Génesis 29 - Q'eqchi Bible

Laj Jakob sa' rochoch laj Labán

¹ Laj Jakob kixchap xb'e ut koho sa' xtenamiteb' li wankeb' sa' releb'l saq'e.

² Chiru taq'a kiril naq wank jun xjulel li ha' ut wankeb' oxib' ch'uut chi karneer tuntuukeb' chire ha', xb'aan naq aran neke'risi ruk'a'eb' li ketomq. Wank ajwi' jun nimla pek chi xtz'apb'al re xjulel li ha'.

³ Naq ch'utch'uukeb' chixjunileb' li ketomq, eb' laj k'aak'alenel neke'risi li pek sa' xb'een xjulel li ha' re xk'eeb'al ruk'a'eb' li karneer; toja' naq neke'xtz'ap wi' chik xb'een xjulel li ha'.

⁴ Laj Jakob kixpatz' reheb' laj k'aak'alenel karneer: “Ex was wiitz'in, b'ar eetenamit?”. Ke'chaq'ok eb' a'an ut ke'xye: “Laa'o aj Harán”.

⁵ “Ma nekenaw ru laj Labán, ralal laj Najor?”, chan laj Jakob. “Naqanaw ru”, chankeb' a'an.

⁶ Kixpatz' wi' chik laj Jakob: “Ma sa sa' xch'ool laj Labán?”. Ke'chaq'ok: “Hehe'. Wank le' chaq lix Rakel li xrab'in, rochb'eeneb' li xkarneer”, chankeb'.

⁷ Toja' naq kixye laj Jakob: “Toj kutan chi us; maji' xhonalil xch'utub'ankileb' li ketomq. K'ehomaqeb' wank chik uk'ak ut ayuqex chi xk'eeb'aleb' chi ichajib'k”.

⁸ Ke'xsume: “Ink'a' tooruuq. Toj te'xch'utub' rib' chixjunileb' laj ilol ketomq ut taa'isiiq li pek sa' xb'een xjulel li ha', toja' naq tqak'eheb' chi uk'ak eb' li karneer”, chankeb'.

⁹ Toj yo ajwi' chi aatinak laj Jakob rik'ineb' naq kiwulak lix Rakel rochb'eeneb' xkarneer li xyuwa', xb'aan naq a'an aj k'aak'alenel ketomq.

¹⁰ Naq laj Jakob kiril lix Rakel, xrab'in laj Labán li rikan, rochb'eeneb' li xkarneer laj Labán, kinach'ok, kirisi li pek sa' xb'een xjulel li ha' ut kixk'eheb' chi uk'ak li xkarneer laj Labán, li ras li xna'.

¹¹ Chirix chik a'an kixtz'ub' ru lix Rakel ut ki'ok chi yaab'ak.

¹² Naq laj Jakob kixch'olob' chiru lix Rakel naq a'an rikaq' li xyuwa' ut xyum lix Rebeka, lix Rakel koho sa' aanil ut koxye re li xyuwa'.

¹³ Naq laj Labán kirab'i resil xwulajik laj Jakob, xyum li ranab', koho sa' aanil chi xk'ulb'al, kixq'alu, kixtz'ub' ru ut kixk'am sa' rochoch. Toja' naq laj Jakob kixseeraq'i re laj Labán chixjunil li xk'ulmank

¹⁴ ut laj Labán kixye re: “Relik chi yaal naq laa'at inb'aqel ut intib'el, laa'at wech kik'elil!”, chan. Ut laj Jakob kikanaak aran chiru jun po chi tz'aqal.

Xsumlajik laj Jakob rik'in lix Rakel ut lix Liiy

¹⁵ Toja' naq kixye laj Labán re laj Jakob: “Ma tatk'anjelaq tab'i' chi maatan yal xb'aan naq laa'at wikaq'? Ye we k'aru laatojb'al taawaj”.

¹⁶ Laj Labán wank wiib' xrab'in: li chaq'na'b'ej xLiiy xk'ab'a' ut li iitz'inb'ej a'an xRakel.

¹⁷ Lix Liiy wara wara rix ru, ut lix Rakel chaq'al ru ut ch'ina'us na'ilok.

¹⁸ Laj Jakob xkoho xch'ool chirix lix Rakel; jo'kan naq kixye re laj Labán: “Tink'anjelaq chawu wuqub'aq chihab' sa' xk'ab'a' lix Rakel, laarab'in iitz'inb'ej”.

¹⁹ Kixye laj Labán: “Us naq tink'e aawe laa'at chiru naq tink'e re anihaq. Kanaaqat b'i' wik'in”, chan.

²⁰ Laj Jakob kik'anjelak wuqub' chihab' sa' xk'ab'a' lix Rakel, chi ink'a' kireek'a naq kinume'k li kutan, xb'aan naq k'ajo' naq naxra lix Rakel.

²¹ Naq kinume'k li wuqub' chihab', laj Jakob kixye laj Labán: “K'e we li wixaqil xb'aan naq xtz'aqlok xq'ehil ut twaj tinsumlaaq rik'in”.

²² Toja' naq laj Labán kixb'oq chixjunileb' li rech k'alebaalil ut kixk'e jun nimla ninq'e.

²³ Ab'an, naq ki'ewuuk, kixk'am lix Liiy li xrab'in ut koxq'axtesi re laj Jakob, li kiwark rik'in.

²⁴ Laj Labán kixk'e lix Silpá cho'q aj k'anjel chiru lix Liiy li xrab'in.

²⁵ Naq kisaqewk, laj Jakob kixk'e reetal naq a'an lix Liiy! Ut kixye re laj Labán: “K'aru xab'aanu we? Ma ink'a' tab'i' xink'anjelak chawu sa' xk'ab'a' lix Rakel? K'a'ut naq xinaab'alaq'i?”, chan.

²⁶ Kichaq'ok laj Labán: “Sa' qayanqil ink'a' k'aynaqo chi xk'eeb'al xb'enwa li iitz'inb'ej chiru li chaq'na'b'ej.

²⁷ Tz'aqob'resi li xamaan rik'in a'an ut tink'e aawe lix Rakel; ab'anan tento naq tatk'anjelaq wuqub' chihab'aq chik”.

²⁸ Jo'ka'in kixb'aanu laj Jakob. Naq kitz'aqlok li xamaan a'an, laj Labán kixk'e lix Rakel li xrab'in cho'q rixaqil.

²⁹ Laj Labán kixk'e xBilhá cho'q aj k'anjel chiru lix Rakel li xrab'in.

³⁰ Laj Jakob kiwark ajwi' rik'in lix Rakel ut q'axal kixra chiru lix Liiy; ut kik'anjelak wuqub' chihab' chik sa' rochoch li rikan.

Ralaleb' laj Jakob

³¹ Naq li Qaawa' kiril naq ink'a' narahe'k lix Liiy, kixk'e chi alank; ut lix Rakel kiwank cho'q xma'al ixq.

³² Lix Liiy kikanaak sa' yu'am ut kiwank jun xk'uula'al: aj Rubén kixk'e cho'q xk'ab'a', xb'aan naq kixye: “Li Qaawa' xril xrahilal inch'ool: anaqwan tinxra chik linb'eelom”.

³³ Kikanaak wi' chik sa' yu'am, kiwank xkab' xk'uula'al ut aj Simehón kixk'e cho'q xk'ab'a': “Li Qaawa' xrab'i naq ink'a' ninrahe'k; jo'kan naq xk'e ajwi' link'uula'al a'in”, chan.

³⁴ Kisiyank wi' chik, kiwank rox xk'uula'al ut kixye: “Anaqwan linb'eelom chiwix chik taaxik xch'ool, xb'aan naq ak oxib' li ralal xink'e re”. Ut aj Leví kixk'e cho'q xk'ab'a' li xk'uula'al.

³⁵ Kisiyank wi' chik, kiwank xka xk'uula'al, aj Judá xk'ab'a', ut kixye: “Anaqwan tinloq'oni li Qaawa'”. Chirix chik a'an ink'a' chik ki'alank.