Génesis 27 - Q'eqchi Bible

3. LAJ JAKOB (27-36) Laj Isahak kirosob'tesi xb'enwa laj Jakob

¹ Ak tiix chik laj Isahak ut ink'a' chik na'ilok xb'aan naq yo chi moyk xsa' li ru. Toja' naq kixb'oq laj Esaú li xb'een ralal: “At walal”, chan re. Ut a'an kichaq'ok: “We'kin”.

² Kixye laj Isahak: “K'e reetal, tiixin chik ut ink'a' ninnaw li xkutankil linkamik.

³ Jo'kan b'i', k'am laasimaj rochb'een li xna'aj; ayu sa' k'iche' ut yohon chaq.

⁴ Moqon taak'uub' chi chaab'il intzekemq jo' nawulak chiwu, ut taak'am chaq, re tinwa'aq, xb'aan naq twaj aawosob'tesinkil rub'elaj linkamik”.

⁵ Ab'an lix Rebeka kirab'i li kixye laj Isahak re laj Esaú ut naq a'in koho sa' k'iche' chi yohok cho'q re li xyuwa',

⁶ kixb'oq chaq laj Jakob li xyum ut kixye re: “Toja' xwab'i laayuwa' chi aatinak rik'in laj Esaú laawas, ut xye re:

⁷ «Yohon chaq cho'q we ut taayiib' lintzekemq chi chaab'il re tinwa'aq ut tatwosob'tesi chiru li Qaawa', rub'elaj linkamik», chan.

⁸ Us, a wa', chapaab' li tinye aawe.

⁹ Ayu wankeb' wi' li ketomq ut k'am chaq wiib'aq chaab'il chib'aat, ut laa'in tink'uub' jun chaab'il tzekemq cho'q re laayuwa', kama' nawulak chiru.

¹⁰ Laa'at toxaak'e re laayuwa' re tixtzeka ut tatrosob'tesi rub'elaj li xkamik”, chan lix Rebeka.

¹¹ Kixye laj Jakob re lix Rebeka li xna': “Q'ol is rix laj Esaú li was ut laa'in ink'a'!

¹² Mare anchal tinxmaayu linyuwa' ut tixk'oxla naq yookin chi xb'alaq'inkil. Jo'kan naq a' chik inmaa'usilankil tinb'oq chaq chiru li wosob'tesinkil!”.

¹³ Kixye ut li na'b'ej re: “Chikanaaq sa' inb'een laamaa'usilankil, a wa'. Ka'ajwi' chinaapaab'. Ayu ut k'ameb' chaq li chib'aat”.

¹⁴ Koho laj Jakob chi xsik'b'aleb' li chib'aat ut kixk'ameb' chaq rik'in li xna', ut a'an kixk'uub' chi chaab'il li tzekemq, jo' nawulak chiru li yuwa'b'ej.

¹⁵ Moqon lix Rebeka kixxok chaq li raq' laj Esaú, li xb'een xyum, a' li q'axal ch'ina'us li wank sa' rochoch, ut kixk'e chirix laj Jakob, li iitz'inb'ej.

¹⁶ Chirix chik a'an kixb'at li ruq' ut li rix xkux rik'in rix li chib'aat,

¹⁷ ut kixk'e sa' ruq' laj Jakob li tzekemq ut li wa kixk'uub'.

¹⁸ Laj Jakob kox'okaq wan wi' li xyuwa' ut kixye: “Wa'!”. Kixye laj Isahak: “We'kin. Anihat, at walal?”.

¹⁹ Kixye laj Jakob re li xyuwa': “Laa'in laj Esaú, li xb'een aawalal. Xinb'aanu jo' xaye we. Waklin, k'ojlan ut tzeka li xinyo chaq, re naq tinaawosob'tesi”, chan.

²⁰ Laj Isahak kixsume li ralal: “Q'axal junpaatat chi xtawb'al chaq li xul, at walal!”, chan. Kichaq'ok laj Jakob ut kixye: “Li Qaawa' laaYos xk'ehok re sa' wuq'”.

²¹ Kixye laj Isahak re laj Jakob: “Jilon chaq, at walal, tatinmaayu: ma laa'at laj Esaú li walal malaj ink'a'”.

²² Kijilok ut laj Jakob chi xk'atq laj Isahak li xyuwa', ut a'an kixmaayu ut kixye: “Li xyaab' kuxej, a'an re laj Jakob, a'ut li uq'mej re laj Esaú”.

²³ Ut ink'a' kixnaw ru xb'aan naq q'ol is li ruq' kama' li ruq' laj Esaú li ras. Ok raj re chi rosob'tesinkil

²⁴ naq kixye: “Ma relik chi yaal naq laa'at laj Esaú li walal?”. Ut a'an kichaq'ok: “Laa'inin”, chan.

²⁵ Toja' naq li yuwa'b'ej kixye: “Jilosi chaq lintzekemq li xayo chaq, at walal, re naq tatwosob'tesi”. Laj Jakob kixjilosi li tzekemq; kixk'am ajwi' chaq xb'iin, ut laj Isahak kiwa'ak ki'uk'ak.

²⁶ Chirix chik a'an kixye: “Jilon chaq, at walal, ut tz'ub' wu”.

²⁷ Naq laj Jakob kijilok chi xk'atq ut kixtz'ub' ru, laj Jakob kirutz' li xb'ook li raq', kirosob'tesi ut kixye: “Li xb'ook li walal chanchan li xb'ook li ch'och' osob'tesinb'il xb'aan li Qaawa'.

²⁸ Li Yos chixk'e taxaq aawe li k'ajob' li nachalk sa' choxa, li xchaq'alil ru li ch'och' ut naab'al laatriiw ut laa'uub'.

²⁹ Che'xk'anjela ta aawu eb' li tenamit, chate'roxloq'i taxaq chixjunileb' li xteepal li ruuchich'och'. Laa'ataq aj taqlanel sa' xb'eeneb' laawiitz'in ut chate'roxloq'i taxaq eb' li xyum laana'. Li taatz'eqtaananq aawe, tz'eqtaananb'ilaq ajwi' a'an; ut li taa'osob'tesinq aawe, osob'tesinb'ilaq ajwi' a'an”.

³⁰ Ak kiraqe'k laj Isahak chi rosob'tesinkil laj Jakob ut toja' taa'elq laj Jakob rik'in laj Isahak li xyuwa', naq kisutq'iik chaq chi yohok laj Esaú li asb'ej.

³¹ Kixk'uub' a'an ajwi' chi chaab'il jun tzekemq ut naq kixk'am rik'in li xyuwa': “Waklin, at inyuwa' -chan re- ut tzeka li xyo chaq laawalal, re naq tinaawosob'tesi”.

³² Tikto kixye laj Isahak li xyuwa': “Anihat laa'at?”. Kichaq'ok a'an: “Laa'in laj Esaú, li xb'een aawalal”.

³³ Toja' naq laj Isahak taasiksotq chi sachso li xch'ool ut kixye: “Ani put li xk'am chaq chintzeka li xyohom? Xb'aan naq, toj maji' nakatk'ulunk laa'at, xinwa'ak laa'in ut xinwosob'tesi a'an, ut osob'tesinb'ilaq chi junelik”.

³⁴ Naq laj Esaú kirab'i li xye li xyuwa', kixjap re chi kaw xb'aan xrahil xch'ool ut kixye re li xyuwa': “Chinaawosob'tesi ajwi' laa'in, at inyuwa'!”.

³⁵ Kichaq'ok li yuwa'b'ej: “Xk'ulunk sa' b'alaq'il laawiitz'in ut xmaq' laawosob'tesinkil”, chan.

³⁶ Kixye laj Esaú: “Jo'kan pe' naq aj Jakob naxk'ab'a'in, xb'aan naq ka' sut xb'aanu we a'in: xmaq' linb'eenil alalb'ejil, ut anaqwan xmaq' li wosob'tesinkil”. Kixye ajwi': “Ma ink'a' xak'uula junaq wosob'tesinkil?”.

³⁷ Kichaq'ok laj Isahak ut kixye re laj Esaú: “K'e reetal, xink'e laj Jakob cho'q aj eechal aawe; xink'e chixjunileb' li riitz'in cho'q aj k'anjel chiru ut xink'e xtriiw ut xb'iin. Anaqwan k'a' ta chik ru tinb'aanu cho'q aawe, at walal?”.

³⁸ Kixye laj Esaú re li xyuwa': “Ma ka'aj ta wi' jun laawosob'tesihom, at inyuwa'? Osob'tesin ajwi' laa'in, at inyuwa'!”. Ink'a' kichaq'ok laj Isahak ut laj Esaú kixjap re chi yaab'ak.

³⁹ Toja' naq laj Isahak kixsume chi jo'kan: “Najtaq chik laawochoch rik'in li chaab'il ch'och', najtaq ajwi' rik'in li xk'ajob' li choxa.

⁴⁰ Rik'in laach'iich' taakol rix laayu'am ut chiru laawiitz'in tatk'anjelaq; ab'an naq tatkawuuq, taawisi aawib' rub'el li xwankilal”.

Laj Jakob ki'elelik chiru laj Esaú

⁴¹ Chalen sa' li kutan a'an laj Esaú ki'ok chi xxik'b'al rilb'al laj Jakob xb'aan li osob'tesiik xk'ulum rik'in li xyuwa'. Ut kixye sa' xch'ool: “Taanach'oq chaq li xkamik linyuwa'. Toja' naq tinkamsi laj Jakob li wiitz'in”, chan sa' xch'ool.

⁴² Naq lix Rebeka kirab'i resil li k'aru yo chi xyeeb'al laj Esaú li asb'ej, kixtaqla xb'oqb'al laj Jakob li iitz'inb'ej ut kixye re: “K'e reetal naq laj Esaú laawas traj xk'eeb'al reeqaj li kixk'ul, ut traj aakamsinkil.

⁴³ Jo'kan b'i', a wa', paab' li tinye aawe: Xaqlin ut elelin toj Harán wan wi' laj Labán li wiitz'in.

⁴⁴ Kanaaqat jun k'amokaq aran toj reetal taanume'q xjosq'il laawas.

⁴⁵ Naq akaq xnume'k xjosq'il laawas ut xsachk sa' xch'ool li xab'aanu, toja' naq tintaqla aak'amb'al chaq. Ink'a' nawaj texinsach eekab'ichal sa' jun chi kutan”.

⁴⁶ Chirix chik a'an lix Rebeka kixye re laj Isahak: “Xintitz'k chi wank sa' xyanqeb' li xrab'ineb' laj Hit. Wi laj Jakob tixk'am cho'q rixaqil junaq xrab'ineb' laj Hit kama' li wankeb' arin, k'a' chik aj e naq yo'yooqin?”, chan.