Éxodo 9 - Q'eqchi Bible

Li ro' xnimal rahilal: li raxkamk sa' xb'eeneb' li ketomq

¹ Toja' naq li Qaawa' kixye re laj Moisés: “Ayu rik'in laj Parahón ut ye re: «Jo'ka'in naxye li Qaawa', li xYoseb' laj Hebreo: Kanab'eb' chi elk lintenamit re naq tine'xloq'oni.

² Wi ink'a' taakanab'eb' chi elk ut toj taarameb' chi xik,

³ k'e reetal naq li ruq' li Qaawa' taat'ane'q sa' xb'eeneb' laaketomq sa' pim, sa' xb'eeneb' li kawaay, li b'uur, li kameey, li wakax ut eb' li karneer, ut taawanq jun xiwajel raxkamk.

⁴ Ab'an tiitooqeb' ru xb'aan li Qaawa' li xketomq eb' laj Israel chiruheb' li xketomq eb' laj Ejiipt, re naq maak'a' te'xk'ul li reheb' laj Israel»”.

⁵ Li Qaawa' Yos kixxaqab' ajwi' xkutankil naq kixye: “Wulaj tinb'aanu a'in sa' li tenamit”, chan.

⁶ Ak wulajaq chik kixb'aanu li Qaawa' jo' li raatin, ut kilaje'kamk chixjunil li xketomqeb' laj Ejiipt; ab'an maajun xketomqeb' laj Israel kikamk.

⁷ Laj Parahón kixtaqla rilb'al k'aru xk'ulmank, ut kik'utunk naq maajun li xul reheb' laj Israel kikamk. Ab'anan kikawuuk xch'ool laj Parahón ut ink'a' kixkanab'eb' chi elk li tenamit.

Li xwaq xnimal rahilal: eb' li sankil xox

⁸ Kixye li Qaawa' reheb' laj Moisés ut laj Aharón: “Chapomaq wiib'aq mooch' x'ab'aqil li oorn, ut laj Moisés chixkutaaq a'an sa' choxa, chiru laj Parahón:

⁹ taasutq'iiq chi q'unil pojtz' sa' xb'een chixjunil li tenamit Ejiipt, ut talaje'wanq li sankil xox chirixeb' li winq ut chirixeb' li ketomq sa' xsutam Ejiipt”.

¹⁰ Laj Moisés ut laj Aharón ke'xchap x'ab'aqil li oorn, koxe'okaq rik'in laj Parahón, ut laj Moisés kixkut a'an sa' choxa: ut kilaje'wank li sankil xox chirixeb' winq ut ketomq.

¹¹ Chi moko eb' laj q'e ke'xkuy wank chiru laj Moisés xb'aaneb' li sankil xox, xb'aan naq eb' laj q'e ajwi' kilaje'wank sankil xox chirixeb', kama' chixjunileb' laj Ejiipt.

¹² Ab'anan li Qaawa' kixkawub'resi xch'ool laj Parahón, ut a'in ink'a' kirab'iheb', kama' yeeb'il chaq re laj Moisés xb'aan li Qaawa'.

Li xwuq xnimal rahilal: li saqb'ach

¹³ Kixye li Qaawa' re laj Moisés: “Wulaj eq'la waklin, ayu rik'in laj Parahón ut ye re: «Jo'ka'in naxye li Qaawa', li xYoseb' laj Hebreo: Kanab'eb' chi elk lintenamit re naq tine'xloq'oni.

¹⁴ Xb'aan naq anaqwan tintaqla chaq chixjunileb' li rahilal chi junk'eeb'al sa' aab'een, sa' xb'eeneb' laj k'anjel chawu ut laatenamit, re naq taanaw naq maajun wank sa' ruuchich'och' kama' laa'in.

¹⁵ Wi ta xinye' li wuq' ut xatinrahob'tesi ta laa'at jo' ajwi' laatenamit rik'in raxkamk, ak maa'anihat raj chik sa' ruuchich'och'.

¹⁶ Ab'an xatinkanab' chi yo'yo re xk'utb'al chawu linwankil, re naq chinimaaq link'ab'a' sa' xb'een chixjunil li ruuchich'och'.

¹⁷ Laa'at toj nakaram relikeb' lintenamit:

¹⁸ jo'kan naq k'e reetal naq wulaj, sa' li honal a'in, tintaqla chaq kawil saqb'ach jo' ink'a' wanjenaq Ejiipt chalen chaq sa' xk'ojlajik li tenamit toj anaqwan.

¹⁹ Jo'kan b'i', taqla roksinkil laaketomq sa' rochocheb' ut chixjunil li wank aawe sa' k'aleb'aal, xb'aan naq taat'ane'q li saqb'ach sa' xb'een chixjunileb' li poyanam ut sa' xb'eeneb' li xul li wankeb' sa' k'aleb'aal, ut li jo'k'ihal ink'a' okenaqeb' sa' rochoch te'kamq»”.

²⁰ Wan reheb' laj k'anjel chiru laj Parahón ke'xxiwa li raatin li Qaawa' ut ke'roksiheb' li xmoos ut eb' li xketomq sa' rochocheb';

²¹ ab'anan eb' li ink'a' ke'xpaab' raatin li Qaawa', ke'xkanab'eb' sa' k'aleb'aal li xmoos ut eb' li xketomq.

²² Toja' naq kixye li Qaawa' re laj Moisés: “Ye' laawuq' sa' xjayal li choxa ut chit'ane'q saqb'ach sa' chixjunil li tenamit Ejiipt, sa' xb'eeneb' li poyanam, li ketomq ut chixjunil li pim li wank sa' xsutam Ejiipt”, chan.

²³ Laj Moisés kixye' li xxuq' sa' xjayal li choxa, ut li Qaawa' kixtaqla chaq kaaq ut saqb'ach; ke't'ane'k raq'kaaq sa' xb'een li ruuchich'och'. Li Qaawa' kixtaqla chaq saqb'ach sa' xb'een li tenamit Ejiipt:

²⁴ k'ajo' xkawilal li raq'kaaq li nareplotk sa' li saqb'ach; maajun sut wanjenaq kama' a'an Ejiipt chalen chaq sa' xk'ojlajik li tenamit toj anaqwan.

²⁵ Li saqb'ach kixket chixjunil li tenamit Ejiipt: kixsach jo'nimal li wank sa' k'aleb'aal, jo' winq jo' xul; kixputz'i ajwi' chixjunil li xpimul li ch'och' ut kixtoqi chixjunileb' li che' li wankeb' sa' k'aleb'aal.

²⁶ Ka'ajwi' sa' xsutam Gosen, b'arwi' wankeb' laj Israel, ink'a' kiwank saqb'ach.

²⁷ Toja' naq laj Parahón kixtaqla xb'oqb'aleb' laj Moisés ut laj Aharón ut kixye reheb': “Anaqwan ninnaw naq xinmaakob'k. Li Qaawa' a'an tiik xch'ool, a'ut laa'in ut lintenamit aj maako.

²⁸ Chetz'aama chiru li Qaawa' naq chich'anaaq li kaaq ut li saqb'ach; ut laa'in texinkanab' chi xik ut ink'a' chik texwanq arin”, chan.

²⁹ Kichaq'ok laj Moisés ut kixye: “Naq tin'elq sa' li tenamit, tintaqsi li wuq' chiru li Qaawa', ut taach'anaaq li kaaq ut ink'a' chik taawanq li saqb'ach, re taanaw naq li ruuchich'och' a'an re li Qaawa'.

³⁰ Ab'anan ninnaw chi us naq laa'at ut eb' laj k'anjel chawu toj maji' nekexiwa ru li Qaawa'”.

³¹ Kilaje'toqe'k li liin ut li seb'aad, xb'aan naq li seb'aad ak tz'utuj ut li liin yo chi atz'umak.

³² Ab'an li triiw ut li espelta maak'a' ke'xk'ul xb'aan naq toj moqon chik neke'awe'k.

³³ Toja' naq laj Moisés kixkanab' laj Parahón ut, naq ki'elk sa' li tenamit, kixtaqsiheb' li ruq' chiru li Qaawa': ch'anaamileb' li kaaq jo'wi' li saqb'ach, ut ink'a' chik xk'e li hab' sa' xb'een li ch'och'.

³⁴ Naq laj Parahón kiril naq kich'anaak li hab', li saqb'ach ut li kaaq, kimaakob'k wi' chik ut kixkawub'resi xch'ool rochb'eeneb' laj k'anjel chiru.

³⁵ Kikawuuk xch'ool laj Parahón ut ink'a' kixkanab'eb' chi elk laj Israel, kama' yeeb'il chaq xb'aan li Qaawa' chi xtz'uumal re laj Moisés.