Génesis 20 - Q'eqchi Bible

Laj Abrahán ut laj Abimélek aran Kerar

¹ Ki'elk laj Abrahán aran, kiq'axonk toj Nejeb ut koxkanaaq sa' li tenamit Kerar, sa' xyanq Kadés rik'in Sur.

² Aran laj Abrahán naxye naq lix Sara, li rixaqil, a'an ranab'. Jo'kan naq li awab'ej re Kerar, aj Abimélek xk'ab'a', kixtaqla xk'amb'al lix Sara.

³ Ab'anan li Yos kiraatina laj Abimélek chiru q'oqyink ut kixye re sa' xmatk': “Tatkamq, xb'aan naq li ixq xak'am chaq wank xb'eelom”, chan.

⁴ Laj Abimélek toj maji' nawank rik'in li ixq, ut kixye: “Qaawa', ma taakamsi ajwi' eb' li tiikeb' xch'ool?

⁵ Ma ink'a' tab'i' xye we laj Abrahán: «A'an wanab'»? Ma ink'a' tab'i' li ixq xyehok: «A'an was»? Rik'in xchaab'ilal linch'ool ut chi saq ru li waanm xinb'aanu a'in”, chan.

⁶ Kichaq'ok li Yos ut kixye re sa' xmatk': “Ak ninnaw chi us naq rik'in xchaab'ilal laach'ool xab'aanu a'an; laa'in ajwi' xatinram re naq ink'a' tatmaakob'q chiwu. Jo'kan naq ink'a' xatink'e chi wank rik'in.

⁷ Anaqwan q'ajsi li ixq re li xb'eelom, xb'aan naq a'an propeet ut taatijoq chawix re naq toj tatyo'yooq. Ab'an, wi ink'a' taaq'ajsi, chanaw naq relik chi yaal tatkamq laa'at jo' ajwi' li wankeb' sa' laawochoch”, chan li Yos.

⁸ Toj eq'la kiwakliik laj Abimélek, kixb'oq chixjunileb' laj k'anjel chiru ut kixseeraq'i chixjunil a'in reheb'. K'ajo' naq ki'ok xxiweb' li winq.

⁹ Chirix chik a'an laj Abimélek kixb'oq laj Abrahán ut kixye re: “K'aru xab'aanu qe malaj k'aru xinmaakon chawu, naq xak'am chaq li nimla maak a'in sa' inb'een ut sa' xb'een ajwi' chixjunil lintenamit? Li ink'a' nab'aanumank, laa'at xab'aanu we.

¹⁰ K'aru xnume'k sa' laach'ool naq xab'aanu a'in?”.

¹¹ Kixye laj Abrahán: “Xinye sa' inch'ool: Mare sa' li tenamit a'in ink'a' neke'xxiwa ru li Yos; ut tine'xkamsi xb'aan li wixaqil -chankin sa' inch'ool-.

¹² Ab'an yaal ajwi' naq a'an wanab', xrab'in linyuwa' us ta ink'a' rik'in linna'. Jo'kan naq xink'am cho'q wixaqil.

¹³ Ut chalen naq li Yos xinxk'e chi xb'eeninkil wib' chi najt rik'in linyuwa', ninye re: B'aanu usilal: yalaq b'ar toxoo'okaq, chayehaq naq laa'in aawas”.

¹⁴ Toja' naq laj Abimélek kixchap xkarneer, xwakax, winq ut ixq aj k'anjeleb' chiru, ut kixk'eheb' re laj Abrahán; kixq'ajsi ajwi' lix Sara, li rixaqil.

¹⁵ Ut kixye re laj Abrahán: “K'e reetal, we' lintenamit: kanaaqat b'ar taawulaq chawu”.

¹⁶ Kixye ajwi' re lix Sara: “K'e reetal, xink'e re laawas lajeek'aal rox o'q'ob' (1,000) chi tumin plaat re naq maajun sa' xyanqeb' li wankeb' aawik'in taajitoq aawe. Chi jo'kan chaab'ilaq laawesil chi junelik”, chan.

¹⁷ Toja' naq laj Abrahán kitz'aamank chiru li Yos, ut li Yos kixk'irtasi laj Abimélek, li rixaqil ut chixjunileb' li ixq aj k'anjel chiru, re naq te'alanq wi' chik:

¹⁸ xb'aan naq chalen li xk'ulmank rik'in lix Sara, li rixaqil laj Abrahán, li Qaawa' ink'a' chik kixk'eheb' chi alank eb' li wankeb' sa' rochoch laj Abimélek.