Éxodo 18 - Q'eqchi Bible

Laj Jetró kirula'ani laj Moisés

¹ Laj Jetró, aj tij sa' li tenamit Madián ut aj hi'om re laj Moisés, kirab'i resil li kilajxb'aanu li Yos cho'q re laj Moisés jo'wi' cho'q reheb' laj Israel li xtenamit. Kirab'i ajwi' chanru kirisiheb' chaq laj Israel aran Ejiipt.

² Toja' naq laj Jetró, aj hi'om re laj Moisés, kixxok lix Seforá, rixaqil laj Moisés ak kanab'anb'il xb'aan,

³ jo' ajwi' xkab'ichaleb' li xkok'al: li xk'ab'a' li jun a'an aj Kersón, xb'aan naq xyehom chaq laj Moisés: “Aj najtil tenamitin sa' ab'l aj ch'och'”,

⁴ ut li jun chik aj Elieser xk'ab'a', xb'aan naq xyehom chaq laj Moisés: “Li xYos linyuwa' a'an aj tenq'ahom we, ut xinxkol chiru xch'iich' laj Parahón”.

⁵ Naq kiwulak laj Jetró, aj hi'om re laj Moisés, rochb'eeneb' li ralal ut li rixaqil laj Moisés sa' li chaqich'och' b'arwi' a'in yo chi hilank, chi xk'atq li xtzuul li Yos,

⁶ kixye re: “Laa'in aj Jetró, aj hi'om aawe, xinchalk aawik'in wochb'een laawixaqil ut xkab'ichaleb' laawalal”, chan.

⁷ Laj Moisés koxk'ul chaq laj hi'om re, kixhupub' rib' ut kixtz'ub' ru. Ke'xk'e xsahilaleb' xch'ool chirib'ileb' rib' ut ke'ok sa' li muheb'aal.

⁸ Toja' naq laj Moisés kixseeraq'i re li xyuwa' li rixaqil chixjunil li kilajxb'aanu li Qaawa' re laj Parahón ut reheb' laj Ejiipt sa' xk'ab'a'eb' laj Israel, jo' ajwi' chixjunil li ch'a'ajkilal ke'xk'ul chaq sa' b'e ut chanru li Qaawa' kixkoleb'.

⁹ Kisaho'k sa' xch'ool laj Jetró rik'in li xnimal usilal ki'uxk reheb' laj Israel xb'aan li Qaawa', naq kirisiheb' chaq sa' ruq'eb' laj Ejiipt;

¹⁰ ut kixye: “Usilaatinanb'il taxaq li Qaawa' li x'isink chaq eere sa' ruq'eb' laj Ejiipt ut sa' ruq' laj Parahón, ut xkoleb' li tenamit chiru xwankilaleb' laj Ejiipt!

¹¹ Anaqwan ninnaw naq li Qaawa' a'an q'axal nim xwankil chiru chixjunileb' li yos, xb'aan naq xjosq'o'k sa' xb'eeneb' laj Ejiipt naq eb' a'an xe'raj raj xnimob'resinkil rib'”.

¹² Chirix chik a'an laj Jetró, aj hi'om re laj Moisés, kixyeechi'i xmayej ut kixk'at jun li xul cho'q re li Yos; ut laj Aharón jo'wi' chixjunileb' li xb'eenil laj Israel koheb' chi wa'ak chiru li Yos, wan wi' laj hi'om re laj Moisés.

Eb' li xaqab'anb'ileb' chi raqok aatin

¹³ Sa' li kutan jun chik laj Moisés kik'ojlaak chi raqok aatin sa' xb'eeneb' li tenamit, ut tik jun kutan ke'wank li tenamit chiru laj Moisés chalen eq'la toj ewu.

¹⁴ Laj Jetró kiril chixjunil li nalajxb'aanu laj Moisés cho'q reheb' li poyanam, ut kixye: “K'a' naq nakab'aanu a'in rik'in li tenamit? K'a'ut naq k'ojk'ookat aajunes ut xaqxookeb' chak'atq chixjunileb' li poyanam chalen eq'la toj ewu?”.

¹⁵ Kichaq'ok laj Moisés ut kixye re laj hi'om re: “Xb'aan naq li tenamit neke'chalk wik'in chi patz'ok rik'in li Yos.

¹⁶ Naq wank xch'a'ajkilaleb', neke'chalk wik'in; laa'in ninraqok aatin sa' xb'eeneb' ut nink'e chixnaweb' li xchaq'rab' li Yos ut li xtaqlahom”.

¹⁷ Toja' naq laj hi'om re laj Moisés kixye re: “Ink'a' us li yookat chi xb'aanunkil.

¹⁸ Toxatlub'q laa'at ut taalub'q ajwi' li tenamit a'in li wank aawik'in, xb'aan naq li k'anjel a'in q'axal kaw chiru laametz'ew; moko taakuy ta xb'aanunkil aajunes.

¹⁹ Jo'kan b'i' ab'i li k'aru tinye aawe; tink'e aana'leb' ut li Yos taawanq aawik'in. Laa'ataq laj oksinel aatin chiru li Yos chirixeb' li tenamit ut choxaaye li xch'a'ajkilaleb' re li Qaawa'.

²⁰ K'uteb' chiru li xtaqlankileb' ut eb' li chaq'rab'; k'e chixnaweb' li b'e li tento te'xk'am ut li k'anjel te'xb'aanu.

²¹ Ab'an sik'eb' ru li winq seeb'eb' xch'ool sa' xyanq li tenamit, li neke'xxiwa ru li Yos, tiikeb' xch'ool ut aj tz'eqtaanahom re tuminaak, ut k'eheb' xwankil sa' xb'een li tenamit: wan te'xjolomi lajeetqk'aal rox o'q'ob' (1,000), wan o'taqk'aal (100), wan lajeetq roxk'aal (50) ut wan chik lajeetq.

²² Eb' a'an te'raqoq aatin sa' xb'een li tenamit chiru chixjunil li kutan; tule'xk'ut chawu li xninqal xch'a'ajkilaleb', ab'an wi ink'a' nim li ch'a'ajkilal, tento naq eb' a'an te'raqoq aatin chirix. Chi jo'kan taaseeb'o'q laawiiq xb'aan naq eb' a'an tate'xtenq'a chi xk'amb'al.

²³ Wi taab'aanu a'in ut li Yos tixk'ut chawu laataqlankil, laa'at taakuy chik laak'anjel, ut chixjunil li tenamit a'in te'sutq'iiq sa' xna'ajeb' chi saheb' sa' xch'ool”.

²⁴ Laj Moisés kixpaab' li raatin laj hi'om re ut kixb'aanu chixjunil li kiyehe'k re xb'aan.

²⁵ Kixsik'eb' ru li winq seeb'eb' xk'a'uxl sa' xyanq chixjunileb' laj Israel ut kixk'eheb' xwankil sa' xb'eeneb' li poyanam: wankeb' ke'xaqab'aak chi xjolominkileb' lajeetqk'aal rox o'q'ob' (1,000), wankeb' chik chi xjolominkileb' o'taqk'aal (100), lajeetq roxk'aal (50) ut lajeetq.

²⁶ Ut eb' a'in neke'raqok aatin sa' xb'een li tenamit chiru chixjunil li kutan: li xninqal xch'a'ajkilaleb' neke'xk'am chiru laj Moisés, ab'an wi kok' li ch'a'ajkilal, a'aneb' ajwi' neke'raqok aatin chirix.

²⁷ Moqon laj Moisés kixchaq'rab'i laj hi'om re, ut a'in kisutq'iik sa' li xtenamit.