Éxodo 20 - Q'eqchi Bible

Li lajeeb' chi aatin

¹ Toja' naq li Yos kixye chixjunileb' li aatin a'in:

² “Laa'in li Qaawa' laaYos, li ki'isink chaq aawe sa' li tenamit Ejiipt, b'arwi' katwank chaq chi munil.

³ “Miwank jalan chik aayos chiwu laa'in.

⁴ “Maapech' chi moko taayiib' xjalam u junaq k'a' re ru li wank taqe'q sa' choxa, malaj li wank taq'a sa' ruuchich'och', chi moko li wank sa' ha' rub'el li ch'och'.

⁵ “Maahupub' aawib' chiruheb' chi moko taaloq'oniheb' ru. Xb'aan naq laa'in li Qaawa' laaYos, laa'in jun Yos aj sowen: ninteneb' li xmaak li na'b'ej yuwa'b'ej sa' xb'eeneb' li ralal xk'ajol, sa' xb'eeneb' li ri xmam ut li xxikin i li xik' neke'ilok we;

⁶ ab'anan nawuxtaana ru chi junelik eb' li neke'rahok we ut neke'xpaab' linchaq'rab'.

⁷ “Maapatz' xk'ab'a' li Qaawa' laaYos sa' tik'ti', xb'aan naq li Qaawa' ink'a' tixkanab' chi ink'a' ta tixtoj xmaak li ani taapatz'oq xk'ab'a' sa' tik'ti'.

⁸ “Jultikaq aawe li sábado re naq taasantob'resi.

⁹ Wank waqib' kutan aawe re tatk'anjelaq ut taab'aanu chixjunil laak'anjel,

¹⁰ ab'an li xwuq kutan a'an hilob'aal kutan sa' xk'ab'a' li Qaawa' laaYos. Maajun li k'anjel truuq taab'aanu: laa'at, laawalal, laarab'in, li winq ut li ixq li neke'k'anjelak chawu, laaketomq, chi moko laj ab'l tenamit li wank sa' eeyanq.

¹¹ Xb'aan naq chiru waqib' kutan li Qaawa' kixb'aanu li choxach'och', li palaw ut chixjunil li wank chisa', ut sa' li xwuq li kutan kihilank. Jo'kan naq li Qaawa' kirosob'tesi li kutan sábado ut kixsantob'resi.

¹² “Chawoxloq'i laana' laayuwa' re naq najtaq roq laayu'am sa' li na'ajej tixk'e aawe li Qaawa' laaYos.

¹³ “Maa'ani aakamsi.

¹⁴ “Matmuxuk sumlaak.

¹⁵ “Mat-elq'ak.

¹⁶ “Matyoob'ank aatin chirix laawas aawiitz'in.

¹⁷ “Maarahi ru li rochoch laawas aawiitz'in. Maarahi ru li rixaqil, li winq ut li ixq li neke'k'anjelak chiru, chi moko li xb'ooyx, li xb'uur; tik maak'a' ab'i e taarahi”.

Eb' laj Israel ke'xiwak chiru li Qaawa'

¹⁸ Chixjunileb' li tenamit ke'xk'e reetal li kaaq ut li raq'kaaq, li xyaab' tronpeet ut li xsib'el li tzuul; ke'siksotk xb'aan xxiweb' ut ke'kanaak chi najt:

¹⁹ “Aatinan laa'at qik'in ut tatqab'i; ab'an mooraatina li Yos: mare anchal tookamq”, chankeb' re laj Moisés.

²⁰ Kichaq'ok laj Moisés ut kixye reheb' li tenamit: “Mexxiwak! Li Yos xk'ulunk chi xyalb'al eerix. A'an naraj naq junelik teek'e eech'ool chi roxloq'inkil, re naq mexmaakob'k”.

²¹ Ut naq xaqxookeb' chi najt li tenamit, laj Moisés kinach'ok rik'in li choql moymoy ru b'ar wank wi' li Yos.

Li chaq'rab' chirix li artal

²² Toja' naq li Qaawa' kixye re laj Moisés: “Jo'ka'in taaye reheb' laj Israel: «Ak eerilom laa'ex naq xexwaatina toj sa' choxa.

²³ Meeyiib' eeyos rik'in plaat malaj oor; meeyiib' chi junajwa. Ka'ajwi' laa'in tineeloq'oni.

²⁴ Chayiib' jun lin'artal rik'in ch'och', re naq sa' xb'een taayeechi'i laak'atb'il xul ut laamayej, eb' laakarneer ut eb' laab'ooyx. Sa' chixjunil li na'ajej b'arwi' twaj naq taajultikamanq link'ab'a', tinchalq aawik'in ut tatwosob'tesi.

²⁵ Ut wi taayiib' junaq lin'artal rik'in pek, ink'a' taayiib' rik'in tuqub'anb'il ruhil pek, xb'aan naq sa' xtuqub'ankil ru rik'in laach'iich' li artal taakanaaq chi muxb'il.

²⁶ Jo'kan ajwi' ink'a' tattaqe'q rik'in taqleb'aal sa' xb'een lin'artal re naq ink'a' taak'ut aawib' aran».