Génesis 16 - Q'eqchi Bible

Xyo'lajik laj Ismael

¹ Lix Saray, rixaqil laj Abrán, maak'a' xkok'al; ab'anan wank jun li ixq aj k'anjel chiru, Ejiipt xtenamit, x'Agar xk'ab'a'.

² Kixye ut lix Saray re laj Abrán: “Laa'at nakanaw naq li Qaawa' xinxkanab' cho'q xma'al ixq. Nintz'aama b'i' chawu naq tatwanq rik'in lix Agar, laj k'anjel chiwu: mare anchal tinmaatani jun k'uula'al rik'in”, chan. Laj Abrán kixpaab' li kiyehe'k re xb'aan lix Saray.

³ Jo'kan naq, lajeeb'aq chihab' rokik laj Abrán sa' xteepal Kanahán, lix Saray, rixaqil laj Abrán, kixb'oq lix Agar laj Ejiipt, ut kixq'axtesi re laj Abrán li xb'eelom, cho'q rixaqil.

⁴ Laj Abrán kiwank rik'in lix Agar, ut a'an kikanaak sa' yu'am. Ab'anan, naq kixk'e reetal naq wank sa' yu'am, ki'ok chi xtz'eqtaanankil lix Saray.

⁵ Toja' naq lix Saray kixye re laj Abrán: “Aamaak laa'at naq yookin chi xk'ulb'al li rahilal a'in. Laa'in xinq'axtesi aawe lix Agar; ab'an, naq a'an xk'e reetal naq wank chik sa' yu'am, maak'a' chik nin'ok wi' re. Li Qaawa' chiraqoq aatin sa' qab'een chi qakab'ichal”.

⁶ Kichaq'ok laj Abrán ut kixye: “Li ixq aj k'anjel chawu wank rub'el aawoq rub'el aawuq'. B'aanu re li k'aru taawaj”. K'ajo' naq lix Saray kijosq'o'k sa' xb'een lix Agar, ut a'in ki'elelik chiru.

⁷ Ab'an koxtawe'q xb'aan li x'ánjel li Qaawa' chire jun yo'leb'aal ha' sa' li chaqich'och', a' li wank sa' xb'ehil Sur:

⁸ “Agar, aj k'anjelat chiru lix Saray, b'ar xatchalk chaq ut b'ar xik aawe?”, chu'uxk re xb'aan li ánjel. Kichaq'ok a'an ut kixye: “Yookin chi elelik chiru lix Saray laj eechal we”.

⁹ Ut li x'ánjel li Qaawa' kixye re: “Sutq'in wi' chik rik'in laj eechal aawe ut paab'an chiru”.

¹⁰ Kixye ajwi': “Tink'ihob'resi eb' laawalal aak'ajol toj reetal ink'a' chik taaruuq rajlankileb' xb'aan xk'ihaleb'.

¹¹ K'e reetal, wankat sa' yu'am; taawanq jun aak'uula'al, ut a'an aj Ismael taak'e cho'q xk'ab'a', xb'aan naq li Yos xatrab'i sa' laarahilal.

¹² Chanchanaq junaq b'uur li wank sa' pim; taayaloq rik'ineb' chixjunil ut chixjunileb' te'yaloq rik'in. Sa' xka'yab'aal chixjunileb' li riitz'in tixyiib' li xmuheb'aal”.

¹³ Toja' naq lix Agar kixk'e “laa'at li Yos li na'ilok we” cho'q xk'ab'a' li Yos ki'aatinank re, xb'aan naq kixye sa' xch'ool: “Arin xwil ru li na'ilok we”.

¹⁴ Jo'kan naq li xjulel li ha' a'an “xha'el li Yo'yo li na'ilok we” nayeemank re. A'an wank sa' xyanq Kadés rik'in Béred.

¹⁵ Laj Abrán kiwank jun xk'uula'al rik'in x'Agar, ut aj Ismael kixk'e cho'q xk'ab'a'.

¹⁶ Waqib' ro'k'aal (86) chihab' wank re laj Abrán naq kiyo'laak laj Ismael rik'in lix Agar.