Éxodo 12 - Q'eqchi Bible

Li Paswa

¹ Li Qaawa' kixye re laj Moisés ut re laj Aharón sa' li tenamit Ejiipt:

² “Li po a'in a'anaq xtiklajik li chihab' cho'q eere, a'anaq li xb'een po.

³ Cheye a'in re chixjunil li xkomonileb' laj Israel: Sa' li lajeeb' xb'e li po a'in teechap chejunjunqal jun xkarneer leejunkab'al, jun xkarneer li junjunq chi ochoch.

⁴ Ut wi li junkab'al jwal kach'in ut ink'a' te'xchoy li jun chi karneer, xjunajiqeb' rib' rik'in li rechkab'al li nach' chi xk'atq, a' yaal chanru li xk'ihaleb' li b'oqb'ileb' ut a' yaal jo'nimal li naxtzeka li junjunq.

⁵ Tento naq li xul maak'a'aq reek', teelomaq ut junchihab'aq xyu'am. Teesik' a'an sa' xyanqeb' li kok' karneer malaj chib'aat,

⁶ ut teek'uula toj sa' li kaalaju xb'e li po a'an; toja' naq chixjunil li xkomonileb' laj Israel te'xmayeja naq namoynak.

⁷ Chirix chik a'an teexok li xkik'el ut teeyul li wiib' roqechal li okeb'aal ut sa' xb'een re li kab'l b'arwi' texwa'aq.

⁸ Sa' ajwi' li q'oqyink a'an teetiw li xtib'el, chi pomb'il, rik'in wa ink'a' yuub'il ut rik'in k'ahil ichaj.

⁹ Meetiw chi rax chi moko chi chiqb'il, chi pomb'il b'an, rik'in li xjolom, li roq ut li xk'amk'ot.

¹⁰ Maak'a' teekanab' re li kutan jun chik, ut li taa'ela'anq tento teek'at naq texsaqewq.

¹¹ Jo'ka'in naq teetiw: chi b'ak'b'ooq leesa', wanq eexaab' cheroq ut wanq eexuq' sa' eeruq'; ut chi junpaat teetiw xb'aan naq a'an li xPaswa li Qaawa'.

¹² Sa' li q'oqyink a'an laa'in tinnume'q sa' xsutam Ejiipt ut tintiq'eb' chixjunil li xb'een alalb'ej re li tenamit a'an, jo'wi' li xb'een raleb' li xul, ut tinraqoq aatin sa' xb'een chixjunil li xyoseb' laj Ejiipt. Laa'in li Qaawa'.

¹³ “Li kik' a'anaq eereetalil chiwu laa'in sa' li kab'l texhilanq wi'. Naq laa'in tintiq' li tenamit Ejiipt, maajun sa' eeyanq taakamq, xb'aan naq twil li kik' ut tiik tinnume'q cheru.

¹⁴ Li kutan a'an a'anaq xnimal ru kutan cho'q eere, ut laa'ex teenima junelik rik'in jun ninq'e sa' xk'ab'a' li Qaawa'. Teexaqab' chi junajwa cho'q xnimal ru ninq'e.

Li wa ink'a' yuub'il

¹⁵ “Chiru wuqub' kutan texwa'oq wa ink'a' yuub'il. Chalen li xb'een kutan isinb'ilaq sa' leerochoch li nasipob'resink re li wa. Yalaq ani taawa'oq wa yuub'il, chalen sa' li xb'een kutan toj sa' li xwuq, taasache'q sa' xyanqeb' laj Israel.

¹⁶ Sa' li xb'een li kutan chiwanq eeloq'laj ch'utam: jo'kanaq ajwi' sa' xwuq li kutan. Maajun k'anjel chi'uxmanq sa'eb' li kutan a'an; ka'ajwi' taaruuq xk'uub'ankil li tzekemq re li junjunq.

¹⁷ Cheroxloq'i li xNinq'e li wa ink'a' yuub'il, xb'aan naq sa' ajwi' li kutan a'an laa'in xexwisi chi tzoltzo sa' li tenamit Ejiipt. Chenima junelik li kutan a'an jo' chaq'rab' xaqxo chi junajwa.

¹⁸ Texwa'oq wa ink'a' yuub'il sa' li xb'een po, chalen sa' li kaalaju xb'e li po ewu toj sa' li jun xka'k'aal ewu.

¹⁹ Chiru wuqub' kutan ink'a' taawanq sa' leerochoch li nasipob'resink re li wa: chixjunileb' laj ab'l tenamit malaj yo'lajenaqeb' sa' eeyanq li te'wa'oq k'a'aq re ru wanq xyu, te'sache'q sa' xkomonileb' laj Israel.

²⁰ Maak'a' teewa' chi wanq ta xyu. Sa' chixjunil li na'ajej texhilanq wi', tento texwa'oq wa ink'a' yuub'il”.

Xtaqlahom li Yos chirix li Paswa

²¹ Laj Moisés kixb'oqeb' chixjunil li xcheekelaleb' laj Israel ut kixye reheb': “Ayuqex chi xsik'b'al kok' wakax re leejunkab'al, ut teemayeja cho'q re li Paswa.

²² Teechap jun cheet chi hisoop, teetz'a sa' li kik' wanq sa' emel ut teeyul li wiib' roqechal li okeb'aal jo' ajwi' li xb'een, rik'in li kik' wanq sa' emel; ut maajun eere taa'elq sa' rochoch toj sa' li kutan jun chik.

²³ Li Qaawa' Yos taanume'q ut tixtiq'eb' laj Ejiipt, ab'anan naq taaril li kik' sa' li wiib' roqechal ut sa' li xb'een li okeb'aal, tiik taanume'q li Qaawa' chire li kab'l a'an ut ink'a' tixkanab' laj Sachonel chi ok sa' leerochoch.

²⁴ Chepaab' leetaqlankil a'in jo' chaq'rab' xaqxo chi junajwa cho'q eere ut reheb' leeralal eek'ajol.

²⁵ Chepaab' ajwi' li na'leb' a'in, naq toxex'okaq sa' li ch'och' li tixk'e eere li Qaawa', jo' naq yeechi'inb'il eere.

²⁶ Ut naq leeralal eek'ajol te'xpatz' eere k'aru xyaalal a'in,

²⁷ teeye reheb': «A'an a'in li mayej re li xPaswa li Qaawa'. Naq kixtiq'eb' laj Ejiipt, tiik kinume'k chire rochocheb' laj Israel aran Ejiipt, ut kixkol li qochoch», cha'qex”. Toja' naq li tenamit ke'xhupub' rib' chi loq'onink.

²⁸ Ut eb' laj Israel koheb' ut ke'xb'aanu li ke'taqlaak wi' laj Moisés ut laj Aharón xb'aan li Qaawa'.

Li xlaje xnimal rahilal: li xkamikeb' li xb'een alalb'ej

²⁹ Tuqtu q'oqyink li Qaawa' kulxtiq' chixjunileb' li xb'een alalb'ej sa' li tenamit Ejiipt, chalen li xb'een ralal laj Parahón li wank sa' xk'ojarib'aal li xyuwa' toj rik'in li xb'een ralal li tz'aptz'o sa' tz'alam, jo' ajwi' li xb'een ral chixjunileb' li ketomq.

³⁰ Chiru li q'oqyink a'an kiwakliik laj Parahón rochb'een chixjunileb' laj k'anjel chiru ut eb' laj Ejiipt, ut kiwank xnimal rahil japok-e Ejiipt, xb'aan naq maajun ochoch maak'a' tawi' junaq kamenaq.

³¹ Chiru ajwi' li q'oqyink a'an laj Parahón kixb'oqeb' laj Moisés ut laj Aharón ut kixye reheb': “Waklinqex ut elenqex sa' lintenamit, laa'ex ut eb' laj Israel, ut ayuqex chi xloq'oninkil ru li Qaawa' kama' xeye.

³² K'amomaq ajwi' cherix leekarneer ut leewakax jo' naq xeye. Ayuqex ut tijonqex ajwi' chiwix”, chan.

³³ Eb' laj Ejiipt ke'relaji ruheb' laj Israel naq te'xseeb'a rib' chi elk sa' li xna'ajeb': “Kamk qe chiqajunilo”, chankeb'.

³⁴ Jo'kan naq li tenamit ke'xchap li q'em chi toj maji' nasipo'k, ke'xlan li xyoq'leb'aleb' sa'eb' li t'ikr, ut ke'riiqa.

³⁵ Eb' laj Israel ke'xb'aanu li kixye laj Moisés reheb', ut ke'xtz'aama chiruheb' laj Ejiipt li k'a'aq re ru plaat ut oor jo' ajwi' li raq'eb'.

³⁶ Li Qaawa' kixtenq'aheb' chi xtawb'al usilal chiruheb' laj Ejiipt, ut eb' a'in ke'xk'ul xch'ool. Chi jo'kan eb' laj Israel ke'xk'am li k'aru wank reheb' laj Ejiipt.

Relikeb' laj Israel

³⁷ Eb' laj Israel ke'elk aran Ramsés sa' xjayal Sukot: lajeek'aal xkab' o'q'ob' mil (600,000) tana li winq li koheb' chi roq, ink'a' k'eeb'ileb' sa' ajl eb' li kok'al.

³⁸ Ke'elk ajwi' rochb'eeneb' naab'al chik tenamit ut k'ajo' xk'ihaleb' li karneer ut li wakax.

³⁹ Naq ke'isiik Ejiipt, ink'a' ke'ruuk chi b'ayk, chi moko ke'ruuk chi xxokb'al xtzekemqeb'. Jo'kan naq chiru li q'em li ke'xxok Ejiipt, ke'xyiib' xsup k'ulujeb', xb'aan naq maji' nasipo'k li q'em.

⁴⁰ Lajeeb' xka'k'aal xkab' o'q'ob' (430) chihab' ke'kanaak eb' laj Israel aran Ejiipt.

⁴¹ Chiru ajwi' li kutan a'an, sa' xkooloninkil lajeeb' xka'k'aal xkab' o'q'ob' (430) chihab', ke'elk chixjunileb' li xteepal li Qaawa' sa' li tenamit a'an.

⁴² Chiru li q'oqyink a'an kiyo'lek li Qaawa' re risinkileb' aran Ejiipt. Chiru ajwi' li q'oqyink a'an tento te'yo'leq eb' laj Israel re xnimankil ru li Qaawa', junq'e junq'e kutan.

Chanru xninq'ehinkil li Paswa

⁴³ Kixye li Qaawa' re laj Moisés ut re laj Aharón: “A'an a'in leetaqlankil chirix li Paswa: Maajun jalan xtenamit taatzekanq re li tzekemq a'in.

⁴⁴ Ab'anan chixjunileb' li loq'b'ileb' aj mun li xk'ulumeb' li sirkunsisyon taaruuq te'xtzeka.

⁴⁵ Laj ab'l tenamit ut li tojb'il ink'a' naru tixtzeka.

⁴⁶ Taatzekamanq sa' kab'l, ut maak'a' tib' teerisi chirix kab'l, chi moko teetooq junaq xb'aqel.

⁴⁷ Chixjunil li xkomonileb' laj Israel te'xninq'ehi a'in.

⁴⁸ Wi junaq jalan xtenamit nahilank sa' laawochoch ut taaraj xninq'ehinkil li xPaswa li Qaawa', tento xb'enwa naq te'xk'ul li sirkunsisyon chixjunileb' li xteelom; toja' naq taaruuq taanach'oq chaq chi xninq'ehinkil, xb'aan naq a'an eekomonaq chik. Ab'anan maajun li ink'a' setb'il li xtz'uumal xtz'ejwal taaruuq xtzekankil li Paswa.

⁴⁹ Juntaq'eetaq li chaq'rab' cho'q eere ut cho'q reheb' li jalaneb' xtenamit li wanqeb' sa' eeyanq”.

⁵⁰ Chixjunileb' laj Israel ke'xb'aanu chi jo'kan: ke'xpaab' li ke'taqlaak wi' laj Moisés ut laj Aharón xb'aan li Qaawa'.

⁵¹ Ut sa' ajwi' li kutan a'an li Qaawa' kirisiheb' chi tzoltzo laj Israel sa' li tenamit Ejiipt.