Filipenses 3 - Q'eqchi Bible

Li tz'aqal xb'ehil li kolb'a ib'

¹ Ex was wiitz'in, chisaho'q sa' eech'ool sa' xk'ab'a' li Qaawa'. Moko ch'a'aj ta cho'q we xtz'iib'ankil wi' chik eerik'in li k'a'aq re ru ak inyehom chaq, ut a'an tixk'e xkawub' leech'ool.

² Chekol eerib' chiruheb' li tz'i'; chekol eerib' chiruheb' li maa'us aj k'anjel; chekol eerib' chiruheb' laj sirkunsisyon aj b'alaq'!

³ Eb' li tz'aqal xk'ulumeb' li sirkunsisyon a'ano laa'o, li naqaloq'oni ru li Yos jo' naraj li xMusiq', naqanima qib' sa' xk'ab'a' li Kristo Jesus ut ink'a' k'ojk'o li qach'ool ka'ajwi' rik'in li naqab'aanu qajunes.

⁴ Laa'in wank ajwi' k'aru tink'e wi' xkawilal inch'ool. Wi wank junaq naxk'oxla naq truuq tixtaw xkawilal li xch'ool, ma toja' ta chik laa'in.

⁵ Kink'ul li sirkunsisyon sa' xwaqxaq li kutan; laa'in aj Israel sa' xtepaal laj Benjamín, laa'in aj Hebreo kama'eb' ajwi' linna' linyuwa'; rik'in xpaab'ankil li Chaq'rab', laa'in aj Pariseey.

⁶ Q'axal kink'e inch'ool chi paab'ank toj reetal kinrahob'tesi li Iklees, ut maajun truuq tixwech' wix rik'in li tiikilal natawmank sa' xk'anjelankil xChaq'rab' laj Moisés.

⁷ Ut chixjunil a'in li q'axal kink'e xwankil junxil, nink'oxla naq maak'a' na'ok wi' sa' xk'ab'a' li Kriist.

⁸ A wi' chik a'in: chiwu laa'in chixjunil li k'a'aq re ru maak'a' na'ok wi' sa' xk'ab'a' li xnimal xloq'al xnawb'al ru li Kristo Jesus, linQaawa'. Sa' xk'ab'a' a'an xintz'eq chirix inch'ool chixjunil li k'a'aq re ru ut yal mul aj chik naq nawil, re naq tweechani li Kriist

⁹ ut tintawe'q rik'in, maawa' rik'in xtiikilal linch'ool li nachalk rik'in li Chaq'rab', rik'in b'an li nawank sa' xk'ab'a' xpaab'ankil li Kriist, a' li nachalk rik'in li Yos xb'aan li paab'aal.

¹⁰ Nawaj xnawb'al ru li Kriist ut li xwankil li xwaklijik chi yo'yo, nawaj ajwi' tz'aqonk sa'eb' li xrahilal: chi jo'kan, juntaq'eetanb'ilaqin rik'in A'an sa' li xkamik,

¹¹ tinyal inq'e chi reechaninkil li xwaklijikeb' chi yo'yo eb' li kamenaq.

¹² Moko ak ta xintaw a'in, chi moko ak ta tz'aqal we wu, toj yookin b'an chi xyalb'al inq'e re naq toxweechani xb'aan naq xin'eechaniik ajwi' laa'in xb'aan li Kristo Jesus.

¹³ Ex was wiitz'in, ink'a' nink'oxla naq ak ta xweechani. Ab'an li ninb'aanu, a'an a'in: ninsach sa' inch'ool li b'arwan xkanaak chaq chi ixb'ej ut ninyal inq'e chi xtawb'al li wank chi uub'ej;

¹⁴ sa' aanil ninxik sa' li xraqik re xk'ulb'al li q'ajkam li wank toj taqe'q, li nokooxb'oq wi' li Yos sa' xk'ab'a' li Kristo Jesus.

¹⁵ Jo'kan utan, chiqajunilo li tz'aqal qe qu sa' li qapaab'aal jo'kaq taxaq a'in li qak'a'uxl; ut wi rik'in k'aru jalan chik nekek'oxla, a'an ajwi' li Yos taach'olob'anq cheru.

¹⁶ Ab'anan toj b'arwi' xoowulak, xikaqo chi tiik chi uub'ej.

¹⁷ Ex was wiitz'in, chek'am eere wik'in ut cheka'yaheb' li neke'xtaaqe li b'e xqak'ut cheru.

¹⁸ Xb'aan naq naab'aleb' xik' neke'ril li xkrus li Kriist. A'in ak k'iila sut inyehom eere, ut anaqwan ninye wi' chik eere rik'in yaab'ak.

¹⁹ Ab'an li xraqikeb' a'in, a'an li sachk; li xyoseb' a'an li xsa'eb'; neke'xnimob'resi rib' sa' li xutaanalil na'leb' neke'xye neke'xb'aanu, ut ka'ajwi' li k'a'aq re ru wank sa' ruuchich'och' neke'reek'a xsahil.

²⁰ A'ut laa'o sa' choxa wank qatenamit, b'arwi' taak'ulunq chaq laj Kolonel li naqoyb'eni, a' li Qaawa' Jesukriist.

²¹ A'an taajaltesinq ru li qach'och'el qasululel chi nimaq xloq'al, re naq tkanaaq chi junajwa jo' li xjunxaqalil, sa' xk'ab'a' li xnimal xwankil li naruhank wi' xk'eeb'al chixjunil rub'el roq.