Génesis 18 - Q'eqchi Bible

Li Qaawa' Yos kixk'ut rib' aran Mambré

¹ Li Qaawa' kixkut rib' chiru laj Abrahán wan wi' li ji re Mambré, naq k'ojk'o chire li xmuheb'aal xb'aan xtiqwal ru li kutan.

² Kixtaqsi li rilob'aal ut k'utaamileb' oxib' chi winq xaqxookeb' chi xk'atq. Naq kirileb', ki'elk chaq chire li xmuheb'aal chi xk'ulb'aleb', kixhupub' rib'

³ ut kixye: “At inQaawa', wi usilal xintaw chawu, ma tik at nume'k chi xk'atq laj k'anjel chawu.

⁴ Tintaqla xk'amb'al chaq b'ayaq li ha' re xch'ajb'al leeroq. Hilanqex wan sa' xmu li che'

⁵ ut laa'in tink'am chaq kach'inaq eewa re taak'ulunq eech'ool. Toja' naq texxik: a'in aj e naq xexnume'k rik'in laj k'anjel cheru”. Ke'chaq'ok eb' a'an: “Us, maak'a' naxye”, chankeb'.

⁶ Koho laj Abrahán chi junpaat sa' xmuheb'aal, wan wi' lix Sara, ut kixye re: “Seeb'a oxib'aq aroow chi k'aj, yoq' ut yiib' kach'inaq li k'uluj”.

⁷ Chirix a'an laj Abrahán koho sa' aanil wankeb' wi' li xwakax, kixchap jun ch'ina wakax q'axal chaab'il, kixk'e re li xmoos ut a'in kixseeb'a xk'uub'ankil.

⁸ Chirix chik a'an kixsi xrekesón, xya'al xtu' wakax ut li k'uub'anb'il tib', ut koxk'e reheb': xaqxo chiruheb' rub'el li che' naq yookeb' chi wa'ak.

⁹ Eb' a'an ke'xye re: “B'ar wank lix Sara laawixaqil?”. “Wank aran sa' kab'l”, chan reheb'.

¹⁰ Kixye li rula': “Tolin'elq wi' chik aawik'in sa' jun chihab' chik, ut aran lix Sara laawixaqil taawanq jun xk'uula'al”. B'alb'o lix Sara chire li kab'l, yo chi rab'inkil.

¹¹ Laj Abrahán ut lix Sara ak tiixeb' chik, ak xikenaq xhab'eb', ut lix Sara ak raqenaq xpuch'unik.

¹² Jo'kan naq lix Sara kise'ek sa' xch'ool ut kixye: “Ma anaqwan, naq tiixin chik, taasaho'q inch'ool? Ak xmama'o' ajwi' linb'eelom”.

¹³ Kixye li Qaawa' re laj Abrahán: “K'a'ut naq xse'ek lix Sara ut xye: «Ma yaal naq taawanq ink'uula'al anaqwan sa' lintiixilal?».

¹⁴ Ma wank tab'i' k'aru ch'a'aj chiru li Qaawa'? Sa'eb' li kutan xinye, sa' jun chihab' chik, tinsutq'iiq chaq, ut lix Sara taawanq jun xk'uula'al”.

¹⁵ Kixiwak lix Sara ut kixye: “Ink'a' ninse'ek”. Ab'an li Qaawa' kixye re: “Maaye a'an. Yaal naq xatse'ek”.

Laj Abrahán ki'aatinak chirix li tiikeb' xch'ool

¹⁶ Ke'xaqliik eb' li winq ut koheb' sa' xb'ehil Sodoom. Laj Abrahán kirochb'eeniheb' re xchaq'rab'inkileb'.

¹⁷ Toja' naq li Qaawa' kixye: “Ink'a' truuq tinmuq chiru laj Abrahán li k'aru ok we chi xb'aanunkil.

¹⁸ Laj Abrahán a'anaq jun xnimal ru tenamit q'axal kawaq rib'. Sa' xk'ab'a' a'an osob'tesinb'ilaqeb' chixjunil li tenamit sa' ruuchich'och'.

¹⁹ Sik'b'il chaq ru inb'aan re naq tixk'ut li b'eek jo' naraj li Qaawa' chiruheb' li ralal xk'ajol jo'wi' chiruheb' li te'wanq moqon, re naq te'wanq sa' tiikilal ut sa' chaab'ilal. Chi jo'kan tink'e re laj Abrahán li b'arwan xinyeechi'i re”.

²⁰ Kixye ajwi' li Qaawa': “Jwal kaw li xyaab' kuxej neke'jite'k wi' eb' laj Sodoom ut laj Gomoor, ut q'axal nim li xmaakeb'.

²¹ Tinkub'eeq ut toxwil ma yaal li neke'jite'k wi' chiwu malaj ink'a'. Tento toxinnaw”.

²² Ke'elk ut aran eb' li winq ut koheb' sa' xb'ehil Sodoom; ab'an laj Abrahán kikanaak chi xaqxo chiru li Qaawa'.

²³ Kinach'ok laj Abrahán rik'in ut kixye re: “Ma taasach laa'at li tiikeb' xch'ool rochb'eeneb' laj maak?

²⁴ Mare anchal wanqeb' sa' li tenamit lajeeb'aq roxk'aal tiikeb' xch'ool. Ma taasacheb'? Ma ink'a' taakuyeb' xmaak li tenamit a'an sa' xk'ab'a' li lajeeb' roxk'aal tiikeb' xch'ool li wanqeb' aran?

²⁵ Ink'a' naru taab'aanu a'an; ink'a' naru xk'eeb'al chi kamk li tiik xch'ool rochb'een laj maak. Ma truuq tab'i' naq tixk'ul li jun li b'arwan xk'ulum li jun chik? Ink'a' naru taab'aanu. Laj raqol aatin sa' xb'een chixjunil li ruuchich'och' ma ink'a' tab'i' taaraqoq aatin sa' tiikilal?”, chan laj Abrahán.

²⁶ Kichaq'ok li Qaawa': “Wi ta teb'intaw sa' li tenamit Sodoom lajeeb'aq roxk'aal tiikeb' xch'ool, sa' xk'ab'a'eb' a'an tinkuyeb' xmaak chixjunil li tenamit”, chan.

²⁷ Kixye laj Abrahán: “At inQaawa', chakuyaq inmaak. Yal pojtz'in ut chahin, ab'anan ink'a' ninxiwak chawaatinankil.

²⁸ Wi ka'ajwi' taataw oob' roxk'aal li tiikeb' xch'ool, ma taasach chixjunil li tenamit yal sa' xk'ab'a'eb' li oob'?”. Kichaq'ok li Qaawa' ut kixye: “Wi wankeb' oob' roxk'aal li tiikeb' xch'ool, ink'a' tinsach li tenamit”.

²⁹ Kixye wi' chik laj Abrahán: “Ut wi ka'k'aal ajwi' taataw aran, ma taasach chixjunil li tenamit?”. Kichaq'ok li Qaawa': “Ink'a' ajwi' tinsach, sa' xk'ab'a'eb' li ka'k'aal a'an”, chan.

³⁰ Kixye laj Abrahán: “Matpo'k, at inQaawa', wi toj tinye aawe. Mare anchal lajeeb' xka'k'aal ajwi' taataw”. Kisumeek: “Ink'a' tinb'aanu, wi teb'intaw lajeeb' xka'k'aal”.

³¹ Kixye wi' chik laj Abrahán: “At inQaawa', chakuyaq inmaak. Ink'a' ninxiwak chawaatinankil: wi junmay ajwi' li tiikeb' xch'ool, ma taasach chixjunil li tenamit?”. Kichaq'ok li Qaawa' ut kixye: “Ink'a' ajwi' tinsach, sa' xk'ab'a'eb' li junmay”.

³² Jun sut chik ki'aatinak laj Abrahán: “Matpo'k, at inQaawa'. Ka'aj chik anaqwan tin'aatinaq. Ut wi lajeeb' ajwi' taataw aran, ma taasach chixjunil li tenamit?”. Kisumeek: “Ink'a' ajwi' tinsach li tenamit, sa' xk'ab'a'eb' li lajeeb'”.

³³ Naq kiraqe'k chi aatinak rik'in laj Abrahán, li Qaawa' ki'elk aran ut laj Abrahán kisutq'iik sa' rochoch.