Ezequiel 1 - Q'eqchi Bible

¹ Ak oob' kutan xtiklajik li xka po re li lajeeb' xka'k'aal chihab', naq wankin chaq chire li nima' Kebar, sa' xyanqeb' li ke'k'ame'k aran Babilonia, kitehonk li choxa chiwu ut kiwil ru li Yos sa' moy u.

² Ak oob' chihab' li xq'axonik laj Johakín sa' li tenamit Babilonia, sa' li oob' kutan xb'e li po

³ naq li Qaawa' ki'aatinak rik'in laj Esekiel, laj tij, ralal laj Busí, aran chire li nima' Kebar, sa' xteepal Kaldeha. Li Qaawa' kixk'e li ruq' sa' inb'een.

Li xk'ojarib'aal li Qaawa'

⁴ Toja' naq kiwil jun kaqsut-iq' kichalk chaq sa' xjayal releb'l iq'. Kiwil ajwi' jun nimla choql yo wi' chi elk li xam ut nareplotk li raq'kaaq sa' xyi a'an.

⁵ Kiwil ajwi' kaahib' li yo'yookeb' sa' xyi li xam, chanchaneb' li winq li rilob'aaleb'.

⁶ Li junjunq wank kaapak'al li ruheb' ut kaaka xxik'eb'.

⁷ Juntiikaj li xtzelekeb' ut xalxo li roqeb', kama' li roqeb' li wakax, ut nalemtz'unk jo' li q'anch'iich' ch'ajob'resinb'il chi us.

⁸ Sa' xkaapak'alil, rub'el li xxik'eb', li junjunq wank li ruq'eb', chanchan ruq'eb' li poyanam. Wankeb' ru ut xxik'eb' sa' xkaapak'alil li junjunq.

⁹ Li xxik'eb' neke'xk'ul rib' chirib'ileb' rib'; ut naq neke'b'eek, ink'a' neke'q'ajk chirix, junes chiruheb' b'an neke'xik.

¹⁰ Eb' li kaahib' a'an jo'ka'in neke'ilok: chiru, neke'ilok jo'eb' li winq; sa' li xnimeb', neke'ilok jo'eb' li kaqkoj; sa'eb' li xtz'e, neke'ilok jo'eb' li wakax, ut chirixeb', neke'ilok jo'eb' li t'iw.

¹¹ Hirho li xxik'eb' taqe'q; wiib' neke'xk'ul rib' ut li wiib' chik neke'xtz'ap wi' rib'eb'.

¹² Junes chiruheb' neke'xik, b'arwi' neke'k'ame'k xb'aan li xmusiq' li Qaawa', ut ink'a' neke'q'ajk chirixeb'.

¹³ Eb' li yo'yookeb' a'an, chanchaneb' ru xam, jo'keb' li lochlookil xam nachalk naxik sa' xyanqeb'; nareprotk li xam ut sa' xyi a'an na'elk chaq raq'kaaq.

¹⁴ Ut eb' li yo'yookeb' neke'chalk neke'xik kama'eb' wi' li raq'kaaq.

¹⁵ Naq yookin chi rilb'al li kaahib' chi yo'yookeb', kink'e reetal naq wank junjunq li sursu chi xk'atq li junjunq.

¹⁶ Junqtaq'eet rilb'al li kaahib' chi sursu, ut neke'lemtz'unk jo' li lemtz'il pek. Junqtaq'eet neke'ilok, chanchan ta wi' ch'ikch'o li junjunq sa' li jun chik.

¹⁷ Chi jo'ka'in naru neke'xik sa' xkaapak'alil, chi ink'a' neke'q'ajk chirixeb'.

¹⁸ Jwal ninq xterameb' li sursu ut xiwajeleb' rilb'al; chi xkaahichaleb' neke'lemtz'unk chi junqre.

¹⁹ Naq li yo'yookeb' neke'b'eek, neke'xik ajwi' eb' li sursu; ut naq neke'taqe'k sa' iq', neke'taqe'k ajwi' eb' li sursu.

²⁰ Eb' li yo'yookeb' neke'xik b'arwi' neke'k'ame'k xb'aan xmusiq' li Yos, rochb'eeneb' li sursu, xb'aan naq xcha'aleb' ajwi' rib' rik'ineb' a'an.

²¹ Naq eb' li yo'yookeb' neke'b'eek, neke'xik ajwi' eb' li sursu; naq neke'xaqliik eb' a'an, neke'xaqliik ajwi' li sursu. Naq neke'taqe'k sa' iq', eb' li sursu neke'taqe'k ajwi', xb'aan naq li xmusiq' eb' li yo'yookeb' wank sa'eb' li sursu.

²² Sa' xb'eeneb' a'an wank jun li kupku kama' jun li lem jwal nalemtz'unk.

²³ Ut rub'el li kupku a'an, hirho li xxik'eb' ut neke'xk'ul rib' chirib'il rib'. Ut rik'ineb' li xxik' wiib' chik neke'xtz'ap rib'eb'.

²⁴ Toja' naq kiwab'i naq neke'xik'ank, chanchan wi' xyaab' li b'ut'iha', kama' wi' li xyaab' xkux li Nimajwal Yos. Naq neke'b'eek, xiwajel li xyaab'eb', kama' xyaab' jun nimla yalok; naq neke'xaqliik, neke'xkub'si li xxik'eb'.

²⁵ Ut ki'ab'imank jun xyaab' kuxej ki'elk chaq sa' li kupku li wank sa' xb'eeneb'.

²⁶ Sa' xb'een li kupku a'an kiwil naq wank jun k'ojarib'aal yiib'anb'il rik'in li pek safiro xk'ab'a', ut sa' a'an k'ojk'o jun kama' li winq.

²⁷ Chalen sa' xyiitoq toj taqe'q, nalemtz'unk jo' li q'anch'iich' sutsu chi xam; ut chalen sa' xyiitoq toj taq'a, kiwil jo' jun xam li naxkutanob'resi li xsutam,

²⁸ chanchan wi' li kaqlaaq' naq naxk'ut rib' sa' li choql sa' li hab'alq'e. Jo'ka'in naq kixk'ut rib' chiwu li xloq'al li Qaawa'. Ut naq kiwil a'an, kinwiq'laak, kinhupub' wib' chiru ch'och' ut kiwab'i jun xyaab' kuxej yo chi waatinankil.