Éxodo 30 - Q'eqchi Bible

Li artal li taak'atmanq wi' li ensens

¹ “Taayiib' ajwi' jun li artal taak'atmanq wi' li ensens. Taayiib' rik'in akasya:

² kaaxukuutaq, wiib' k'utub' li xnimal li roq ut jo'kan ajwi' li xnimal li ru, kaahib'aq k'utub' li xteram. Junajaq ru li artal rik'ineb' li xxukub' naq taayiib'.

³ Taaletzi rix rik'in tz'aqal oor, jo' li xb'een jo' ajwi' li xk'atq ut eb' li xxukub'. Taak'e chi xsutam jun xsahob' ru yiib'anb'il rik'in oor

⁴ ut chi xk'atq, rub'el li xsahob' ru, taayiib' wiib'aq x'argoya. Taak'eheb' chi xka'pak'alil, re naq taach'ikeb' aran li che' re xpaqonkil.

⁵ Taayiib' eb' li che' a'in rik'in akasya ut taaletziheb' rix rik'in oor.

⁶ Taak'e li artal chiru li t'ikr li naxmuq li xLoq'laj Kaaxil li Sumwank, chiru li xtz'apb'al xb'een li reetalil li Sumwank b'arwi' tinwanq aawik'in.

⁷ Aran laj Aharón tixk'at li sununkil ensens; tixk'at a'an wulaj wulaj eq'la, naq tixyiib'eb' li saqenk,

⁸ ut tixk'at ajwi' naq tixk'e xya'al eb' li saqenk ewu.

⁹ Meeyeechi'i jalan chik ensens sa' xb'een li artal a'an, chi moko k'atb'il xul malaj mayej, chi moko taahoy k'a'aq chi uk'a'il.

¹⁰ Jun sut chiru li chihab' laj Aharón tixtz'aama xkuyb'aleb' xmaak li tenamit, sa' xb'eeneb' li xxuk li artal a'in; rik'in xkik'el li mayejanb'il xul tixtz'aama aran xkuyb'aleb' li xmaak li tenamit jun sut chiru li chihab': jo'kan taa'uxmanq chi junelik. Q'axal q'axtesinb'ilaq re li Qaawa' li artal a'in”.

Li toj re li xmuheb'aal li ch'utam

¹¹ Li Qaawa' kiraatina laj Moisés ut kixye re:

¹² “Naq taawajlaheb' laj Israel re xnawb'al jo'k'ihaleb', tento naq li junjunq tixtoj re li Qaawa' li xkolb'al rix li xyu'am, naq taak'ehe'q sa' ajl, re naq maak'a'aq rahilal sa' xb'eeneb' sa' li rajlankileb'.

¹³ A'an a'in li tento tixk'e li junjunq li wank sa' ajl: waqib' oons chi plaat (jo' neke'b'isok sa' li Loq'laj Na'ajej, naraj naxye junmay chi ób'olo li junjunq chi tumin); waqib' oons chi plaat li tento taak'eemanq re li Qaawa'.

¹⁴ Chixjunileb' li wankeb' sa' ajl, naraj naxye eb' li ak xe'xket junmay chihab', tento te'xk'e li toj re li Qaawa'.

¹⁵ Eb' li b'ihom ink'a' te'xk'e numenaq waqib' oons chi plaat, ut eb' li neb'a' tento ajwi' te'xk'e tz'aqal li ak xaqab'anb'il, naq te'xtoj re li Qaawa' li xkolb'aleb' rix li xyu'am.

¹⁶ Taaxok li tumin k'eeb'il re xkolb'al rix xyu'ameb' laj Israel, ut taaq'axtesi cho'q re li k'anjel taa'uxmanq sa' xMuheb'aal li ch'utam; ut a'anaq xpatz'b'aleb' laj Israel xb'aan li Qaawa' re naq te'xkol rix li xyu'ameb'”.

Li loq'laj pila

¹⁷ Li Qaawa' kiraatina laj Moisés ut kixye re:

¹⁸ “Taayiib' rik'in q'anch'iich' jun li pila, chiwanq li roq yiib'anb'ilaq ajwi' rik'in q'anch'iich': a'an taak'anjelaq re li ch'ajok. Taak'e xna'aj sa' xyanq li xMuheb'aal li ch'utam rik'in li artal, ut taak'e ha' chisa'

¹⁹ li te'xch'aj wi' eb' li roq ruq' laj Aharón rochb'eeneb' li ralal xk'ajol.

²⁰ Naq okaqeb' re sa' xMuheb'aal li ch'utam, tento te'ch'ajoq rik'in ha', re naq ink'a' te'kamq. Jo'kanaq ajwi' naq te'jiloq chi xk'atq li artal chi k'anjelak, re k'atok mayej chiru li Qaawa'.

²¹ Tento te'xch'aj eb' li roq ruq', re naq ink'a' te'kamq. Teneb'anb'ilaq li chaq'rab' a'in chi junajwa sa' xb'eeneb', sa' xb'een laj Aharón ut eb' li ralal xk'ajol, junq'e junq'e kutan”.

Li aseeyt re li yuluk

²² Li Qaawa' kiraatina laj Moisés ut kixye re:

²³ “Taasik' sununkil b'an: waqlaju liib'r chi tz'aqal miir, waqib' liib'r chi kaneel, waqib' liib'r chi sununkil utz'aal,

²⁴ waqlaju liib'r chi kasya (jo' neke'b'isok sa' li Loq'laj Na'ajej) ut numenaq oxib' liib'r chi aseeyt.

²⁵ Rik'ineb' a'an taayiib' li aseeyt re li loq'laj yuluk, sununkil b'an jo' tz'aqal naxb'aanu laj yiib'ahom re; ut a'anaq li aseeyt re li loq'laj yuluk.

²⁶ Rik'in a'an taayul li xMuheb'aal li ch'utam ut li xLoq'laj Kaaxil li Sumwank,

²⁷ li meex rochb'een chixjunileb' li xk'anjelob'aal, li xna'aj kanteel rochb'een chixjunileb' li xk'anjelob'aal, li artal re li ensens,

²⁸ li artal re li k'atb'il mayej rochb'een chixjunileb' li xk'anjelob'aal ut li pila rochb'een li roq.

²⁹ Chi jo'kan taaq'axtesi we re naq santob'resinb'ilaqeb'; ut chixjunileb' li te'ch'e'oq re, santob'resinb'ilaqeb' ajwi' a'an.

³⁰ “Taayul ajwi' laj Aharón rochb'eeneb' li ralal ut taaq'axtesiheb' we chi k'anjelak cho'q aj tij chiwu.

³¹ Taawaatinaheb' laj Israel ut taaye reheb': «A'an a'in li aseeyt li taak'anjelaq eere re li loq'laj yuluk junq'e junq'e kutan.

³² Ink'a' naru xhoyb'al sa' xb'een junaq chik winq chi moko teeyiib' junaq chik aseeyt kama'aq ta a'in, xb'aan naq a'an loq' ut tento naq teek'e xloq'al.

³³ Chixjunileb' li te'yiib'anq re junaq chik aseeyt kama' a'in, malaj te'xhoy sa' xb'een junaq winq maawa'aq aj tij, isinb'ilaq chi junajwa sa' lintenamit»”.

Li loq'laj ensens

³⁴ Kixye li Qaawa' re laj Moisés: “Taasik' li sununkil b'an: estakte, ónice, gálbano ut tz'aqal ensens; juntaq'eet rik'in li junjunq taak'e.

³⁵ Rik'ineb' a'an taayiib' sununkil ensens, q'axal chaab'il ut loq', jo' naxb'aanu laj yiib'ahom re; taatz'aqob'resi a'an rik'in atz'am.

³⁶ Taake' chi q'un q'un jun yiijachaq li taak'e chiru li reetalil li Sumwank, sa' xMuheb'aal li ch'utam, b'arwi' laa'in tinwanq aawik'in. Tento naq laa'ex teek'e xloq'al xb'aan naq a'an q'axal loq'.

³⁷ Ut maajun chik sununkil ensens kama'aq ta a'in taayiib'; tento naq taak'e xloq'al xb'aan naq q'axtesinb'il re li Qaawa'.

³⁸ Chixjunileb' li te'yiib'anq re junaq chik kama'aq ta a'an re rutz'b'al li xb'ook, isinb'ilaqeb' chi junajwa sa' lintenamit”.