Éxodo 33 - Q'eqchi Bible

Ke'raho'k xch'ool eb' laj Israel

¹ Kixye li Qaawa' re laj Moisés: “Ayu, elen arin aawochb'eeneb' li tenamit li kawisiheb' chaq Ejiipt, ut ayuqex sa' li ch'och' kinyeechi'i rik'in jurament re laj Abrahán, laj Isahak ut laj Jakob, naq kinye: Eb' aawalal aak'ajol tink'e wi' li na'ajej a'in.

² Laa'in tintaqla cheru jun li ánjel; twisiheb' laj Kanahán, laj Amor, laj Hit, laj Perés, laj Jib ut laj Jebús,

³ ut texwoksi sa' jun li ch'och' k'ajo' xq'emal. A'ut laa'in ink'a' texwochb'eeni, xb'aan naq laa'ex jun tenamit q'axal kaw leejolom. Mare anchal texinsach chi junajwa sa' b'e”.

⁴ Naq eb' li tenamit ke'rab'i li kawil aatin a'in, ke'raho'k xch'ool ut maajun kixtiqib' rib' rik'in chaab'il aq'ej,

⁵ xb'aan naq xyehom li Qaawa' re laj Moisés: “Ye reheb' laj Israel: «Laa'ex jun tenamit q'axal kaw leejolom. Wi ta laa'in texwochb'eeni, us ta yal junpaataq, texinsach raj chi junajwa. Jo'kan b'i', isihomaq cherix leechaab'il aq', ut moqon laa'in twil li k'aru tinb'aanu eere»”.

⁶ Jo'kan naq chalen sa' li tzuul Horeb eb' laj Israel ke'risi chirixeb' li xchaab'il aq'eb'.

Li xMuheb'aal li ch'utam

⁷ Laj Moisés kixxok li Muheb'aal ut kixxaqab' najt kach'in chirix li na'ajej wankeb' wi' laj Israel: xMuheb'aal li ch'utam kixk'e cho'q xk'ab'a'. Jo'kan naq chixjunil li naraj patz'ok rik'in li Qaawa', naxik sa' xMuheb'aal li ch'utam, li wank toj chirix li xna'ajeb' laj Israel.

⁸ Naq naxik laj Moisés sa' li Muheb'aal, chixjunil li tenamit neke'xaqliik ut neke'kanaak chi xaqxo chire li rochocheb' toj reetal neke'ril naq na'ok laj Moisés sa' li Muheb'aal.

⁹ Ut naq ak x'ok laj Moisés sa' li Muheb'aal, nakub'e chaq li choql, nahilank chire li Muheb'aal, ut li Qaawa' na'aatinak rik'in laj Moisés.

¹⁰ Naq chixjunil li tenamit neke'ril li choql yo chi hilank chire li Muheb'aal, neke'xaqliik ut li junjunq naxhupub' rib' chire li rochoch.

¹¹ Li Qaawa' na'aatinak tz'aqal chiru laj Moisés jo' na'aatinak junaq winq rik'in li ramiiw. Chirix chik a'an laj Moisés nasutq'iik sa' rochocheb' laj Israel; ab'an laj tenq' re, a' li xsaaj alal laj Nun, aj Josué xk'ab'a', toj nakanaak sa' li Muheb'aal.

Li xtij laj Moisés

¹² Kixye laj Moisés re li Qaawa': “Chak'e reetal. Laa'at xaye we: «Chak'am xb'eheb' li tenamit a'in»; ab'an ink'a' xak'ut chiwu ani taa'ochb'eeninq we. Xaye ajwi' naq sik'b'il wu aab'aan ut usilal xintaw chawu.

¹³ Jo'kan b'i', wi relik chi yaal usilal xintaw chawu, k'e chinnaw laawajom re naq k'ojk'ooq linch'ool chawix ut junelik tintaw usilal chawu. K'e reetal naq aawe li tenamit a'in”.

¹⁴ Kichaq'ok li Qaawa' ut kixye re: “Laa'in tin'ochb'eeninq aawe ut tatink'e chi hilank”.

¹⁵ Ab'an laj Moisés kixye: “Wi maawa' ajwi' laa'at tatchalq, moohaawisi sa' li na'ajej a'in.

¹⁶ Xb'aan naq k'aru taanawmanq wi' naq usilal xintaw chawu wochb'een lintenamit? Ma ink'a' tab'i' rik'in naq laa'at nakoohaawochb'eeni? A'an reetalil naq sik'b'il qu aab'aan, chiruheb' chixjunil li tenamit junsut junrub'el choxa”.

¹⁷ Kichaq'ok li Qaawa' ut kixye re laj Moisés: “Tinb'aanu ajwi' a'in li toja' xapatz' we, xb'aan naq usilal xataw chiwu ut k'ojk'o linch'ool chawix”.

Li xnimal xloq'al li Qaawa'

¹⁸ Toja' naq laj Moisés kixye: “Nintz'aama chawu naq tinaakanab' chi rilb'al laaloq'al”.

¹⁹ Kichaq'ok li Qaawa': “Laa'in tinnumsi chixjunil li wusilal chaka'yab'aal ut tinye aawe link'ab'a'. Xb'aan naq nawusilaheb' li nawaj rusilankileb', ut nawuxtaanaheb' li nawaj ruxtaanankileb'.

²⁰ Ab'an ninye aawe naq li xnaq' wu ink'a' tatruuq chi rilb'al, xb'aan naq maajun naru rilb'al chi toj tkanaaq chi yo'yo”.

²¹ Chirix chik a'an kixye li Qaawa': “Ab'i, wank jun li na'ajej chink'atq. Wanqat chi xaqxo sa' xb'een li pek.

²² Ut naq taanume'q linloq'al, tatink'e sa' jun xjob'olal li pek ut tatinmuheela rik'in li wuq' toj reetal tinnume'q.

²³ Chirix chik a'an twisi li wuq' re naq taawil li wix; a'ut li xnaq' wu ink'a' naru rilb'al”.