Ester 8 - Q'eqchi Bible

Li xchaq'rab' li awab'ej chirixeb' laj Judiiy

¹ Sa' ajwi' li kutan a'an laj Asuero li awab'ej kixq'axtesi re lix Ester li xjunkab'lal laj Amán, li xik' narileb' laj Judiiy, ut laj Mardokeo kib'oqe'k xb'aan li awab'ej, xb'aan naq lix Ester kixye naq a'an jun xkomon.

² Toja' naq li awab'ej kirisi chaq li matq'ab' li kixmaq' chiru laj Amán ut kixq'axtesi re laj Mardokeo, ut lix Ester kixxaqab' laj Mardokeo re naq a'an chik taa'iloq re chixjunil li k'aru kiwank re laj Amán.

³ Chirix chik a'an lix Ester kirelaji wi' chik ru li awab'ej, kixhupub' rib' chi roq naq yo chi yaab'ak, ut kixtz'aama usilal chiru, naq tixsach xwankil li chaq'rab' kixyiib' laj Amán aj Agag, jo' ajwi' li kixk'uub' re xsachb'aleb' laj Judiiy.

⁴ Tikto li awab'ej kixchap li xxuq' yiib'anb'il rik'in oor, kixch'e' lix Ester, ut a'in kiwakliik ut kixye re li awab'ej:

⁵ “At awab'ej, wi a'an us cho'q aawe ut nakak'oxla naq usilal xintaw chawu, wi us li ninpatz' ut wi nikinaara, chatz'iib'a wi' chik junaq chaq'rab' re xsachb'al xwankil li hu tz'iib'anb'il xb'aan laj Amán, ralal laj Hamdatá, aj Agag, ut k'uub'anb'il re xsachb'al chixjunileb' laj Judiiy sa'eb' li tenamit li wankeb' rub'el laa'awab'ejihom.

⁶ Xb'aan naq chanru tinkuy rilb'al li rahilal taachalq sa' xb'een lintenamit? Chanru tinkuy naq te'sache'q li wech tenamitul?”, chan.

⁷ Toja' naq laj Asuero li awab'ej kixye reheb' lix Ester ut laj Mardokeo aj Judá: “Ak xinq'axtesi re lix Ester li xjunkab'lal laj Amán, li xintaqla xt'uyub'ankil xb'aan naq xraj xsachb'aleb' ru eb' laj Judiiy.

⁸ Tz'iib'ahomaq eehu anaqwan cho'q reheb' laj Judiiy sa' ink'ab'a' ut b'aanuhomaq jo' chanru teeraj xb'aanunkil; ut kaaxtiiq ru rik'in linmatq'ab'. Xb'aan naq chixjunil li natz'iib'aak sa' xk'ab'a' li awab'ej ut nakaaxtiik rik'in li xmatq'ab', wank xwankil chi junajwa”.

⁹ Chi junpaat ke'b'oqe'k laj tz'iib' li neke'k'anjelak chiru li awab'ej, sa' li oxib' xka'k'aal kutan xb'e li rox po, Sibán xk'ab'a', ut ke'xtz'iib'a eb' li aatin kixye laj Mardokeo, cho'q reheb' laj Judiiy, eb' li ninqeb' xwankil, eb' laj taqlanel ut eb' li xjolomil tenamit, chalen chaq sa' xteepal India toj Etiopía, cho'q reheb' ajwi' li wuqub' xwuqk'aal (127) teep chi tenamit, li junjunq jo' chanru li xtz'iib' ut li raatinob'aal; jo'kaneb' ajwi' cho'q reheb' laj Judiiy.

¹⁰ Eb' li hu ke'tz'iib'aak sa' xk'ab'a' laj Asuero, ke'kaaxtiik chiru xmatq'ab' li awab'ej ut ke'taqlaak chirixeb' li taql neke'b'eek chirix kawaay xkomoneb' li xkawaay li awab'ej.

¹¹ Sa'eb' li hu a'an li awab'ej kixye reheb' laj Judiiy naq truuq te'xch'utub' rib' sa' chixjunileb' li tenamit b'arwi' wankeb', re xkolb'aleb' rib' chiruheb' li xik' neke'ilok reheb', jo' ajwi' re xkamsinkil ut xsachb'al ru chi junajwa chixjunileb' li poyanam ut tenamit li te'yaloq rik'ineb', rochb'eenaqeb' li rixaqileb' ut li xkok'aleb', toj reetal toxe'reechani jo'ch'inal jo'nimal wank reheb'.

¹² Chixjunil a'in taa'uxmanq chiru jun kutan sa' chixjunileb' li tenamit li wankeb' rub'el xwankil laj Asuero li awab'ej, sa' li oxlaju xb'e li po Adar, a'an li xkab'laju po re li chihab'.

¹³ Tento risinkil junaq reetalil li hu a'in re taayaab'asimanq jo' chaq'rab' sa' xyanqeb' chixjunileb' li poyanam ut sa' chixjunileb' li tenamit, re naq ak kawal wanqeb' laj Judiiy sa' li kutan te'yaloq wi' rik'ineb' li xik' neke'ilok reheb'.

¹⁴ Eb' li xtaql li awab'ej koheb' sa' aanil chirixeb' kawaay, re xpaab'ankil li xchaq'rab' li awab'ej, ut li esil kipuktesimank ajwi' sa' li tenamit Susa.

¹⁵ Laj Mardokeo ki'elk sa' rochoch li awab'ej chi tiqto rik'in chaab'il aq', rax ut saq xb'onol, jo' naroksi li awab'ej; wank ajwi' jun xkoroon yiib'anb'il rik'in oor sa' xjolom ut xkaqi t'ikr liin. Naq eb' laj Susa ke'ril a'in, k'ajo' naq ke'saho'k xch'ool.

¹⁶ Ut eb' laj Judiiy ke'xtaw nimla sahilal ut loq'al;

¹⁷ sa' chixjunileb' li tenamit ut li teep kiwulak wi' li esil a'in, k'ajo' naq ke'saho'k xch'ooleb' laj Judiiy ut ke'xninq'ehi rik'in tzekank. Ut naab'aleb' winq sa'eb' li tenamit a'an ke'xk'ul li sirkunsisyon ut ke'kanaak cho'q aj Judiiy xmaak xxiweb' chiruheb' laj Judiiy.