Éxodo 21 - Q'eqchi Bible

Li chaq'rab' chirixeb' laj mun

¹ “A'aneb' a'in li chaq'rab' li tento taak'e reheb':

² Naq taaloq' junaq aj mun, wi a'an aj hebreo, waqib' chihab' taak'anjelaq, ut sa' li xwuq taakanaaq chi ach'ab'anb'il, chi maak'a' tixtoj re li relik.

³ Wi xjunes naq x'ok chaq, xjunes ajwi' taaxik; wi wan chaq rixaqil, rochb'eenaq li rixaqil naq taa'elq.

⁴ Wi laj eechal re xk'ehok rixaqil ut xe'wank ralal xk'ajol, li ixq ut eb' li xkok'al rehaqeb' laj eechal re ut li winq taa'elq xjunes.

⁵ Wi tixye laj mun: «Laa'in ninra laj eechal we, li wixaqil ut eb' linkok'al; ink'a' nawaj xik», cha'aq,

⁶ laj eechal re tixk'am laj mun chiru li Yos, tixjilosi chiru li roqechal malaj chiru li xb'een li okeb'aal, ut taahope'q li xxik rik'in jutz'il ch'iich' xb'aan laj eechal re ut taakanaaq cho'q aj mun chi junajwa.

⁷ “Wi junaq winq tixk'ayi li xrab'in cho'q aj mun, a'in ink'a' truuq taa'elq chi ach'ab'anb'il, jo' neke'elk eb' laj mun winq.

⁸ Ut wi laj mun ixq ink'a' taawulaq chiru laj eechal re li xsik' cho'q re, a'in tixkanab' chi loq'e'k; ut ink'a' truuq tixb'alaq'i ut tixk'ayi reheb' jalan xtenamiteb'.

⁹ Wi ut tixk'e cho'q rixaqil li ralal, tento naq tixra kama' naxraheb' li xrab'in.

¹⁰ Ut wi tixk'am jalan chik ixq, ink'a' tixk'os li xtzekemq li xb'een rixaqil, chi moko li xb'aatal ut li xk'ulub' jo' ixaqilb'ej.

¹¹ Ab'an, wi ink'a' tixpaab' li oxib' chi na'leb' a'in, truuq taaxik li ixq chi maak'a' tixtoj sa' relik.

Chirix li kamsink

¹² “Li tixsak' ras riitz'in ut a'in taakamq, tento naq taakamsiiq;

¹³ ab'an, wi ink'a' xram sa' b'e, yal b'an li Yos xk'ehok re sa' ruq', laa'in tink'ut chawu jun li na'ajej b'arwi' toxmuq chaq rib'.

¹⁴ Ab'anan, wi xb'alaq'i li ras riitz'in re xkamsinkil, toj sa' lin'artal chawisi chaq re xkamsinkil.

¹⁵ “Li tixsak' li xna' xyuwa' tento taakamq.

¹⁶ “Li trelq'a ras riitz'in re xk'ayinkil malaj re tkanaaq sa' ruq', tento taakamq.

¹⁷ “Li tixmajewa li xna' xyuwa', tento taakamq.

Chirix li sak'ok

¹⁸ “Naq wiib' winq te'xpleeti rib' ut jun reheb' tixteni chi pek li jun chik malaj tixpik'a chi ruq', ab'an ink'a' taakamq li xk'ul li ra, taa'ok b'an sa' ch'aat,

¹⁹ wi taawakliiq ut taa'ok wi' chik chi b'eek, us ta rik'in xxuq', taakanaaq chi maak'a' xmaak li xsak'ok re, ab'an tento tixtoj li kutan kixtz'eq jo' ajwi' li xb'anb'al toj taak'iraaq chi us.

²⁰ “Wi junaq winq tixket chi che' laj mun winq malaj laj mun ixq ut a'in taakamq sa' ruq', tento tixtoj xmaak.

²¹ Ab'an wi taakanaaq chi yo'yo jun kutankaq malaj wiib'aq kutan, ink'a' tixtoj xmaak, xb'aan naq xloq'om chaq rik'in tumin.

²² “Wi wanqeb' winq li te'xtoch' sa' pleet junaq ixq wanq sa' yu'am ut a'in tixtz'eq xk'uula'al chi maak'a' chik tixk'ul, li wanq xmaak tento tixtoj jo'nimal te'xpatz' li xb'eelom li ixq ut eb' laj raqol aatin.

²³ Ab'an wi toj wanq rahilal tixk'ul li ixq, taatoj xyu'am rik'in yu'am.

²⁴ Isinb'ilaq xsa' ru li x'isink xsa' aawu; isinb'ilaq ruuch re li x'isink ruuch aawe; yok'b'ilaq ruq' li xyok'ok aawuq' ut yok'b'ilaq roq li xyok'ok aawoq.

²⁵ Taatoj rix k'atalal rik'in k'atalal, tiq'ilal rik'in tiq'ilal, tenelk rik'in tenelk.

²⁶ “Wi junaq winq tixtiq' xsa' ru laj mun winq malaj laj mun ixq ut jun aj chik xsa' ru naq tkanaaq a'in, tento tixkanab' chi ach'ab'anb'il jo' reeqaj xsa' li ru.

²⁷ Wi junaq taarisi ruuch re laj mun winq malaj laj mun ixq, tento tixkanab' chi ach'ab'anb'il jo' reeqaj li ruuch re.

²⁸ “Wi junaq b'ooyx tixxeq' junaq winq malaj ixq ut tixkamsi, taateniiq chi pek li b'ooyx a'an ut ink'a' taatiwmanq li xtib'el, ab'an laj eechal re li b'ooyx taakanaaq chi maak'a' xmaak.

²⁹ Ab'an wi ak k'aynaq li b'ooyx chi xeq'ok, ut laj eechal re ink'a' xk'aak'ale us ta ak yeeb'il chaq resil re, wi li winq malaj li ixq taakamq, tento naq li b'ooyx taateniiq chi pek, ut taakamsiiq ajwi' laj eechal re.

³⁰ Ut wi taaxaqab'aaq tz'aq xb'aan a'an, tento tixtoj jo'nimal li xpatz'mank re xkolb'al xyu'am.

³¹ Ut jo'kan ajwi' taa'uxmanq wi li b'ooyx tixxeq' junaq al malaj junaq ixqa'al.

³² Ut wi li b'ooyx tixxeq' junaq aj mun winq malaj aj mun ixq, laj eechal re li b'ooyx tixtoj lajeeb' xka'k'aal chi tumin plaat re laj eechal re laj mun, ut li b'ooyx taakamsiiq chi pek.

³³ “Naq junaq winq tixkanab' chi teeto junaq jul malaj tixb'ek junaq jul ut ink'a' tixtz'ap, wi aran taat'ane'q junaq b'ooyx malaj b'uur,

³⁴ laj eechal re li jul tento tixtoj jo'nimal xtz'aq li xul, ut taareechani li xul kamenaq.

³⁵ “Wi li xb'ooyx junaq winq tixxeq' li xb'ooyx jun chik ut tixkamsi, te'xk'ayi li b'ooyx yo'yo ut te'xwotz li xtz'aq; ut te'xwotz ajwi' li b'ooyx kamenaq.

³⁶ Ab'an wi ak nawb'il naq li b'ooyx a'an ak k'aynaq chi xeq'ok ut laj eechal re ink'a' xk'aak'ale, tento tixtoj li b'ooyx rik'in b'ooyx, ut li b'ooyx kamenaq taakanaaq cho'q re.