruuchil li toj taataqla chaq?”.

¹⁸ Kichaq'ok laj Judá: “K'aru taawaj tink'e aawe?”, chan. “Laake'leb' kaaxt rochb'een li xk'aamal ut laaxuq'”, chan li ixq re. Laj Judá kixk'e re li k'aru kixpatz' ut kiwank rik'in. Lix Tamar kikanaak sa' yu'am.

¹⁹ Toja' naq kixaqliik ut kisutq'iik sa' rochoch, kirisi li xt'ikr ut kixk'e wi' chik li raq' li xmalka'anil chirix.

²⁰ Laj Judá kixtaqla li chib'aat chirix laj Adulán, li rochb'een, re xxokb'al li k'aru re sa' ruq' li ixq; ab'anan ink'a' kixtaw a'an.

²¹ Kixpatz'i reheb' li wankeb' sa' li na'ajej a'an: “B'ar wank laj yumb'eet li xwank chire b'e Enáhin?”, chan. “Arin maajun aj yumb'eet wanjenaq”, chankeb' a'an re.

²² Toja' naq kisutq'iik wan wi' laj Judá ut kixye re: “Ink'a' xintaw chaq, ut eb' li wankeb' sa' li na'ajej a'an xe'xye we naq maajun aj yumb'eet wanjenaq aran”.

²³ Kichaq'ok laj Judá: “Chikanaaq rik'in li k'aru we, re naq ink'a' toohe'xse'e. Laa'at xak'e reetal naq xintaqla li chib'aat a'in cho'q re li ixq a'an ut laa'at ink'a' xataw chaq”, chan.

²⁴ Oxib'aq po tana xnumik a'an naq laj Judá kixk'ul li esil a'in: “Lix Tamar laawalib' xmux rib' ut xkanaak sa' yu'am xb'aan li xmuxum”. Kixye ut laj Judá: “Isihomaq chaq ut chik'atmanq”, chan.

²⁵ Ab'anan, naq yookeb' chi risinkil, li ixq kixtaqla xyeeb'al re laj alib' re: “Yajin xb'aan li winq aj eechal re li k'a'aq re ru a'in”. Kixtaqla ajwi' xyeeb'al: “Il chi us, ani aj e li ke'leb' kaaxt a'in ut li xk'aamal ut li xuq' a'in?”.

²⁶ Naq laj Judá kiril naq re a'an, kixye: “Lix Tamar us chik xb'aanu chiru li xinb'aanu laa'in. Laa'in wank we, xb'aan naq ink'a' xink'e cho'q rixaqil laj Selá li walal”. Ut maajun wa chik kiwark rik'in lix Tamar.

²⁷ Naq kixtaw xq'ehil li alank, luteb' li k'uula'al ke'yo'laak.

²⁸ Sa' li xyo'lajikeb' jun reheb' kirisi chaq li ruq' ut laj xokol k'uula'al kixchap, kixb'ak' jun kaqi noq' chi xkux ruq' ut kixye: “A'in xyo'laak xb'enwa”.

²⁹ Ab'anan tikto li k'uula'al kiroksi wi' chik li ruq', ut a' chik li riitz'in kiyo'laak xb'enwa: “Nim laab'e xate chaq”, chan li ixq re. Ut aj Perés kixk'e cho'q xk'ab'a'.

³⁰ Chirix a'an kiyo'laak li jun chik li wank xkaqi noq' chi xkux ruq', ut aj Séraj kik'ehe'k cho'q xk'ab'a'.