Génesis 21 - Q'eqchi Bible

Xyo'lajik laj Isahak

¹ Li Qaawa' kirula'ani lix Sara jo' yeeb'il chaq re, ut li Qaawa' kixb'aanu re lix Sara li b'arwan kixyeechi'i.

² Lix Sara kikanaak sa' yu'am ut kirala jun xk'uula'al laj Abrahán sa' xtiixilal, sa' xq'ehil yeeb'il chaq re xb'aan li Yos.

³ Ut laj Abrahán kixk'e Isahak cho'q xk'ab'a' li k'uula'al li kiyo'laak, a' li kiyo'laak rik'in xSara.

⁴ Waqxaqib' kutan chik xyo'lajik li k'uula'al, laj Abrahán kixset xtz'uumal li xtz'ejwal laj Isahak, jo' chanru chaq'rab'inb'il wi' xb'aan li Yos.

⁵ O'k'aal (100) chihab' wank re laj Abrahán naq kiyo'laak laj Isahak li ralal.

⁶ Toja' naq kixye lix Sara: “Li Yos xinxk'e chi se'ek; chixjunil li taa'ab'inq re a'an, taase'eq wochb'een.

⁷ Ani anchal xyehok re laj Abrahán naq lix Sara taatu'resinq k'uula'al? Us b'i', laa'in xink'e jun xk'uula'al sa' xtiixilal”.

Lix Agar rochb'een laj Ismael ke'isiik sa' rochoch laj Abrahán

⁸ Kik'iik li k'uula'al ut kimaq'e'k li xtu'. Ut laj Abrahán kixk'e jun nimla ninq'e sa' li kutan a'an.

⁹ Kiril lix Sara naq li ralal laj Abrahán li kiyo'laak rik'in lix Agar aj Ejiipt, yo chi b'atz'unk rik'in li xyum;

¹⁰ jo'kan naq kixye re laj Abrahán: “Aanilasi li ixq a'an rochb'een li xyum, xb'aan naq li xyum li loq'b'il ixq a'an ink'a' naru taatz'aq li reechanihom laj Isahak linyum”, chan.

¹¹ K'ajo' naq kiraho'k xch'ool laj Abrahán, xb'aan naq laj Ismael ralal ajwi'.

¹² Ab'an li Yos kixye re laj Abrahán: “Miraho'k aach'ool chirix laamoos ixq. Chixjunil li tixye aawe lix Sara, chapaab', xb'aan naq eb' li te'k'amoq re laak'ab'a' a'aneb' li ralal xk'ajol laj Isahak.

¹³ Ut li xyum laamoos ixq, laa'in tink'e naq jun xnimal ru tenamit taa'elq rik'in, xb'aan naq a'an ajwi' aawalal”, chan li Yos.

¹⁴ Kiwakliik laj Abrahán toj eq'la. Kixk'e chi xk'am xwa ut jun kuk xha' lix Agar; kixk'e chi xjelo li ch'ina'al ut kixchaq'rab'i. Ut a'an kixchap xb'e ut koho sa' li chaqich'och', sa' xteepal Berseba.

¹⁵ Naq kilajk li ha' sa' li kuk, lix Agar kixkanab' laj Ismael sa' xmu jun li ch'ina che'

¹⁶ ut koxchunub' rib' najt kach'inaq rik'in li ch'ina'al, xb'aan naq kixye sa' xch'ool: “Ink'a' nawaj rilb'al chi kamk linyum”. Ut naq chunchu aran lix Agar, ke'ok chi yaab'ak rochb'een li ch'ina'al.

¹⁷ Kirab'i li Yos li xyaab' xkux li ch'ina'al ut li x'ánjel li Qaawa' kiraatina chaq lix Agar toj sa' choxa ut kixye re: “K'aru xak'ul, a Agar? Matxiwak, xb'aan naq li Yos xrab'i xyaab' xkux li ch'ina'al aran b'arwi' wank.

¹⁸ Xaqlin! Waklesi li ch'ina'al ut chap chi ruq' xb'aan naq tink'e cho'q xnimal ru tenamit”.

¹⁹ Toja' naq li Yos kixk'e chi ril lix Agar jun xjulel li ha'. Koho, kixnujob'resi li kuk ut kixk'e chiru'k li ch'ina'al.

²⁰ Li Yos kixtenq'a li ch'ina'al: a'an kiwinqilo'k ut kiwank sa' li chaqich'och'; kixtzol chi us li kutuk rik'in simaj.

²¹ Kiwank sa' li chaqich'och' Parán xk'ab'a', ut li xna' kisik'ok re li rixaqil sa' li tenamit Ejiipt.

Laj Abrahán ut laj Abimélek aran Berseba

²² Sa'eb' li kutan a'an laj Abimélek rochb'een laj Pikol, xjolomileb' laj puub', kixye re laj Abrahán: “Li Qaawa' Yos wank aawik'in rik'in chixjunil li nalajaab'aanu.

²³ Jo'kan b'i', arin ajwi' ye laawaatin sa' xk'ab'a' li Yos naq ink'a' tinaab'alaq'i, chi moko taab'alaq'iheb' li walal ink'ajol, chi moko eb' li wi inmam: jo' naq xinb'aanu usilal aawe, jo'kan ajwi' taab'aanu we ut re li tenamit li xatqak'ul wi' jo' tz'aqal qula'”.

²⁴ Kixye laj Abrahán: “Ninye sa' xk'ab'a' li Qaawa'”.

²⁵ Ab'an laj Abrahán kijitok chiru laj Abimélek chirix jun b'ekb'il ha' li kimaq'e'k chiru xb'aaneb' laj k'anjel chiru laj Abimélek.

²⁶ Ut kixye laj Abimélek: “Ink'a' ninnaw ani xb'aanunk re a'an. Laa'at ink'a' xaye we, chi moko laa'in xinnawok re toj anaqwan”, chan.

²⁷ Toja' naq laj Abrahán kixchapeb' xkarneer ut xwakax, kixk'eheb' re laj Abimélek ut ke'xk'ojob' jun sumwank.

²⁸ Laj Abrahán kixjek' wuqub' ixqikarneer,

²⁹ ut laj Abimélek kixye re laj Abrahán: “K'a' aj e li wuqub' chi ixqikarneer a'in li xajek'?”, chan.

³⁰ Kichaq'ok a'an ut kixye: “Li wuqub' chi ixqikarneer a'in taak'ul chi wuq' re naq a'anaqeb' reetalil naq laa'in xinb'ekok re li ha' a'in”.

³¹ Jo'kan naq li na'ajej a'an Berseba naxk'ab'a'in, xb'aan naq aran laj Abrahán ut laj Abimélek ke'xk'e rib' sa' aatin rik'in jurament.

³² Naq ak xe'xk'ojob' li sumwank aran Berseba, laj Abimélek rochb'een laj Pikol, xjolomileb' laj puub', ke'xaqliik ut ke'sutq'iik sa' xtenamiteb' laj Filistea.

³³ Toja' naq laj Abrahán kiraw jun toon chi tamarisko aran Berseba ut kixyaab'a xk'ab'a' li Qaawa', li junelik Yos.

³⁴ Laj Abrahán najt kiwank sa' xch'och'eb' laj Filistea.