Éxodo 29 - Q'eqchi Bible

Xxaqab'ankil laj Aharón cho'q aj tij rochb'eeneb' li ralal

¹ “Jo'ka'in taab'aanu rik'ineb' naq taaq'axtesiheb' we cho'q aj tij. Taachap jun ch'ina wakax ut wiib' karneer chi maak'a' reek'eb'.

² Taachap wa ut k'uluj ink'a' yuub'il: wanq li yoq'b'ilaq rik'in aseeyt ut wanq yulb'ilaq sa' aseeyt. Taayiib' a'an rik'in xchaab'il k'ajil li triiw,

³ taak'eheb' sa' jun ch'ina chakach ut tulayeechi'iheb' sa' li ch'ina chakach rochb'een li ch'ina wakax ut chi xkab'ichaleb' li karneer.

⁴ Chaye re laj Aharón ut eb' li ralal naq te'nach'oq rik'in rokeb'aal li xMuheb'aal li ch'utam b'arwi' taawatisiheb' rik'in ha'.

⁵ Taachap raq'eb' ut taatiqib' laj Aharón rik'in li jut-aq', li efod, li t'ikr wank sa' xb'een li efod ut li pektoral li taajit' chiru xk'aamal li efod.

⁶ Taak'e li xlanb'al xjolom, ut sa' xb'een a'an taak'e li loq'laj perpookil eetalil.

⁷ Toja' naq taachap li aseeyt re osob'tesink, taahoy sa' xb'een xjolom ut taayul.

⁸ Chataqlaheb' ajwi' chi nach'ok eb' li ralal laj Aharón ut taatiqib'eb' rik'in jut-aq';

⁹ taab'ak' chi kaw li xk'aamal xsa'eb' laj Aharón ut eb' li ralal, ut taak'e xlanb'al xjolomeb'. Rehaqeb' a'an li k'anjelak cho'q aj tij: a'an xchaq'rab' li Qaawa' chi junelik. Jo'ka'in naq taaxaqab'eb' xwankil laj Aharón ut eb' li ralal xk'ajol.

¹⁰ “Chirix chik a'an toxaak'am li saaj wakax chiru xMuheb'aal li ch'utam, ut laj Aharón rochb'eeneb' li ralal xk'ajol te'xk'e li ruq'eb' sa' xb'een xjolom li saaj wakax.

¹¹ Taakamsi li saaj wakax chiru li Qaawa', sa' rokeb'aal li xMuheb'aal li ch'utam.

¹² Taaxok xkik'el, taayuleb' li xxuk li artal rik'in ru'uj aawuq' ut taahoy chixjunil li kik' chi roq li artal.

¹³ Taawisi chixjunil li xeeb' li wank chirix li k'amk'ot, li nawank chi xk'atq li saaseb', jo' ajwi' xkab'ichaleb' li xkenq' ut li xeeb' li nawank chirixeb', re naq taak'ate'q sa' li artal.

¹⁴ Ab'an toj junpak'al leena'aj teek'at xtib'el li ch'ina wakax rochb'een li xtz'uumal ut li xk'ot: a'an mayej re xtojb'al rix chixjunil li maak.

¹⁵ “Moqon chik taachap jun reheb' li karneer, ut laj Aharón rochb'eeneb' li ralal xk'ajol te'xk'e li ruq'eb' sa' xb'een xjolom li karneer.

¹⁶ Naq akaq xakamsi li karneer, taarachrachi chi kik' chixjunil xsutam li artal.

¹⁷ Toja' naq taaseti xtib'el li karneer, taach'aj li xk'amk'ot ut eb' li ra', taak'eheb' sa' xb'een li xkomon ut sa' xb'een li xjolom,

¹⁸ ut taak'at chixjunil li karneer sa' li artal. A'an k'atb'il mayej cho'q re li Qaawa', sununkil b'ook, k'atb'il tzekemq cho'q re li Qaawa'.

¹⁹ “Taachap ajwi' li xkab' karneer, ut laj Aharón rochb'eeneb' li ralal te'xk'e li ruq'eb' sa' xb'een xjolom li karneer.

²⁰ Naq akaq xakamsi, taaxok xkik'el ut rik'in a'an taayul chi rub'el xxik laj Aharón li wank sa' xnim; jo'kan ajwi' taab'aanu reheb' li ralal xk'ajol. Taayuleb' ajwi' li xna' li ru'uj ruq' ut li xna' ru'uj roq li wankeb' sa' xnimeb', ut taarachrachi chi kik' chixjunil xsutam li artal.

²¹ Chirix chik a'an taaxok b'ayaq li kik' li wank sa' xb'een li artal jo' ajwi' aseeyt re yuluk, ut taarachrachi sa' xb'een laj Aharón ut sa' xb'een li raq', rochb'eeneb' li ralal xk'ajol ut li raq'eb'. Chi jo'kan q'axtesinb'ilaq we li ralal ut li raq'eb'.

²² “Toja' naq taachap xxeeb'ul li karneer a'in: li xye, li xeeb' li wank chirix li xk'amk'ot, li wank chi xk'atq li xsaaseb', xkab'ichaleb' li xkenq' ut li xeeb' li wank chirixeb', jo' ajwi' li ra' li wank sa' xnim, xb'aan naq a'an mayejanb'il karneer sa' xk'ab'a' li rokikeb' cho'q aj tij.

²³ Sa' li ch'ina chakach wan wi' li wa ink'a' yuub'il yeechi'inb'il re li Qaawa', taachap jun wa, jun k'uluj wank x'aseeyt ut jun chik yal yulb'il sa' aseeyt.

²⁴ Taak'e chixjunil a'in sa' ruq' laj Aharón ut eb' li ralal xk'ajol, re naq taaninq'ehi chiru li Qaawa' li xq'axtesinkil li mayej a'in.

²⁵ Moqon taaxok sa' ruq'eb' ut taak'at sa' li artal, sa' xb'een li k'atb'il mayej, jo' sununkil b'ook chiru li Qaawa': a'an k'atb'il tzekemq sa' xk'ab'a' li Qaawa'.

²⁶ “Taachap ajwi' li re xmaqab' li karneer ut chaninq'ehi li xxaqab'ankil laj Aharón cho'q aj tij, ut taaweek'asi jo' eek'asinb'il mayej chiru li Qaawa': a'an taakanaaq cho'q aawe.

²⁷ Chi jo'kan taasantob'resi li re xch'ool li eek'asinb'il mayej, jo'wi' li ra' li xul li xq'axtesiik: naraj naxye, li k'aru x'eek'asiik ut xq'axtesiik naq xmayejaak li karneer re xxaqab'ankil laj Aharón ut eb' li ralal cho'q aj tij.

²⁸ Ut a'an tkanaaq cho'q re laj Aharón ut reheb' li ralal: xsihom eb' laj Israel, xb'aan naq q'axtesinb'il mayej; q'axtesinb'il xb'aaneb' laj Israel naq yooqeb' chi yeechi'ink mayej, q'axtesinb'il mayej cho'q re li Qaawa'. A'an jun xchaq'rab' li Qaawa' teneb'anb'il sa' xb'eeneb' laj Israel chi junelik.

²⁹ “Eb' li xloq'laj aq' laj Aharón te'kanaaq chaq moqon reheb' li ralal: eb' a'in te'xtiqib' rib' rik'in a'an, ut chi jo'kan te'yule'q ut te'xk'ul li xk'anjeleb'.

³⁰ Chiru wuqub' kutan li ralal laj Aharón li taa'ok sa' xna'aj cho'q aj tij, naq taa'ok sa' li xMuheb'aal li ch'utam re k'anjelak sa' li Loq'laj Na'ajej, taaraq'u a'an.

³¹ “Chirix chik a'an taachap li karneer kamsinb'il re xxaqab'ankil laj Aharón cho'q aj tij, ut taachiq xtib'el sa' jun li loq'laj na'ajej.

³² Sa' rokeb'aal li xMuheb'aal li ch'utam laj Aharón ut eb' li ralal xk'ajol te'xtzeka xtib'el li karneer ut li wa li wank sa' li ch'ina chakach.

³³ Te'xtzeka li k'aru xk'anjelak re xtz'aamankil xkuyb'aleb' li xmaak, naq xe'xaqab'aak cho'q aj tij ut xe'q'axtesiik re li Qaawa'; ab'an maajun chik truuq tixtzeka a'an, xb'aan naq loq'laj mayej.

³⁴ Ut wi sa' li kutan jun chik taa'ela'anq li tib' malaj li wa li xk'eemank sa' rokikeb' cho'q aj tij, taak'at li rela'; ink'a' taatzekamanq xb'aan naq a'an loq'.

³⁵ “B'aanu b'i' re laj Aharón ut reheb' li ralal li xatinchaq'rab'i chi xb'aanunkil. Chiru wuqub' kutan b'aanu li k'anjel a'in re xxaqab'ankileb' cho'q aj tij.

Xsantob'resinkil li artal

³⁶ “Rajlal kutan taamayeja jun ch'ina wakax re xtojb'aleb' rix li maak; taach'ajob'resi li artal rik'in xpatz'b'al xkuyb'aleb' li maak ut taayul re xsantob'resinkil.

³⁷ Chiru wuqub' kutan tatmayejaq chi kama'an sa' xb'een li artal ut taasantob'resi; chi jo'kan li artal taakanaaq chi q'axal loq': chixjunil li taach'e'oq re li artal, santob'resinb'ilaq chik a'an.

Li k'atb'il mayej li taak'eemanq rajlal kutan

³⁸ “A'an a'in li taamayeja sa' xb'een li artal rajlal kutan, chi junelik: ka'kab' kok' karneer, jun chihab' xyo'lajikeb'.

³⁹ Taamayeja jun ch'ina karneer eq'la ut li jun chik ewu.

⁴⁰ Rochb'een li xb'een ch'ina karneer taayeechi'i ajwi' numenaq kaahib' liib'r li chaab'il xk'aj li triiw, yoq'b'ilaq rik'in kaahib' sek' chi chaab'il aseeyt; jo'kan ajwi' taayeechi'i jun litro li b'iin.

⁴¹ Ut li jun chik ch'ina karneer taamayeja ewu; taamayeja a'an rochb'een xtz'aqob', kama' xab'aanu eq'la, jo'q sununkil b'ook, k'atb'il tzekemq sa' xk'ab'a' li Qaawa',

⁴² k'atb'il mayej yeechi'inb'ilaq junelik chiru li Qaawa', sa' rokeb'aal li xMuheb'aal li ch'utam b'arwi' tinwanq aawik'in re aawaatinankil.

⁴³ Aran tinwanq laa'in rik'ineb' laj Israel, ut li na'ajej a'an santob'resinb'ilaq xb'aan linloq'al.

⁴⁴ Tinsantob'resi li xMuheb'aal li ch'utam ut li artal, ut tinsantob'resi ajwi' laj Aharón ut eb' li ralal re naq te'k'anjelaq chiwu cho'q aj tij.

⁴⁵ Tinhilanq sa' xyanqeb' laj Israel ut laa'inaq li xYoseb'.

⁴⁶ Ut eb' a'an te'xnaw naq laa'in li Qaawa' li xYoseb', li xe'wisi chaq sa' li tenamit Ejiipt re naq tinhilanq sa' xyanqeb': laa'in li Qaawa', li xYoseb'.