Filipenses 1 - Q'eqchi BibleXk'eeb'al sahil ch'oolej 1 Laa'in laj Pablo, wochb'een laj Timoteo, aj k'anjelo chiru li Kristo Jesus, nokootz'iib'ak rik'ineb' chixjunil li wankeb' xsantilal sa' xk'ab'a' li Kristo Jesus, eb' li wankeb' aran Filipos, rochb'eeneb' laj jolominel ut eb' li diákono. 2 Chiwanq taxaq eerik'in li usilal ut li tuqtuukilal nachalk rik'in li Yos li qaYuwa' ut rik'in li Qaawa' Jesukriist. Yoxink ut tz'aamank 3 Ninyoxink chiru linYos rajlal naq nekexjultiko'k we, 4 ut junelik nintz'aamank cherix chejunilex sa'eb' chixjunil lintij chi sa sa' inch'ool, 5 xb'aan naq xex'okenk sa' link'anjel chirix li Chaab'il Esilal chalen chaq sa' li xb'een kutan toj anaqwan. 6 K'ojk'o inch'ool naq li Yos li xyoob'ank re li chaab'il k'anjel a'in eerik'in yooq ajwi' chi xtz'aqob'resinkil ru, toj reetal sa' xkutankil li Kristo Jesus. 7 Xk'ulub' naq laa'in tweek'a chi jo'ka'in cherix chejunilex, xb'aan naq wankex sa' linch'ool, rik'in naq laa'ex jun chi tz'aqonk rik'in li rusilal li Yos k'eeb'il we, naq wankin sa' tz'alam jo' ajwi' naq ninkol rix li Chaab'il Esilal ut ninxaqab' xwankil. 8 Li Yos naxnaw chi us naq q'axal nekexinra chejunilex sa' li xrahom li Kristo Jesus. 9 Ut a'an a'in li nintz'aama sa' lintij: naq leerahom chik'iiq chi junelik rik'in xtawb'al eena'leb' jo'wi' xtawb'al xyaalal chixjunil, 10 re naq texruuq xsik'b'al ru li q'axal chaab'il, ut chi jo'kan maak'a'aq eemuxul, maak'a'aq eemaak sa' xkutankil li Kriist, 11 nujenaqaqex b'an rik'in li naruuchin li tiikilal sa' xk'ab'a' li Jesukriist cho'q re li xloq'al ut li xnimankil ru li Yos. Li xyu'am laj Pablo 12 Ex was wiitz'in, nawaj teenaw naq li k'aru xink'ul, xk'anjelak chi us re xpuktesinkil li Chaab'il Esilal. 13 Jo'kan naq jo'k'ihal li wankeb' sa' rochoch li ruuchil li awab'ej ut chixjunileb' li junch'ol chik neke'xnaw naq wankin sa' tz'alam sa' xk'ab'a' li Kriist. 14 Ut naab'aleb' laj paab'anel xe'kawuuk xch'ool chirix li Qaawa' sa' xk'ab'a' naq b'ak'b'ookin chi kareen, ut q'axal chik neke'xk'e xch'ool chi xyeeb'al li Raatin li Yos chi maak'a'eb' xxiw. 15 Yaal ajwi' naq wankeb' li neke'puktesink resil li Kriist yal xb'aan naq nikine'xkaqali ut nikine'xwech'i, ab'an wankeb' ajwi' neke'b'aanunk a'an chi anchaleb' xch'ool. 16 Eb' a'in neke'xpuktesi resil li Kriist xb'aan naq nikine'xra ut neke'xnaw naq xaqab'anb'ilin chi xkolb'al rix li Chaab'il Esilal, 17 ut eb' li junch'ol chik yal re xyalb'al wix ut ink'a' sa' xyaalal; neke'xb'aanu chi jo'kan yal re xnimob'resinkil linrahilal anaqwan naq wankin sa' tz'alam. 18 Ab'anan maak'a' naxye, us ta sa' ka'pak'al uhil, us ta sa' tiikil ch'oolej, junelik napuktesimank resil li Kriist: a'in nasaho'k wi' inch'ool ut taasaho'q ajwi' chi junelik. 19 Xb'aan naq ninnaw chi us naq a'in taasutq'iiq cho'q usilal cho'q we sa' xk'ab'a' leetij jo'wi' sa' xk'ab'a' xMusiq' li Jesukriist li natenq'ank we. 20 A'in tz'aqal li ninyo'oni ut nawoyb'eni: naq maak'a' k'aru tinxutaanaq wi'. Us ta yo'yooqin malaj ut kamenaqaqin, k'ojk'o inch'ool naq anaqwan ut junelik li Kriist taanimaaq xloq'al wik'in. 21 Xb'aan naq chiwu laa'in li yu'am a'an li Kriist ut li kamk a'an q'axal us cho'q we. 22 Ab'an wi li wank sa' ruuchich'och' naraj naxye naq link'anjel taa'uuchinq, ink'a' ninnaw b'ar wank li tinsik' ru. 23 Ka'pak'al naweek'a lintitz'b'al: nawaj raj tinq'ajq tinsutq'iiq re naq wanqin rik'in li Kriist, ut a'in tz'aqal li q'axal us. 24 Ab'an li jun chik, a' li toj wank sa' ruuchich'och', a'in q'axal chik aajel ru sa' eek'ab'a' laa'ex. 25 Kaw inch'ool chirix a'in, ut ninnaw naq tinkanaaq ut toj tinwanq sa' eeyanq chejunilex re naq texk'iiq chi sa sa' eech'ool sa' leepaab'aal. 26 Jo'kan naq q'axal sahaq chik leeraanm rik'in li Kristo Jesus, naq wanqin wi' chik sa' eeyanq. 27 Ka'ajwi' a'in nawaj: naq wanqex taxaq sa' xyaalal jo' xk'ulub' li xChaab'il Esil li Kriist. Chi jo'kan, us ta tinxik cherilb'al us ta maa'anihaqin, twab'i eeresil naq kaw xaqxooqex sa' jun chi musiq'ej, ut wotz yooqex chi xyalb'al eeq'e chirix xpaab'ankil li Chaab'il Esilal, 28 chi maak'a' k'aru texxiwaq wi' chiruheb' li xik' neke'ilok eere: a'anaq reetalil li sachk cho'q reheb' a'an, a'ut cho'q eere laa'ex a'anaq reetalil li kolb'a ib'. Ut chixjunil a'in nachalk rik'in li Yos. 29 Xb'aan naq laa'ex k'eeb'il eemaatan sa' xk'ab'a' li Kriist, moko ka'aj ta wi' re xpaab'ankil li Kriist, re aj b'an wi' xk'ulb'al li rahilal sa' xk'ab'a' A'an; 30 yookex ajwi' chi xk'ulb'al li raaxiik' li xineeril wi' chaq chi wank junxil ut li wankin wi' anaqwan, jo' nekerab'i resil. |
Q'eqchi DC Bible © Bible Society in Guatemala, 2005.
Bible Society in Guatemala