Génesis 15 - Q'eqchi Bible

Li xyeechi'om li Qaawa' ut li xSumwank rik'in laj Abrán

¹ Naq ak xk'ulmank chixjunil a'in, ki'aatinaak laj Abrán xb'aan li Qaawa' sa' moy u chi jo'ka'in: “Matxiwak, Abrán: laa'in laj kolol aawe. Q'axal nimaq laaq'ajkamunkil”, chan li Yos.

² Kichaq'ok laj Abrán ut kixye: “At inQaawa', k'a' aj e li taasi we, wi tinkamq chi maajun walal ink'ajol, ut laj Elieser aj Damaask taareechani li k'a'aq ru we?”.

³ Kixye ajwi' laj Abrán: “Maajun li walal xak'e we ut yal jun inmoos taa'eechaninq re linjunkab'lal”.

⁴ Ab'an li Qaawa' kixye re chi jo'ka'in: “Moko a'an ta taa'eechaninq re, a' b'an li tz'aqal aawalal”.

⁵ Ut kirisi laj Abrán chirix kab'l ut kixye re: “Il li choxa ut ajla li chahim, wi tatruuq rajlankileb'. Jo'kanaq xk'ihal eb' laawalal aak'ajol”.

⁶ Laj Abrán kixpaab' li Qaawa', ut a'an kik'ehe'k sa' ajl cho'q xtiikilal xch'ool.

⁷ Ut li Yos kixye re: “Laa'in li Qaawa' li kin'isink chaq aawe sa' li tenamit Ur, sa' xteepal Kaldeha, re xk'eeb'al li ch'och' a'in cho'q aana'aj”.

⁸ Kichaq'ok laj Abrán: “At inQaawa', k'aru tinnaw wi' naq tweechani a'an?”, chan.

⁹ Kixye li Qaawa': “K'am chaq jun li ixqiwakax aj oxib' chihab', jun li ixqichib'aat aj oxib' chihab', jun karneer aj oxib' chihab', jun mukuy ut jun ch'ina uut”.

¹⁰ Laj Abrán kixk'ameb' chaq li xul a'in, kixjacheb' sa' xyi ut kixk'e li junq jachal chiru li junq jachal chik; a'ut eb' li xik'anel xul ink'a' kixjacheb'.

¹¹ Ke'kub'e chaq li so'sol sa' xb'eeneb' li kamenaq xul, ab'an laj Abrán kixxib'esiheb'.

¹² Naq ok re li saq'e, kikub'eek xwara laj Abrán ut k'ajo' naq kixiwak.

¹³ Toja' naq li Qaawa' kixye re laj Abrán: “Chanawaq naq eb' laawalal aak'ajol te'kanaaq sa' ab'l aj ch'och' jo'aqeb' aj b'eenihom rib'; te'mine'q ru chi xb'aanunkil li kawil k'anjel ut te'rahob'tesiiq chiru jun o'q'ob' (400) chihab'.

¹⁴ A'ut laa'in tinraqoq aatin sa' xb'een li tenamit te'k'anjelaq wi' cho'q aj mun; chirix chik a'an te'elq chaq aran chi naab'alaq li xjunkab'laleb'.

¹⁵ Ut naq tiixaqat chi us, tatq'ajq tatsutq'iiq sa' tuqtuukilal rik'ineb' laana' laayuwa' ut tatmuqe'q.

¹⁶ Sa' li xka xteepal riyajileb' laawalal, eb' a'in te'sutq'iiq chaq arin xb'aan naq anaqwan toj maji' xtz'aqlok ru li xk'ihal xmaakeb' laj Amor”, chan li Qaawa'.

¹⁷ Ut naq ak x'ok li saq'e, k'utaamil sa' li aak'ab' jun nimla xam nab'uquqnak xsib'el, ut jun raq'xam kinume'k sa' xyiheb' li jachb'il xul.

¹⁸ Sa' li kutan a'an li Qaawa' kixk'ojob' jun Sumwank rik'in laj Abrán: “Xink'e li ch'och' a'in reheb' laawalal aak'ajol chalen chaq sa' li nima' re Ejiipt toj sa' li nimla nima', a' li Éwfrates.

¹⁹ A'an xch'och'eb' laj Ken, eb' laj Kenís, eb' laj Kadmón,

²⁰ eb' laj Hit, eb' laj Perés, eb' laj Refait,

²¹ eb' laj Amor, eb' laj Kanahán, eb' laj Kirkás ut eb' laj Jebús”.